HIBRU 11 - NIEMNYAN Naga NT (BSI)

Putedâlem

¹ Putedâlem pa nãngma metkep chohmin ngama dâlem ekiko ngaeki, ngale ere putedâlem pa nãng mitma lekheko metkep echoh e ngama dâlem ekiko ngaeka.

² Tewa rôanpã wah mihnyan hehnâng thinwah putedâlem junko Joban ma sênchohwah.

³ Nãngma Putedâlem junko are hahtokkhoh pa Joban Jabkhab ma hôanwah ngama jeteka, erohwah nãng mitma chenni khe ekia ere chhahkhem heh mitma lejien khethinwah hôanwah.

⁴ Putedâlem junma Joban nâng Abel ma Ken noma asen joapsoap wah. Ngale ate putedâlem junma Joban ma atenâng toangtang ngatwah, chenrãngma ngako, atema Joban nâng hînhô kohtah pa Joban ma asen ngatwah. Atea riichoan medang akomin, ate putedâlem junma Abel ma athâng hehmin jabeka.

⁵ Putedâlem junma Inok lerii thangma dângwah. Ngale atea Joban tânâng tôansietwên lahma henmemin ate chohkheho, chenrãngma ngako, atea Joban ma rangkhethung nâng tôansietwên wah. Joban nyapraangma ngaeka, Inok rangkhethung nâng tôansietwên mako, atema Joban rinmê thukwah.

⁶ Henmemin putedâlem aho thangma Joban rin leta methukmin, chenrãngma ngako, henhen Joban tânâng hûeka erehehma Joban pa tonga, ngale ate lêmte hehnâng Joban ma thã kohmin ngama putedâlem min.

⁷ Putedâlem junma Noa ma atenâng Joban ma khedi wah dângwâng ngin thôkotah heh ate mitma lekhejô medang akomin Noa ma putedâlem wah. Atema Joban ngin keplahma Noa ma khôankho hôanwah, ere khôankhoko ate ngale ate humte tangkâ heh pewah. Phumma hahtokkhoh pa chhihsiet rewah, rohkomin, putedâlem junma Noa nâng Joban ma toangtang thôan ngatwah.

⁸ Putedâlem junma Abraham ma Joban ngin keplahma Joban ma atenâng kohrãng toamsem tah Diak ko wângrãng Joban ma rooko Abraham chhoanwah. Atema chennge nâng chhoan ekanga ere pejô lejetthangma ate Diak pa phethien lahma chhoanwah.

⁹ Joban ma atenâng kohrãng toamsem tah Diak ko putedâlem junma mihwun rãngrãng danglahma sôngtôngwah. Ngale Isak le Jakob nii rãngrãng atemin tembu humnâng songwah, ngale Joban ma mãnthe toampa sêmwah.

¹⁰ Chenrãngma ngako Joban ma thak amak lahma hôantah hahdaang pa Abraham ma bemwah, ngale ere hahdaang pa chenthumin leta chhihjâ thin hahdaang.

¹¹ Abraham nyahrãng teka dangchoanjô medang akomin ngale Sara min chhaho jatjô medang akomin putedâlem junma Abraham a wa rãng tâdângwah. Ate ma Joban toamsem pa chenthujô themah ngama putedâlem demnâng dângwah.

¹² Abraham nyahrãng teka dângjunko riichoan thãthãjô medang akomin, are wathe mihnyan junma ate chhuchha heh rangkho wah merit jahtô, ngale jophawah leta roakweihli phihchha jahtô jat apat eka.

¹³ Are mihnyan hehma marii riiko putedâlem lahma tôngwah. Thinma Joban ma toamsem tahpa chohho, rohkomin thinma ataangma khelahma khuhah nâhah dângwah, ngale nima are hahtokkhoh ko mihwun ngale hum ahah hote ngama thindedema loatjabwah.

¹⁴ Ere mihnyan hehma aroh loatjab junko thindede rãngma diak han lemeka ngama jeteka.

¹⁵ Thinma phethien retah diakko thamngak thonghun tuho; thinma erepa thâmngak thonghun ngako, ngakkat chenre waktah.

¹⁶ Rohkomin, thinma erenoma bâmbâm sen hahdaang pa lêmwah, erepa rangkhethung wah hahdaang pa lemwak eka. Ngale erohwah, Joban ma atea thin Joban ngama ngatrãng rêsêmah, chenrãngma ngako atema thinrãng hahdaang pa khoakhemkoh eka.

¹⁷ Chenthu Joban ma Abraham putedâlem pa jetrãng Abraham nâng nangchha Isak pa ritphe lohma Nganâng soam aroak hang ngatahko, Abraham ma putedâlem junko ate chha Isak pa ritpherãng phungwah. Abraham demnâng Joban ma toamsêm wah, rohkomin, Abraham ma ate chha wathelolo pemin ritphe lahma Joban nâng soam aroak rãng chepwah.

¹⁸ Joban ma atenâng ngatwah, “Ngama nangnâng chhuchha kohrãng toamsemtih heh Isak junma echoh o.”

