GALATIEN 3 - NIEMNYAN Naga NT (BSI)

Niemarang ngale Putedâlem a

¹ Aba Galatien heh! Nea henma moksiet ehèn a? Nedede mitma Jisu Krista bãngphak khoko rittek pa senthemthem khetet!

² Nganâng are khapthe nginpa thôkoh tanha: Nema Joban Jupa Niemarang junko moletma chohtet ale, Nginkongsen pa chohtat letma ereko putedâlem phumma chohtet a?

³ Ne chenrohma aretô jienba eken a! Nema Joban Juchaan ma bengmotet moatlempa; ade phumma nedede chaanma râmoe ngama lethonghun eken a?

⁴ Nginkongsen rãngma nema atô chêmchoh tetpa mahto nâng lechêm eken a? Mahtonâng chinchin chêm dangmah!

⁵ Nema Niemarang ma chenni huneka erepa moatdi Joban ma ate Jupa lekohthen a, ngale patritli moatlempa nekhu tânâng lemo kohthen a, roh akole, nema Nginkongsen pa chohtat letma putedâlemdi kohthen a?

⁶ Abraham nâng thatthong hun tan en; Joban nyapraangma ngaeka, “Atema Joban nâng putedâlem wah, ngale atema Joban nâng putedâlemdi, Joban ma ate demnâng toangtang thôan ngama tâdâng thukwah.”

⁷ Erohwah, nema arepa jet en, putedâlem win mihnyan heh ba Abraham chhuchha linlinpa.

⁸ Joban ma Jews ledangte heh ate demnâng putedâlem junko toangtang dângthukmin ngama Joban nyapraangma amathuma thôwah. Ngale Joban nyapraang pumma Abraham nâng Nginkongsen pa thôkoh wah: “Nang junma Joban ma chentô mihnyan nyuchha hehnâng rangkohmin ngama ngatwah.”

⁹ Abraham ma Joban nâng putedâlemdi Joban ma atenâng rangkoh wah; erohwah, putedâlemte chentôma Abraham ma rangkeptah rãngrãng kepmin.

¹⁰ Henhenma Niemarang pa keplahma Niemarang ko dâlem eka erehehma Joban wah têm athoak chohmin. Chenrãngma ngako, Joban nyapraangma ngaeka, “Henhenma Niemarang titab kowah chentô raangthien eka heh roantangma lekep medang ako erehehma Joban wah têm athoak chohmin!”

¹¹ Ade phumma senthemthem lajettih henmin Niemarang junma Joban demnâng toangtang tadangmah, chenrãngma ngako, Joban nyapraangma ngaeka, “Henhen pa putedâlem junma Joban demnâng toangtang dangeka ereheh ba hînmin.”

¹² Rohkomin Niemarang pa putedâlem demko chenni roamthinjô aho. Erenoma, Joban nyapraangma ngaeka, “Henhenma Niemarang ma chenni huneka erepa moeka ereheh ba hînmin.”

¹³ Rohkomin, Niemarang pumma têm athoak kephû erako, Krista ma nãngkhu litko tem athoakrii lahma nãngkhu pesiet ehi; Chenrãngma ngako Joban nyapraangma ngaeka, “Hen akomin bãngphak khoko rittek eka, erepumma Joban wah têm athoak choh eka.”

¹⁴ Krista ma are moeka pa, Joban ma Abraham nâng rangkohrãng toamsem tahpa Jisu Krista ritjunma Jews ledangte hehnâng kohrãng moatwah, erohwah, putedâlem junma nãngma Joban ma Ju kohrãng toamsem tahpa choheki.

Niemarang ngale Toamsêm

¹⁵ Ngalemruchha heh, Ngama jengre wah nginthakthô demnâng thôkoh a: Chenthu mihnyan wanii nginthunjut lahma chenni rãng akomin sûhi mehôan ako, erepa henmemin leta jeksietmin, ngale ereko henmemin leta lêboatmin.

¹⁶ Joban ma Abraham ngale ate chhuchha hehnâng toamsêm wah. Joban nyapraangma “chhuchha heh” ngama ajahnâng ngamah, rohkomin, wathe nâng lolo “Chhuchha” ngama ngatwah, erepa Krista nâng ngatwah.

¹⁷ Ngama ngaekang pa dangeka, Joban ma Abraham demnâng kahkhet mînwah ngale erepa chenthumin leta litjâmin ngama toamsêm wah. Niemarang pa châbelii roakrem rangpâ dinângba kohwah, phumma erepumma Joban ma kahkhet tahpa chenthumin tajeksietmah, ngale Joban ma toamsem tahpa talitsietmah.

¹⁸ Joban ma toamsem tahpa Niemarang junko kohmin ngama medang ako, atema toamsem ekako khalihma dâlemthin aho, atema toamsem eka junma choh dangmih. Phumma chenrohjô medang akomin, Joban ma ate toamsem junma jôba Abraham nâng thãhoma rangkoh wah.

¹⁹ Eroh medang ako Niemarang pa chenrãngma kohwah a? Erepa mihnyan hehma kaamchhih moeka pa khesokrãng kohwah, ngale erepa Joban ma Abraham chhuchha rãngma toamsem tahpa kat sanpoat tôkorãng kohwah. Ere Niemarang pa rangkhethung wah Joban ngintatte hehma mihnyan nyuchha le Joban tungko ngin mêthôte mihnyan wathe keplahma chohkoh wah.

²⁰ Roh-komin chenthu wathelolo nâng medang ako atung kowah ngin mêthôte pa lemmah; phumma Joban pa wathelolo jôba.

Niemarang pa Chenrãng Lem ekia

²¹ Are junko medang ako Niemarang pa Joban ma toamsem eka lelatnâng dangeka? Erohmin chenthujô dangmah! Chenrãngma ngako, mihnyan nyuchha ma chohtah niemarang pumma roandông mekephûra ko, ere niemarang pa kep junma chentôpa Joban demnâng toangtang tâdângmin.

²² Rohkomin Joban nyapraangma ngaeka, hahtokkhoh phangtang pap khennâng thieneka; ngale erohwah, Jisu Krista nâng putedâlem junma kohrãng Joban ma toamsem tahpa, henhenma Jisu Krista nâng putedâlem eka ereheh nâng koheka.

²³ Rohkomin putedâlem sanpoat pa hokmako, Niemarang pumma putedâlem loatkhesok sanpoat pa mahûhûko nãngkhu phangtang phâtek nâng sekwah rãngrãng tengsek thienwah.

²⁴ Ngale erohwah Krista katmako Niemarang pa nãngkhu Krista tânâng hoksênte dângwah, ere junkowah putedâlem junma nãngkhu Joban demnâng toangtang dangthuk ehi.

²⁵ Ade phumma putedâlem sanpoat pa lâhûtha, nãngkhua Niemarang khennâng dangtumih.

²⁶ Putedâlem junma Krista demnâng roamletma nekhu phangtang Joban Chharãng dangeken.

²⁷ Nea Krista demnâng roamletma baptijem kep eken, ngale ade phumma Krista roandông pumma nekhu nâng khet kepwah rãngrãng lâdangthen.

²⁸ Erohwah Jews le Jews ledangte hehnâng mâmâ jatjat ahotu, haa le haa ledangte heh tungnângmin mâmâ jatjat ahotu, dihiak dela tungnângmin ahotu; nekhu phangtang Jisu Krista demnâng roamletma wathe lâdangtet.

²⁹ Nekhua Krista rãng medang enkoba, Abraham chhuchha edangen, ngale erohkoba Joban ma chenni toamsem tah a erepa echoh en.