HIBRU 6 - NIEMNYAN Naga NT (BSI)

¹ Erohwah, nãngma khebeng thuwah Kristan nginkong chohtattih ngin heh thâmthômîn pa jeklihma Jisu Krista ngin asenli heh ajahjah jetrãng thonghun e. Ngale nãngma kaamchhih moatwah jeklihma Joban nâng putedâlem min;

² Baptijem kep ngin heh ngale dekma sahloat nungma rangsoam koh ngin; ngale ritte heh ngakhîn ngin erediko roantang roangjêng rãng rên ngin heh thômînpa ajekre e.

³ Erenoma nãngkhuma jet ajien ba toatmîn e! Ngale areheh dangeka, Joban ma memothuk hiko nãngma emoe.

⁴ Chenrãngma ngako, henma thin putedâlem pa thinphe eka, ere mihnyan heh hung chenroh jienngak litthukmin a? Thin a poattheko Joban wenphiak nâng dângwah; ngale thinma rangkhethung wah hînhô pemin lâthat jettah, erediko Asâthôan Jumin lâchohtah;

⁵ Thinma Joban jabkhab pa asen ngamemin lâjettah, ngale thinma ahokmin sanpoat kowah Joban chaan pemin jet eka.

⁶ Ngale eroh komin thinma thin putedâlem pa thinphe eka! Erohwah ere mihnyan heh hung ngaklitthuk lihma ngaksiethok pa chenthumin tadang tumah, chenrãngma ngako, thinma Joban Chha ngakrittek eka, ngale nok atang methahko rêsêthuk eka.

⁷ Roantang hahtokkhoh ko rangpat ma sânkat junko hah pumma rangpatti jokeka, ngale erehahpa henhenma khoakhem lahma khiet ali khiet eka ereheh khohko Joban ma rangkoh lahma khiet ali senthuk eka, ngale ere khiet ali pa khiet alite mihnyan rãngma asen dangeka.

⁸ Rohkomin ereko suhche chatroak ngale hin mehong phoak ako, erepa sekhota thã; ngale erehahko Joban ma tem athoak eka, ngale erepa wenma eroak phea.

⁹ Lemruchha heh, nima erohjô mejab ekomin, nima nenâng nyahrãng putedâlem eka. Ngale nima ajet nema kaamsen jôba emo en ngale kaamsen moat junko nekhomin pe eken.

¹⁰ Joban pa mothô khoanglep dangmah. Nema motet moatlem heh atema lekphemah, ngale nema atenâng hun achet junko atenâng putedâlemte hehnâng chohsûtet hehmin lekphemah, ngale athâng hehwah chohsû eken hehmin atema lekphemah.

¹¹ Nima ajahthem huneki pa nekhuma athôan kotuk Joban moatlempa rokhun rahhun dangletma chenmo en ngama huneka, erohkoba nekhuma dâlem letma bemla ekenpa linlin echoh en.

¹² Nima nekhua ajõ dâng hunmah, rohkomin putedâlem lahma hung tâmôngloatte dangen ngama huneka, ngale eroh moletma Joban ma toamsem tahpa choh en.

Joban Toamsem pa Linlin

¹³ Chenthu Joban ma Abraham demnâng toamsem tahko, atema chenni toamsem ekapa metkep moatrãngma châwah. Ate noma adong chenjô aho dâng phumma, atema atedede mîn keplahma toamsêm wah.

¹⁴ Atema ngatwah, “Ngama nangnâng rangkoh lihma chhuchha jahmõang edangthuk e, ngama toamsem ekang.”

¹⁵ Abraham ma hungmongsiet lahma bemwah, erohwah Joban ma chenni toamsem tah a epa atema chohwah.

¹⁶ Chenthu nãngma toamsem ko, nãngnoma chenni komin adongmîn keplihma rângsem e, ngale erepumma ba chentô chhiakmîn eka heh phensiet eka.

¹⁷ Joban ma toamsem ekapa henhenma chohmin a ereheh nâng Joban ma atema toamsem ekapa chenthumin litjâmah ngama senthemthem jetthuk huneka; erohwah atema toamsem lahma châwah.

¹⁸ Erohwah leta litjâthin jatnii tonga, ngale ere wannii rãngma Joban memin mothô thômah. Erohwah nãngkhu henhen ate demnâng khope choh ekia, erehehma hung dongdong danglihma nãng makowah thien kohehi dâlem ko rongtêngtêng lolihma tôngmin.

¹⁹ Nãng roandôngko ere dâlem pa tângbenthin phak rãngrãng kepeki. Ere putedâlem junma nãngkhu khope eki, ngale erepumma rangkhethung wah rangsoamhum kowah khet tângtin eka lienwah rangsoam thin asâthôan theko tãngbenwên eka.

²⁰ Melkizidik soam aroakte ma ngatah rãngrãng Jisu nãngrãngma nãngmako roantang roanjêng soam aroakte adongthôan dângrãng wãnglaeka.