¹⁹ Joban ma mihnyan heh ritwah tangakhinsiet a ngama Abraham ma putedâlem wah - ngale, linlinjô, Abraham ma Isak leritphe dangeka pa, Isak ritwah ngakhînsiet wah rãngrãng dangeka.

²⁰ Putedâlem junma Isak ma Jakob le Isau nii roandôngko rangkohrãng toamsêm wah.

²¹ Ngale putedâlem junma Jakob ma ate ritmako Josep chha hehnâng rangkoh wah. Ngale Jakob ma ate menthun rako naajup lahma atema Joban nâng rangsoam wah.

²² Putedâlem junma Josep ma ate ritthângko Isrial mihnyan heh Igip wah loatchhoan wah ngin heh thôko lahma, ate ritdiko ate phoangpa chenroh rêmin a erepemin thôthien kohwah.

²³ Putedâlem junma Mosa chhat diko ate nyong awa hehma jengrem huhriem lahma thienwah. Thinma atea nyahrãng naasen khewah, ngale thinma Lowang ngin dânran lechei dângwah.

²⁴ Putedâlem junma Mosa ma ate hôngdông diko Nga a Wangcha chha ngama ngat lehun dângwah.

²⁵ Atema sanpoat poatthe chharãng pap demnâng khuhah nâhah tôngnoma atema Joban mihnyan heh demnâng johchêm peba hunwah.

²⁶ Atema Igip wah chentô chhahkhem le ngun akem heh noma Misaia rãng chêmchoh peba asen ngama hunwah, chenrãngma ngako, atema khedi wah rangkep pa adong thônghun wah.

²⁷ Putedâlem junma Lowang rinkhahran lechei thangma Mosa Igip wah loatchhoan wah. Atema mitma lekhe Joban pa khe eka lele danglahma Igip nâng ngakwâng rãng lenyoak dângwah.

²⁸ Putedâlem junko atema Adankhoam lokuh pa kuhwah ngale hei pa kâsekko hutrãng chienwah, erohkoba rangkhethung wah mihritphêrãng Joban ngintatte hehma Isrial mihnyan heh humkâwah khhepho chha heh leritphe dângwah.

²⁹ Putedâlem junma Isrial mihnyan hehma Josi Chek pa hahran khohma dânkhoam wah rãngrãng dânkhoam wah; phumma chenthu Igip mihnyan hehma eroh dânkhoam rãng ngatko Josi pumma phangtang phophewah.

³⁰ Putedâlem junko Isrial mihnyan hehma Jeriko pantumlit jâengit tûmkhoam diko runjâwah.

³¹ Putedâlem junko dihiaknyu phoangseng chhahte Rahab pa Joban ngin lekepte heh demnâng lejoh ritphewah, chenrãngma ngako, atema Isrial mihnyan huh jejette chienwêntah heh ate humko tôngthukwah.

³² Ngama ademin ahan thakthôkoh a? Rohkomin nenâng Gidion, Barak, Samson, Jepthat, Devit, Samoel, ngale mõngheh ngin thôkohrãng sanpoat aho.

³³ Putedâlem junma thinma diaktang demnâng ranloatmîn lahma jienwah. Thinma chenpa toangtanga erepa molahma Joban ma toamsem tahpa chohwah. Thinma Sahdong hinhoo thunkâmin tâtâng hepwah,

³⁴ nyahrãng cheili wendô hehmin tâmutsiet wah, ngale dengma ritdoak rãng ngatwah min pêwak wah. Thin a lonien dângwah, rohkomin lochaan hôngdâng wah; ngale thin a ranloatmîn poatko lochaan hongdang lahma mihdiak sipâhi heh jienwah.

³⁵ Dihiaknyu heh Putedâlem junma thinhumte tangkâ heh riichoanwah ngakhîn wah. Khuka hehma dangeka, asenma thînphea ngat komin hunmah, chenrãngma ngako thinma chêmchei demnâng riilahma khediko roandôngsen danglahma ngakhîn peba hunwah.

³⁶ Khuka hehnâng dûmmek lahma buh awat wah, ngale khuka heh janruma khhek lahma phâtek nâng sekwah.

³⁷ Thin a longma ritpet rewah, ngale khanii korãng khadoak rewah, thin a dãngma ritdoak rewah. Thinma saakkhoan le kienkhoan heh khetrãng keplahma dângwah - tangchhih dângwah, ngale thinnâng chêmsietmin rewah, ngale hôanjôan rewah.

³⁸ Hahtokkhoh pa thinrãngma lesen dângwah! Thin a hum ahah ahote rãngrãng sehah ngale hahkong hahla jêngjêng nâng phôangkhôam wah, ngale longken le hahkenkhen hehnâng phôangsông wah.

³⁹ Are chentô mihnyan heh thin putedâlem junko jet eki! rohkomin Joban ma chenni toamsem tah a erepa thinma chohmah,

⁴⁰ chenrãngma ngako, Joban ma nãngrãngma nyahrãng asen themawa koh ehi. Atema themawa ekapa thinmin nãngdemnâng aroam lahma meba tâsâmin.