IFISIEN 1 - NIEMNYAN Naga NT (BSI)

¹ Joban hungsi junko Jisu Krista moattat chhoante Pol ngewah- Ifisus wah Joban nâng putedâlemte, ngale Jisu Krista demnâng aroamma danglahma thin roandôngko toangtangma dângte hehnâng raangeka:

² Nãng Wa Joban ngale nãng Teso Jisu Krista ma nenâng mînchenchaan ngale mêmo chenkohhèn.

Krista ma Rangkoh

³ Joban ngale nãng Teso Jisu Krista Wa nâng dangkoh a ngae! Chenrãngma ngako Krista junma rangkhethung nâng atema nãngnâng rang kohehi.

⁴ Are hahtokkhoh hôan mama, Joban ma nãnga Krista demnâng aroamma danglihma aterãng dângrãng rênwah, erohwah nãnga ate mathahko Sâpoangpoang ngale chenjô achhih aho danglihma tôngmin. Atema hun achet junko

⁵ Joban ma nãnga Jisu Krista junma ate Chha dângthukrãng ama thuma thônghun wah - erepa ate hungma hunlahma moatwah.

⁶ Erohwah Joban ma nãngnâng nyahrãng mînchendong kohdi Joban nâng rôe, chenrãngma ngako atema nyahrãng ahun ate Chha demko nãngnâng hînhô pa thãhoma kohehi!

⁷ Chenrãngma ngako Krista hei junma nãngpap khenwah loatsiet ehi, ngale nãngpap heh mapkoh ehi. Joban mînchenchaan pa chentô dônga,

⁸ Joban ma tâthakli ledang dông kohehi! Erepa Joban ma ate hung khenwah buthi mongthem heh kohehi

⁹ Joban ma chenni themawa eka erepa moeka, ngale erepa Jisu Krista junma tamo lahma nãngnâng loatjetthuk ehi.

¹⁰ Ere themawa ekapa Joban ma sanpoat methang tahko emoa, erepa rangkhethung ngale hahtokkhoh wah atema tem atiak tahheh Krista khhepho khenko phangtang aroamma eroapsiet hûa.

¹¹ Chentôpa Joban hung arin ngale ate mongthem junma dangeka; ngale nãngmin Krista demko aroamma ate Chha dângrãngma ren ehi, chenrãngma ngako, erepa atema rangbeng hahbeng thuma chenroh themawa tah a erejunko jôba moeka.

¹² Erohwah, henhenma Krista nâng khebeng thôan putedâlem tih a, erehehma Joban nâng rô en!

¹³ Ngale chenthu nema khope kephok kohte linlin Nginkongsen pa chohtet a, ere phumma nemin Joban mihnyan lâdangtet. Nema Krista nâng putedâlem eken, ngale Joban pa ne Tângte ngama jetrãng atema toamsem tah Asâthôanju pa nenâng kohlahma mãnhôan ehèn.

¹⁴ Ju junma Joban ma atenâng putedâlemte mihnyan hehnâng kohrãng toamsem tahpa nãng memin echoh e, ngale erejunko Joban ma ate mihnyan heh linlinjô epesiet a ngama jeteka. Erohwah, nãngma atenâng rôlihma mîndong thuk e!

Pol Rangsoam

¹⁵ Are junko, chenthuma nema Teso Jisu nâng putedâlem letma, ngale chentô Joban nâng putedâlemte mihnyan hehnâng hun achhâ letma chohtat tekwah,

¹⁶ ngama nekhurãng Joban nâng dangkoh a ngatpa jekmek. Ngama rangsoam roakweih nekhu thônghunjû

¹⁷ ngale nãng Teso Jisu Krista Wa adongthôan Joban ma nenâng ate Ju chenkohhèn ngama rosep ekang, Juma nekhu jet ajien edangthuk hèn, ngale nenâng Joban ekhesok hèn, erohkoba nema ate ejet en.

¹⁸ Nema Joban wenphiak pa jienchoh kherãng nekhu hungrin chenlaang kohhèn ngama Joban nâng rosep ekang, erohkoba nema chenni nâng dâlemrãng atema rooehèn a erepa nema etajet en. Joban ma atenâng putedâlemte mihnyan hehnâng rangkohmin ngama toamsem tahpa chentô chhu a ngale chentôsên a,

¹⁹ ngale atenâng putedâlemte heh khenwah ate chaanma moeka pa chentô dônga. Nãng khenwah moeka chaanpa achaanthôan chaan pejôba

²⁰ ere chaanpa Joban ma Krista ritwah ngaksatsiet lahma rangkhethung nâng ate dekchah ngeko tôngwâng thukrãng keptah chaanpa jôba.

²¹ Enâng Krista ma rangkhethung wah pênte, chaan kepte, chaan ahang heh, ngale teso chentô heh noma adong danglahma pêneka; ngale are hahtokkhoh wahmin erediko adiwah hokmin hahtokkhoh kowah chentô adong heh nomemin Krista jôba adongthôan.

²² Joban ma chentôpa Krista dakhen ko thieneka, ngale Asâthem hehrãng atea chentô khohko adongthôan Teso dangthuk eka.

²³ Asâthem heh dangeka Krista phoang, ngale thinnâng Krista Ju tongeka, ngale atema jôba rongrup ngema chentô thenâng tongthuk eka.