JEMS 3 - NIEMNYAN Naga NT (BSI)

Theli

¹ Ngalemruchha heh, nekhuwah ahethôte ajah nekdangen. Nema ajet, ni ahethôte dangeki hehnâng achhih asenpa mihhan heh noma abâm erenhi.

² Nãngkhu anga ngama roantang mejô rângmôang themoe. Rohkomin henma ate jab ajâ nâng chenthujô lethe dangeka, ere mihnyan pa asen, ngale atema ate phoang phangtang kitlo lahma thieneka.

³ Nãngma Mokthunko ngin chenkephi ngama ruma rângkhhek e, ngale nãngma chenko dângthuk hunekia ere ngeko rângchhoan thuk e.

⁴ Ngale jogari hehnâng thatthong hun tan en: Jogarii pa atô chêmdongroh ngale nyahrãng pôngdongma metlahmejô mechhoan akomin, erepa jogari thunwah jankha chhupchha khhek eka pumma punchhoanthuk eka, ngale arepte pumma chennge nâng repchhoan huneka ere ngeko repchhoan eka.

⁵ Phumma theli pemin eroh jôba: Atô arinchhajô medang akomin, erepumma dôngmõang tarângthôa. Thatthong hun tan en, lindong lakdong pa mitchhuptô wenpôma tarokphea!

⁶ Ngale theli pemin wen rãngrãng jôba. Chentô hahtokkhoh kowah achhih heh theli nâng tongeka, ngale atema nãng phoangko tonglahma nãngphoang phangtang chhihsiet eka. Theli pumma nãngphoang phangtang wennâng thhek eka, ngale theli pumma ere wenpa papwen wah choh eka.

⁷ Mihnyan nyuchha ma chentô ngem angah heh tapem e, ngale apêmmin pemwak eka - wunngem, wunwo, pû anyah hehmin pemwak eka.

⁸ Rohkomin henmemin mâmâ dede theli mathat takitloeka. Theli pa achhih ngale tâkitloatli dangmah, ngale theliko mihnyan ritphethin bii angen min ajahthem tonga.

⁹ Nãngma theli pumma nãng Teso ngale nãng Wa Joban nâng dangkoh a min ngaeki, ngale erepumma Joban rãngrãng hôanwah mihnyan hehnângmin tem athoak eki.

¹⁰ Dangkoh a ngat jabkhab le mihnâng têm athoak jabkhab pa mãnthethin thunkowah loatkaera. Ngalemruchha heh, phumma aroh pa nekchen dangeka!

¹¹ Jomit mitthe kowah jotu ngale jokhah jienroam loatjenmah.

¹² Ngale Ngalemruchha heh, Fugbãng kowah Olivri jienhong rimah; ngale Angurbãng kowah Fugri jienhong rimah, ngale sumjo kowah jotu jienhong jenmah.

Rangkhethung wah Buthi Mongthem

¹³ Nekhu chhangnâng hen akomin jet ajien ngale hungchit rinchhem tongen a? Eroh metong enko nema ne roandôngko moatlemsen moletma, numnene dangletma, erediko buthi mongthemsen dangletma khesok en.

¹⁴ Rohkomin nehung nâng mihphetwân, hungngek, ngale chhahnyoak, medang enko, nema ne buthi mongthem pa rângthô letma toangtang lelatnâng dangletma pap nekmo en.

¹⁵ Arerãngrãng buthi mongthem pa rangkhethung wah kat dangmahra; erepa hahtokkhoh wah buthi mongthem ba, ngale erepa Joban Ju wah ledangma juchhih ngewah choh eka.

¹⁶ Chenko mihphetwân ngale chhahnyoak tongeka, eretheko hahjâm tijâm ngale rongrup achhih hehmin tongeka.

¹⁷ Rohkomin rangkhethung wah buthi mongthem pa khebeng thôanko hungsâ; erediko mêmo, numnene, ngale chentô demnâng lemru lemchha tuta; ngale mihnâng nyahrãng mînchen, moatlemsen tuta moeka; ereko thhensok le khoanglep aho.

¹⁸ Ngale mêmo dângrãngma moatte hehma mêmoma moeka junko asenli ngale mêmo echohwak a.