HIBRU 12 - NIEMNYAN Naga NT (BSI)

Joban pa nãng Wa

¹ Nãngkhu rãngma putedâlem ngenâng nãng tumlitko hâkhi hôante mihnyan jahmõang tonga. Erohwah, nãnglem kowah tengbeng thukthin chentôpa rephe e, ngale nãng lephongthuk thangma tângsiette pap hehmin rephe e, ngale nãngma wah nãngrãng thienkoh ehi toatchhoan mîn pa nyahrãng hung arin kohlihma toatchhoan mîn e.

² Nãng mitma Jisu nâng thongthong sûlihma tonge, chenrãngma ngako khebengma danglahma athôan kotuk atema jôba nãng putedâlem pa senthemthem dangthuk ehi. Atea bãngphak khohko rittekrit ran cheiho! Erenoma, Joban ma ate mawah khuhah nâhah thienkoh ekapa thonghun lahma bãngphak khohko rêsê rephe rittekrit pa chenjô dangmah ngama thônghun wah, ngale erohwah atea athângheh Joban tôngthin dekchah ngeko tongeka.

³ Thatthong hun tan en atema chentô chêmchoh tahpa; papi mihnyan hehma atenâng chentô mitchektah a! Erohwah nedede min hungchha rinchha nekdangen ngale ne putedâlem pa nekjek en.

⁴ Chenrãngma ngako, nea papwah pechhoanrãng pap demko ranloatmîn wah rãngrãng loatmîn eken, eroh akomin nea ritlinlin marii eken.

⁵ Joban ma ate chhuchha rãngrãng thonghun lahma ate jabkhab junma nenâng rîn akhah then heh lekphetet ne? “Echha heh, chenthu Teso ma nenâng phheksiet nâsiet mehôan hènko atatre en, ngale chenthu atema nenâng ritngat mere hènko nehung nekke en.

⁶ Chenrãngma ngako, Teso ma hennâng huneka ehehnâng phheksiet nâsiet hôaneka, ngale atema henpa ate chharãng kepeka ehehnâng phheksiet nâsiet hôaneka.”

⁷ Nema chenni chêmchei choh eken a ereko Wama phheksiet nâsiet hôan ehang ngama thonghun letma tha en; nema chêmchoh junko Joban ma nea ate chha rãngrãng kep ehèn ngama jeteka. Henchhu henchha komin ate Wama phheksiet nâsiet lehôan thienlahma tonga?

⁸ Nemin ate chha ahan heh hôaneka rãngrãng phheksiet nâsiet lehôan medang hènko, nea ate chha linlin dangmet, nea pâmchha.

⁹ Nãng mihnyan nyuchha hei angem wa memin nãngnâng phheksiet nâsiet hôan ehi, ngale nãngma thin ngin kepeki. Eroh medang ako, nãngju rãngma Wa ranjã chentô bâmcheimin a!

¹⁰ Nãng mihnyan nyuchha nyong awa hehma sanpoat chuthe rãngchha ba phheksiet nâsiet hôan ehi, ngale erepa thinma asen ngama thonghun lahma hôan ehi; rohkomin Joban ma nãngdede rãng sênrãngma hôan ehi, erepa ate ngewah Asâthôan demko johrûrãng hôan ehi.

¹¹ Chenthu nãngnâng phheksiet nâsiet mehôan hiko, ere sanpoat pa nãngrãngma khuhahthin ledang hungkeli dangeka. Eroh komin khediko, henhennâng phheksiet nâsiet hôan lahma punsiet eka erehehma mêmo ngale toangtang roandôngpa choh eka.

Rîn akhah ngale Ritngat

¹² Erohwah, nedek joakjâre ekepa laangen, ngale ne dakuh tiiekapa rõngsiet en!

¹³ Lemtin pummejû khoam en, erohkoba dachhihte heh dapa chhihjâ lere thangma asên erea.

