GALATIEN 6 - NIEMNYAN Naga NT (BSI)

Wathema Wathe Chêmchei ko Chohsûmîn en

¹ Ngalemruchha heh, hen akomin nema kaamchhih molahma mechohkhe enko, nekhuwah henhenma Joban senthemthem jette tongen a erehehma kaamchhih moatte pa punsiet en; rohkomin erepa nema hungnoap rinnoap dangletma mo en. Ngale nedede min jetletma dangen, erohkoba nemin achhih ma hung letoan edanghèn.

² Wathema wathe chêmchei ko chohsûmîn en, ngale erohko jôba nema Krista niemarang pa kep eken.

³ Henma komin atea sekhota mihnyan danglahma, ngamin wathe alemli mihnyan jôba ngama thonghunrii eka, erepumma ate dedeba diapchhahrii eka.

⁴ Anga ngama mâmâ dede moatlem pa bengsokrit mêngmin. Asen medang ako, nema chenni motet a erepa tarângthô en, rohkomin erepa mihhan hehma chenroh moeka ereheh nâng lethakmîn min.

⁵ Chenrãngma ngako nekhu anga ngama mâmâ dede hên peba hênmin.

⁶ Nenâng Kristan nginkongpa mehethô hènko, nema chenni asenli chei eken a ereheh nenâng hethôte demko aroamma kepen.

⁷ Nedede nekdiap chhahrii en; henmemin Joban tadiap chhahmah. Nema chenni bãng khiet eken a ere bãngri pejôba echohpun en.

⁸ Nema hei angem hung arinma huneka junko memo enko, erekowah nema roantang roangjêng rãng arit echoh en; rohkomin nema Joban Juma huneka junko memo enko, nema roantang roanjêng ahîn roandông echoh en.

⁹ Erohwah kaamsen moatnâng nekboan eki; chenrãngma ngako nãngma lejek thangma memo eko, erethã roantang roanjêng khope choh sanpoat pa ehûra.

¹⁰ Erohwah, nãngma sanpoat chohroakweih, anga ngarãng asenli moatlem moatmin, ajahthem pa nãngkhu demwah putedâlemte hehrãng asenlipa moatmin.

Athôan Rîn akhah ngale Salem

¹¹ Sûtan en, athâng hehwah ngadede dekma nenâng raangeka sitipa chentô dong raangeka!

¹² Nenâng khoankhen Niem pa hôanmin jôba ngama metkep khetloatte mihnyan hehma rangkhohkhoan moatlem heh lolo khesok lahma rângthô riiwak eka. Thinma eroh moeka pa, Krista bãngphak junma nekchen chêmthuk ehi ngama moeka.

¹³ Ere khoankhen niem hôante mihnyan hehmemin Niemarang pa kepmah; thinma nenâng khetlo ehènpa nememin phoangnâng khoankhen niem pa hôan eken jôba ngama thinma jienrângthô rãngba chien ehèn.

¹⁴ Rohkomin, Nga dangekang, Ngama Jisu Krista bãngphak pa lolo jôba erângthô ang; chenrãngma ngako, ate bãngphak junma are hahtokkhoh pa ngarãngma riichoan rãngrãng dangeka, ngale Ngamin hahtokkhoh rãngma riichoan rãngrãng dangekang.

¹⁵ Khoankhen niem pa mehôan ekomin ba lehôan kikomin erepa chenjô dangmah; rohkomin Joban jetlihma mihnyan nyanrãng litdâng peba huneka.

¹⁶ Henhenma thin roandôngko are niemarang heh junko songeka, ereheh demnâng mêmo ngale Joban mînchen chentonga - thin demnâng min ngale chentô Joban putedâlemte heh demnâng min chentonga!

¹⁷ Athôanko dangeka: henmemin nganâng nekchen chêmthuk tuwak ehang, chenrãngma ngako, ngaphoang wah chentô buhawat man hehma nga a Jisu haa ngama khesok eka.

¹⁸ Ngalemruchha heh, nãng Teso Jisu Krista mînchenchaan pa nekhu phangtang demnâng chentonghèn. Amen.