HIBRU 5 - NIEMNYAN Naga NT (BSI)

¹ Chentô soam aroakte adongthôan pa mihnyan hehma thinlemru hehwah ren eka, ngale thin mînko Joban nâng soamtô, ngale joapsoap, erediko paprãngma joapsoap thuk eka.

² Phumma atedede ajahthem ngenâng achhih dâng phumma, henhen pa aba ngale kaamchhih moatte a ereheh demnâng loloba noapnene tadang eka.

³ Ngale atedede min achhih dâng phumma, atema mihnyan nyuchha heh pap rãnglolo lejoap lesoap kohmin, atedede pap rãngmemin joapsoap min.

⁴ Henmemin atedede hungsima soam aroakte adongthôanpa nga dangang ngama hunlahma tadangmah. Erepa Aron rootah rãngrãng - Joban ma roolahma jôba mihnyan pa soam aroakte adongthôan tâdangmin.

⁵ Ererãngrãng Krista memin atedede Soam aroakte adongthôan rãng dângwah dangmah. Erenoma Joban ma atenâng ngatwah, “Nanga Nga Chha; thejâ phumma Nga nang Wa lâdangtek.”

⁶ Atema thehan nângmin ngatwah, “Nanga roantang roangjêng rãng soam aroakte dângmin, erepa soam aroakte adongthôan Melkizidik ma ngatwah.”

⁷ Jisu ma ate roandôngpa are hahtokkhoh ko dângpoatko ate ritwah tâpesiette Joban nâng mitphi demnâng nyahrãng raksep lahma rangsoam nungma roatsep wah. Chenrãngma ngako atea numnene ngale nyahrãng hung kohlahma soamdi Joban ma ate rangsoam pa tatwah.

⁸ Phumma atea Joban Chhajô medang akomin, atema chêm junko Joban nginkepkep dângpa hewah.

⁹ Chenthu atea chentô noma asenthôan dângthuk phumma, ate ngin kepte chentô mihnyan hehnâng atema roantang roanjêng khope pa koheka,

¹⁰ ngale Melkizidik soam aroakte ma ngatah rãngrãng Joban ma atea soam aroakte adongthôan ngaeka.

Putedâlem wah Jekte hehnâng Ritngat

¹¹ Are heh junma nima ajahthem thôkohthin tonga, rohkomin erepa nenâng thôkohrãng nyahrãng alat, chenrãngma ngako ereheh nema tajetlomet.

¹² Nea athângheh phumma ahethôte lândangroh dângmin wah - rohkomin nema athâng hehmin khebeng thôan Joban nginkongpa nenâng hethôte lemeken. Nema phhekchhah cheh akâng heh phhekchhah thiek pa athângheh min nyuhpoti lekjok eken.

¹³ Henma akomin nyuhpoti jok eka erepa naajeng chhathu, chenpa chhih a ngale chenpa asen a erepemin jetmah.

¹⁴ Phumma phhekchhah cheh akâng heh dangeka phannang hehma phhekchhah eka, ngale erehehma chenpa chhih a ngale chenpa asen a erepemin jienjetlo wakeka.