IFISIEN 5 - NIEMNYAN Naga NT (BSI)

Wenphiak nâng Sôngtông

¹ Nekhunâng Joban ma ate chha rãngrãng nyahrãng hun ehèn, erohwah nekhumin ate rãngrãng dangen.

² Ne roandôngko hun achhâmin letma songtongen, chenroh Krista ma nãngnâng hunlahma ate roandôngpa Joban rinmeli tum amengli heh rângkoh arãngrãng ate roangdong pa nãngrãngma kohwah, ererãngrãng nekhumin hun achhâmin en.

³ Nekhua Joban mihnyan, erohwah, nekhu chhangnâng dihiak dela kaamchhih moat, lihân achhihli heh moaka, chhahnyoak, ererãngrãng heh ledangmin. Ererãngrãng pa Joban mihnyan hehma moatli dangmah.

⁴ Ngale nekhuma jabchhih jabkhah, mihnâng dûmmek jabkhab, ngale ledangli nginchhih heh lephoang jabmin, ererãngrãng jabkhab heh Joban mihnyan hehma lejabmin. Erenoma nema Joban nângba dangkoh a ngatmin.

⁵ Nema senthemthem jet en, dihiak dela kaamchhih moatte, lihân achhihli moatte, chhahnyoak (chhahnyoak pa moangachaang hehnâng soamtô nâng ngaeka) hehma Krista ngale Joban Hahsông thepa lechohmin.

⁶ Hennângjô ledangli ngin hehnâng nekdiap chhahrii en; chengrãngma ngako, ererãngrãng heh junko Joban rinkhah pa ate ngin lekepte heh khohnâng hûera.

⁷ Erohwah arerãngrãng mihnyan heh demnâng chenjô nekjoh mo en.

⁸ Nekhu dedemin rangnyek khenâng dângwah, rohkomin nekhua Teso mihnyan rãng dâng phumma, nea wenphiak nâng lâdang tutet. Erohwah nekhumin wenphiak nâng sôngtôngte mihnyan rãngrãng dangletma songtongen,

⁹ chenrãngma ngako wenphiak pumma jatrup asenli heh kephûera, toangtangma sôngtông ngale apun alemli heh kephûera.

¹⁰ Chenni ma Teso rin jienme thukmin a erepa jet en.

¹¹ Rangnyek khenwah tôngte mihnyan hehma moeka moatlempa nema nekmo en. Ereheh molihma chenmin asenli chohmih. Erenoma thinmin wenphiak nâng loatsiet katwak en.

¹² (Ngin linlinjô, thinma huhmo eka moatlem heh athôrãngjô nyahrãng rêsêli.)

¹³ Ngale chenthu areheh phangtang wenphiak nâng meloat sietkat thakoba, thin linlin jat apat pa senthemthem ekhe e;

¹⁴ chenrãngma ngako chenpa senthemthem khe ekia erepa wenphiak nâng khe eki. Erohwah Joban nyapraang nâng aroh ngaeka, “Juplekte heh sat en, ngale ritwah ngaksat en, ngale Krista wenphiak pumma nekhoh nâng ephiak kat hèn.”

¹⁵ Erohwah jetletma songtongen. Aba rãngrãng nekdangen, chhin achhiak heh rãngrãng dangen.

¹⁶ Sanpoat roakweih asenli moletma tongen, chenrãngma ngako, rãngkuhchhih hûera.

¹⁷ Erediko aba rãngrãng nekdangen, erenoma Teso ma nenâng chenni moatthuk hun ehèn a erepa jet en.

¹⁸ Khemjok letma nekmok en, erepumma ne chhihsiet ba ere hèn; erenoma Joban Ju mênchong dangletma tongen.

¹⁹ Wathema wathe nâng Joban rangsoamsê, nginsensê, ngale Jobansê hehwah seletma rânjabmîn en; nehung nâng nginsensê ngale Joban rangsoamsê hehwah seletma Teso nâng rô en.

²⁰ Teso Jisu Krista mînko chentô rãngma Wa Joban nâng roantangma dangkoh a nga en.

Tangnyu Tangwa heh

²¹ Krista ranchei letma wathema wathe ngin kepmîn en.

²² Tangnyu heh, Teso ranchei eken rãngrãng ne tangwa nginkepkep dangen.

²³ Chenrãngma ngako Asâthem heh khohko Krista nâng chaantong eka rãngrãng, tangwa hehnângmin tangnyu heh khohko chaantong eka; ngale Krista pa ate phoang Asâthem heh pângte.

²⁴ Erohwah Asâthem heh Krista nginkepkep dangeka rãngrãng, tangnyu hehmin mâmâ dede tangwa heh nginkepkep dângmin.

²⁵ Krista ma Asâthem hehnâng hunlahma ate roandôngpa Asâthem hehrãngma koheka rãngrãng, tangwa hehmemin ne tangnyu hehnâng hun en.

²⁶ Krista ma Asâthem heh ate jabkhab pumma sâsiet ngale erediko joma sâsoan lahma Joban nâng koh eka,

²⁷ Atema are moeka pa Asâthem heh atedede nâng phangsên jebjeb - sâpoangpoang ngale achhih aho, ngek atek, ngale lihân chenjô achhih aho thangma kohritrãng moeka.

²⁸ Dela hehma mâmâ dede phoang nâng hunriieki rãngrãng mâmâ dede tangnyu nâng hunmin. Hen delama ate tangnyu nâng huneka erepa atedede nâng hunriieka.

²⁹ (Henmejô mâmâ dede phoangko chhihchoh riimah. Erenoma, Krista ma Asâthem heh khoakhem eka rãngrãng, nãngma mâmâ dede phoangpa phhekchhah heh kohlihma sûare lihma khoakhem eki;

³⁰ chenrãngma ngako nãngmin ate phoangko roam eki.)

³¹ Joban nyapraangma ngaeka, “Are junko dela pumma ate nyong awa phethien lahma ate tangnyu demko roamsong eka, ngale wanii pa watherãng dângmin.”

³² Joban nyapraang nâng patritli toangtang ngin tonga, erepa ngama Krista le Asâthem nâng thakthô ekang.

³³ Rohkomin erepa nenângmin thakthôeka: chentô tangwa hehma mâmâ tangnyu hehnâng mâmâ dede nâng hunriieki rãngrãng tuta hunmin, ngale chentô tangnyu hehmemin mâmâ dede tangwa heh nginkepkep dângmin.