¹⁴ Chentô demnâng mêmo dângrãng thonghun en, ngale roandôngko Asâma dângrãng thonghun en, chenrãngma ngako, eroh ledang kako henmemin Teso leta chohkhemin.

¹⁵ Jetletma dangen, henjô Joban mînchenchaan lechoh nekchen dangeken. Ngale bãngkhah hongphoak lahma ate bii pumma bãnghan heh rângchêmsiet arãngrãng newah mihnyan chhih nekhong en.

¹⁶ Ngale Isau rãngrãng dihiak dela kaamchhih moatte erediko Joban nâng lepute dâlemte nekchen hongeken, atema phhekchhah hatthe nâng atea khhepho chha dengpa sengchhahwah.

¹⁷ Nema ajet khediko atema ate wa ngewah rangkeprãng hunwah; rohkomin atema erepa chohho, chenrãngma ngako, atema chenni motah a erepa ngaklitsiet rãng chenni lemkhôjô ahotu dângwah, atema mitphi demnângjô methat latrii akomin talitjâ tuho.

¹⁸ Nea Isrial mihnyan heh wãngtah rãngrãng dekma jiensahloatli Sinai hahho kowah wendô dong, phoambuk nyektungtung, ngale pôngdong patdong thenâng wâng dangmet,

¹⁹ ngale poakpo rahmette, erediko jabkhab tatthin thenâng wâng dangmet. Chenthu mihnyan hehma jabkhab tattahko, thinma ererãngrãng ahan nekchen tattueki ngama roatsep wah,

²⁰ chenrãngma ngako, “Ngem angah mejômin are hahkongko mesahtiet ako erepa longma ritpetmin” ngama ngaeka jabkhab pa thinma chintat ho.

²¹ Erethepa nyahrãng cheili dângwah, ngale Mosa memin ngatwah, “Nga a nyahrãng tiichei ekang!”

²² Phumma nea Zion Hahkong nâng wãngeren, ngale ahîn Joban sôngthin Hahnâng wãngeren, rangkhethung wah Jeroselem nâng wãngeren, ere Theko ate ngintatte heh hahjat jatma tonga.

²³ Nea Joban rãngma khhephochha heh khuhah nâhah khôantôngthin thenâng wãngeren, ere mihnyan hehmînpa rangkhethung nâng raangthien lahma tonga. Nea chentô mihnyan nyuchha heh achhih asen rênte Joban tânâng hûeren, ngale mihnyansen heh Ju sênsiette Joban tânâng hûeren.

²⁴ Nea Joban le mihnyan tungko toamsem anyan hôante Jisu tânâng hûeren, ngale Abel hei pumma hongjabtah noma atewah hongeka hei pumma bâmbâm asen hôngjabte tânâng hûeren.

²⁵ Erohwah jetletma dangen, ngale ere hôngjabte ngin letat nekdangen. Henhenma rangkhethung wah Joban ngin are hahtokkhoh ko thôkohte heh nginlekep dangeka ere mihnyan heh henmin leta pemin. Eroh medang ako, nãngma rangkhethung ma hahtokkhoh ko jabkatte ngin lekep medang eko chenroh jienpemin a!

²⁶ Ere sanpoatko ate jabkhab roat pumma hahtokkhoh pa ephongsiet a, rohkomin, athângheh atema toamsem eka, “Ngama ade rektheko hahtokkhoh pelolo ledang rangkhethung min ejoh phongsiet ang.”

²⁷ “Ade rekthe” ngaeka jabkhab junko chentô hôantah heh phangtang phongsiet lahma echhihsiet a, erohkoba leta phongsietthin heh ba lechhihsiet etonga.

²⁸ Erohwah nãngma dangkoh a ngae, chenrãngma ngako, nãngma leta phongsietthin Hahsông choheki. Ngale nãngma Joban ngin keplihma ate ranchei nungma nãnghung nâng khuhah nâhah danglihma Joban nâng soamtô min;

²⁹ chenrãngma ngako, nãng Joban pa linlinjô ajemkhâm wen.