HIBRU 7 - NIEMNYAN Naga NT (BSI)

Soam aroakte Melkizidik

¹ Are Melkizidik pa Salim diak Lowang dângwah, ngale Achoang thôanwah Joban nâng soam aroakte min dângwah. Abraham ma Lowang wabelii jienlahma ranwah ngakwângko, Melkizidik ma lemko chohmîn lahma atenâng rangkoh wah,

² ngale Abraham ma ran heh jienlahma chentô toantah hehwah atenâng thiak echhi kowah thiakthe kohwah. (Melkizidik khebeng mînpa “Toangtang Lowang” ngama dângwah; ngale atea Salim diak Lowang dâng phumma ate mînpa “Mêmo Lowang” ngamemîn wah.)

³ Melkizidik nyong awa, ngale ate te awi heh nginkong chenmin aho; ate chhat ngale rit nginkong hehmin aho. Atea Joban Chha rãngrãng; ngale atea roantang roangjêng rãng soam aroakte.

⁴ Erohwah nema sûtan en, atea chentô dông dângwah a. Abraham nãngte nãngwa adongthôan pummemin ran heh jienlahma chentô toantah hehwah atenâng thiakthe kohwah.

⁵ Ngale soam aroakte jat Livi chhuchha hehnâng Niemarang ma thin Isrial mihnyan hehwah thiakthe thârãng chienwah, erepa thindede mihnyan hehwah Abraham chhu achhajô medang akomin thiakthe pa thâthukwah.

⁶ Phumma Melkizidik pa Livi heh chhuchha dangmah, rohkomin atema Abraham wah thiak echhi kowah thiakthe thâwah, ngale Joban ma toamsem tahpa chohte mihnyan ko atema rangkoh wah.

⁷ Arepa chentôma jet, rangkohte pa jôba rangkepte noma adong.

⁸ Soam aroakte mihnyan hehma thiak echhi kowah thiakthe choh eka, eroh komin thinmin rit rewak eka; rohkomin Joban nyapraangma ngaeka, Melkizidik dangeka roantang roanjêng ahîn tôngte danglahma thiak echhi kowah thiakthe pa thaeka.

⁹ Ngale, chenthu Abraham ma Melkizidik nâng thiak echhi kowah thiakthe kohtahko, Livi jat (Thãkho chhahte chhuchha hehmemin thiak echhi kowah thiakthe) pa Melkizidik nâng koheka.

¹⁰ Chenrãngma ngako Livi pa ere thuko machha dângwah, rohkomin chenthu ate demnâng Melkizidik chohmîntah poatko ate te awa Abraham sekkhen nâng dângwah.

¹¹ Isrial mihnyan hehnâng Niemarang pa Livi jat heh soam aroakte dangthuk lahma kohwah. Phumma, Livi jat soam aroakte danglahma moeka moatlempa asen dângnomako, Melkizidik rãngrãng soam aroakte ahan lelem tumin dângwah, erepa Aron rãngrãng dangmah.

¹² Chenrãngma ngako chenthu soam aroakte pa melit ako, Niemarang hehmin alitre eka.

¹³ Ngale are ngin heh dangeka nãng Teso rãng jabeka, phumma atea jathan wah dângwah, ngale ate jatwah chenthumin soam aroakte mathat dangeka.

¹⁴ Arepa chentôma senthemthem jet, atea Juda jatwah hôngchhatwah; ngale chenthu Mosa ma soam aroakte dângrãngma jabtahko atema are jatkowah dângrãngma lepchhehho.

Melkizidik rãngrãng Ahan Soam aroakte

¹⁵ Ngale nima jabeki nginpa phenjaangjaang dangeka; Melkizidik rãngrãng soam aroate ahan hongeka.

¹⁶ Atea mihnyan nyuchha niemarang junko soam aroakte rãng dângthuk dangmah, rohkomin lethôanthin roandông chaan pumma dangthuk eka.

¹⁷ Chenrãngma ngako Joban nyapraangma ngaeka, “Nanga soam aroakte Melkizidik rãngrãng roantang roangjêng rãng soam aroakte dângmin.”

¹⁸ Erohwah niempã heh phetah, chenrãngma ngako ereheh achhih ngale sakhota.

¹⁹ Chenrãngma ngako Mosa Niemarang pumma chenjô senmomah. Ngale ade phumma dâlemthin asen kohehi, erejunko nãng Joban tânâng namhueki.

²⁰ Ereleko, Joban memin toamsem eka. Chenthu ahan heh soam aroakte dangthuk tahko, ererãngrãng toamsêm pa aho dângwah.

²¹ Rohkomin Joban ma atenâng toamsem lahma ngat junko Jisu soam aroakte rãng dangeka, “Teso ma toamsem eka ngale erepa chenthumin litjâmah: ‘Nanga roantang roangjêng rãng soam aroakte dângmin.’ ”

²² Erohwah, Jisu junma Joban ma toamsêm pa linlin asen dangeki.

²³ Ahânmin ajatjat wientonga: Soam aroakte ahânmin dângwah, rohkomin riilahma thin moatlempa talaang momah.

²⁴ Rohkomin Jisu a roantang roangjêng rãng ahîn, ngale atema soam aroakte moatlem moeka pa mihhân nâng dienmo thukmah.

²⁵ Ngale erohwah henhen ate junma Joban tânâng hûeka ereheh atema athâng hehmin ngale roantangma eta pesiet a, chenrãngma ngako atema Joban nâng thinrãngma roatsep kohrãng roantang roangjêng rãng hin eka.

²⁶ Erohwah Jisu a nãngma lem eki heh chohkohrãng Soam Aroakte Adongthôan. Atea Asâthôan; atenâng chenni achhihmin aho, ngale atenâng papmin aho; atea papi mihnyan heh demwah araangraang dangthuk eka ngale rangkho liennâng tongwãngthuk eka.

²⁷ Atea ahân soam aroakte adong heh rãngrãng dangmah; atema rangwo roakweih khebengko atedede paprãng bengjoap dikoba mihheh rãngma joapsoapkoh dangmah. Atema chenthu atedede roandông kohlahma rekthe joapsoaptah, ere rekthe joapsoap tahpa roantang roangjêng rãng joapsoap eka.

²⁸ Mosa Niemarang pumma mihnyan chhih hehmin soam aroakte adongrãng tâdâng thukwah; rohkomin Mosa Niemarang diko Joban ma ate Chhapa Soam Aroakte adong dangthuk lahma mihnyan heh demnâng toamsêm pa hôanwah, ngale ate jôba roantang roangjêng rãng nyahrãng asen dangthuk eka.