HIBRU 1 - NIEMNYAN Naga NT (BSI)

Joban Jabkhab pa Ate Chha junma Jab eka

¹ Amako Joban ma nãngte nãngwa hehnâng mõng heh junma melengdep ngale meleng lemkhô ngema chohjabwah,

² rohkomin athôan sanpoatko atema nãngkhu nâng ate Chha junma chohjab ehi. Ate junma Joban ma rangkhen pa hôanwah, ngale atema athôanko chentôpa chohrãng Joban ma ren eka.

³ Joban mîndong lahma phiak ekapa atenâng chohkhe eki, ngale atea alinlin Joban rãngrãng, ngale ate jabkhab chaan pumma rangkhen pa roieka. Chentô mihnyan nyuchha heh pap rãngma map thâkoh diko, chentô noma achaanthôan Joban dekchah ngeko rangkhethung nâng tongwãng eka.

Joban Chhapa Adongthôan

⁴ Rangkhethung wah Joban ngintatte chentô nomemin Joban ma ate Chhapa adong dangthuk eka, ngale Joban ma atenâng koheka mîn pemin thin noma adong koheka.

⁵ Chenrãngma ngako Joban ma ate ngintatte hehnâng hennângjô aroh ngamah, “Nanga Nga Chha; thejâ phumma Nga nang Wa lâdangtek.” Roh akole Joban ma rangwah Joban ngintatte hennâng thatngatah a, “Nga ate Wa edangang, ngale atea Nga Chha dângmin.”

⁶ Rohkomin chenthu Joban ma ate Chha khhepho pa hahtokkhoh nâng chienkat rãng ngatko, atema ngatwah, “Chentô rangwah Joban ngintatte hehma atenâng soamtô min.”

⁷ Rohkomin ngintatte hehrãng Joban ma ngatwah, “Joban ma ate ngintatte heh pông rãngrãng hôaneka, ngale ate haaheh wendô rãngrãng hôaneka.”

⁸ Rohkomin Joban ma Chha rãngma aroh ngatwah: “O Joban, nang Hahsông pa roantang roanjêng rãngma etonga! Nangma nang mihnyan heh khoko toangtangma pên eko.

⁹ Nangma chenpa toangtanga ereko hun eko, ngale chenpa achhih a ereko chinnya eko. Erohwah Joban, nang Joban ma ren eho ngale dongsiet lahma khuhahthuk ehopa nang demkowah hehnâng koheka nomemin abâmbâm dong koh eho.”

¹⁰ Atema arohmin ngatwah, “Teso, nangma khebeng khoko hahtokkhoh pa benghôanwah, ngale nangdede dekma rangkhethung pemin hôanwah.

¹¹ Ereheh amahjâ erea, rohkomin nanga lemahjâ min; ereheh phangtang khet akhu chhihjâ rãngrãng ethôan chhihjâa.

¹² Nangma ereheh kut nuhthien wah rãngrãng enuhthien o, ngale khet akhu litwah rãngrãng elit o. Rohkomin nanga roantangma mãnthejû dângmin, ngale nang roandôngpa chenthumin lethôanmin.”

¹³ Joban ma rangwah ate ngintatte wathe nângjô aroh ngaho: “Are Nga dekchah ngeko tongo Ngama nangran heh nang daphâ khenko danek thinrãng mahôan hôankoh kiko.”

¹⁴ Eroh medang ako, ngintatte heh chennia? Thin a Joban nâng soam atôteju, ngale Joban ma khope chohte mihnyan hehnâng chohsokrãng chienkat era.