HIBRU 9 - NIEMNYAN Naga NT (BSI)

Hahtokkhoh ngale Rangkhethung Rangsoam

¹ Amawah toamsem tahko rangsoam rãngmemin niemarang dângwah ngale mihnyan nyuchha ma hôanwah rangsoam thinthemin dângwah.

² Rangsoam the hôanwah, phumma khebeng thôan wah theko Asâthôan The ngatwah. Eretheko wentit pa toak rewah ngale erekowah khoangko Joban nâng phhekchhah pa taamkoh rewah.

³ Eredi dângthe wah khetma tãngtin eka lîenkowah rangsoam Thepa Nyahrang Asâthôan The dângwah.

⁴ Ere khenko kemwah hôanwah chaam dângwah, ere chaam ko wenthhek lahma atûmli heh tumthhekkoh rewah, ngale Toamsem Bâkoat pa phangtang kemma doaplahma dângwah, ngale ere khenko kemwah hôanlahma loak dângwah, ngale ere loak khenko mana sek lahma dângwah, erediko Aron menthun pa bãngchhong heh chhong relahma dângwah, ngale longkha khaniiko Joban wah Hôkum heh raang relahma dângwah.

⁵ Joban tonga ngama khesokrãng Bâkoat khohko Chirubim moangachaang heh raangapaang demnâng dang rewah, ngale chirubim hehma thin rangpa pap map kohthinthe khoko têmlahma dângwah. Rohkomin, athângheh chentôpa thiepthiep thôkoh sanpoat dangmah.

⁶ Ereheh aroh khoakhêm thienwah. Rangwo roakweih soam aroakte heh khebeng thôan wah theko hûlahma soam aroakte moatlempa chîmoat hokwah,

⁷ rohkomin soam aroakte adongthôanpa lolo akhenwah theko wãngeka, ngale atemin rangpâ ko ditthe loloba wãngeka. Soam aroakte pumma atedede rãng ngale mihnyan hehma lejet thangma pap moeka hehrãngma Joban nâng kohrãng hei kepwên eka.

⁸ Are heh aroh khoakhem eka junko Asâthôanju ma senthemthem thôkoh ehi, chenthu tôko khebeng thôan the kowah rangsoam Thepa tongeka, nãng Nyahrang Asâthôan Theko wângthin lempa malaang kohehi.

⁹ Are pumma thenep thejâwah sanpoat hehnâng thakthô eka. Are ngaeka pa soam aroak ngale ngem angah ma Joban nâng joapsoap junma rangsoamte mihnyan hung arin heh sensietmah,

¹⁰ chenrãngma ngako thinma, jokphhek chhah ngale lirup seksâsoan niemarang heh loloba moeka. Are niemarang heh phoangrãng loloba, ngale ereheh a Joban ma niemarang anyan hôngsiet mako lolo rãngba moatwah.

¹¹ Rohkomin Krista pa athâng hehwah nãngwah asenli hehrãng soam aroakte adongthôan danglahma lâkatha. Atema soam aroak eka rangsoam thepa adong ngale abâmbâm asen; erepa mihnyan dekma hôanwah rangsoam the dangmah, ngale erepa are hahtokkhoh rãngmin dangmah.

¹² Chenthu Krista ma rangsoam thepa dãnkhoam lahma Nyahrang Asâthôan Theko roantang roangjêng rãng rekthe lolo wãngtahko, atema soam aroak rãng kien ngale mân hei keplahma wãngho; erenoma, atedede hei keplahma nãngkhurãng roantang roanjêng khope pa tâchohwah.

¹³ Kien ngale mân hei erediko kienchha mânchha heh wennâng jêmthhekwah lâbu heh niemarang junko mihnyan chin heh khohnâng phuhkohwah, ngale erepumma thin a niemarang junko achin dangtah heh sâsietwah.

¹⁴ Phumma arepa toangtang medang ako, Krista hei pummajã chentôjah bâmsâsiet eka! Roantang roanjêng Ju junma atedede roandôngpa Joban nâng sâpoangpoang kohriieka. Ate hei pumma nãnghung arin heh ledangli niemarang hehwah esâsiet hi, erohkoba nãngma ahîn Joban nâng eta soamtôe.

¹⁵ Ere junkowah Krista ma toamsêm nyan pa hongsiet eka, erohwah henhen Joban ma rooeka, erehehma Joban ma toamsem tah roantang roanjêng rangpa ekepwak a. Arepa aroh tadanga, chenrãngma ngako, amawah toamsem tah junko mihnyan hehma kaamchhih molahma pap dangtah kowah Krista riilahma pesiet eka.

¹⁶ Henma komin ate ritdiko ate chhahkhem heh keprãng mihdemnâng kah mekhetmîn ako, ere chhahkhem kepte pumma atenâng kahkhette pa riitah ngama jetmêngmin,

¹⁷ chenrãngma ngako, atenâng kohte mihnyan pa ahînthu medang ako atema kahkhetmîn ekapa sekhota; ate ritdiko koba ere kahkhetmîn tahpa tâkepmin.

¹⁸ Erohwah khebengwah kahkhet mîntah pemin hei junma lolo jôba tâdangwah.

¹⁹ Khebengko, Mosa ma mihnyan hehnâng Niemarang kowah chentô Hôkum raangtah heh thôkoh wah. Erediko atema mân le kien hei heh jodemnâng sak lahma, Niemarang titab ngale mihnyan chentô nâng hisop bãngchhong ngale khetruchek keplahma hekwah.

²⁰ Atema ngatwah, “Are hei demko Joban ma toam anyan sem eka, ngale erepa nema keprãng Joban ma hôkum koh ehèn.”

²¹ Ererãngrãng Mosa memin rangsaom The Asâ ko ngale rangsoam ko kepthin chentô sêmmak hehnâng heima hekwah.

²² Linlinjô, Niemarang junko chentôpa heima jôba sâsietwah, ngale hei hôngsiet junma jôba pap hehmin map chohwah.

Krista Ritjunma Pap heh Sâsiet eka

²³ Ere chentôpa rangkhethung wah alinlin heh rãngrãng jôba, ngale eroh jôba sâsietmin. Rohkomin rangkhethung wah heh erenoma abâmbâm asen ma sâsiet eka.

²⁴ Chenrãngma ngako Krista a mihnyan nyuchha dekma hôanwah Asâthôan The nâng wâng dangmah, ere Asâthôan The pa rangkhethung wah alinlin The peba hehôan eka. Atea rangkhethung linlin nâng wãngeka, ngale enâng athângheh atea nãngrãngma Joban tâko tongeka.

²⁵ Jews heh soam aroakte adongthôan heh rangpâ roakweih Asâthôan Theko ngem agah hei keplahma wãngeka. Rohkomin Krista ma ate roandôngpa kohrãng rangkhethung nâng depdep wãngmah,

²⁶ eroh dângngako, atemin rang ahah hôanthu mejô butbut chêmrii lahma dângmin wah. Phumma, chentô rangkuh sanha hehrangma athôan sanpoat pa namhok phumma, atema roantang roangjêng rãng rekthe lolo kalahma, atedede roandôngpa kohlahma pap heh sâsiet kakoh ehi.

²⁷ Anga nga metkep rekru rit rêmin, ngale erediko Joban ma achhih asen pa erenhi.

²⁸ Ererãngrãng ajahthem mihnyan heh pap sâsiet kohrãng Krista ma atedede roandôngpa kohlahma ritwah. Phumma ate ademin rekthe engak kara, rohkomin erepa pap sâsietrãng dangmah, rohkomin ate bemlâte mihnyan heh papwah pêsietrãng engak kara.