2 TIMOTHI 3 - NIEMNYAN Naga NT (BSI)

Rangkuh sanha thôan Sanpoat

¹ Thonghun en rangkuh sanha thôan sanpoatko nyahrãng chêmchei sanpoat ehûra.

² Mihnyan heh chhahnyoak, chhahkheh, ngam apoarit, ngale mâmâ dede rãnglolo thonghun lahma edanga; thin a mihdûmmek, nyong awa nginlekep, dangkoh a ngat lejet, ngale Joban ran lechei edanga;

³ thinma mihnâng lemînchen, map lekoh, mihchhihthô, mênkhe, ngale nyahrãng cheili edanga; ngale thinma asenli nâng chhihchoh erea;

⁴ thinma mihheh phoang chensãng, hen roakmin leweih, ngale ngam apoarit erewak a; thinma Joban nâng hun noma khuhah nâhah dângko lolo ehunwak a;

⁵ Thinma rangsoam niem pa mînrãng lolo keplahma, alinlin rangsoam niem chaanpa thinma lekep edanga. Arerãngrãng mihnyan heh demwah ataangreo.

⁶ Arerãngrãng mihnyan hehwah wanwanthe pa mihhan heh humnâng chhoan lahma dihiaknyu thinpap hênlih pa hèn lahma tôngte, ngale chentô achhihli hehnâng phetwân lahma tôngte dihiaknyupe heh ephoang chhihsiet wak a,

⁷ ere dihiaknyu hehma roantangma toangtang pa jet hun eka, rohkomin chenthujô thinma toangtang pa chohjetmah.

⁸ Janis le Jambris nii Mosa lelatnâng dangtah rãngrãng, are mihnyan hehmin toangtang lelatnâng dangwak eka - are mihnyan heh kheri ma senthemthem momah, ngale thin a putedâlem nângmin achhih.

⁹ Rohkomin thinma eroh ajah talek momah, chenrãngma ngako, anga ngama thinma aba kaam moeka pa ekhea. Eroh jôba Janis le Jambris niimin dângwah.

Athôan Rîn akhah

¹⁰ Rohkomin Ngama hethôeki nginpa, ngajat apat, ngale nga roandôngko mongthem heh nangma kepeko; nangma nga putedâlem, nga hungmông rinmông, hun achet, erediko ngama tadô ekang hehmin lâkhe thang,

¹¹ Nganâng chêmchei thukthang heh, ngale Ngama chêmchei chohtek hehmin nangma ajet. Ngale Ngama Antiok, Ikoniem, ngale Listra nâng nyahrãng cheili chêmchei hûlahma tadôtek hehmin nangma phangtang jet! Rohkomin ere chentô hehwah Teso ma pesietthang.

¹² Jisu Krista demnâng roamlahma henhenma Joban ma huneka rãngrãng roandông dônghun eka erehehma chêmchei chohmin;

¹³ ngale mihnyan chhih le mihphoang diapchhahte mihnyan heh jêngjah jahchhih echhihjâa, thinma mihheh phoang diapchhah demko thin dedemin ediap chhahriia.

¹⁴ Rohkomin nangnâng hethôtih rãngrãng nanga rongtêngtêng putedâlem lohma roantangma toangtang dango. Nangnâng hethôte heh henhen a erepa nangma jet o,

¹⁵ ngale nangma thonghuntan nang letachha thuma, nangma Asâthôan Joban nyapraangpa ajet, erepumma nangnâng Jisu Krista nâng putedâlem junma khope chohthin buthi mongthemsen heh ekohho.

¹⁶ Chentô Joban nyapraangpa Joban hung junko raangeka ngale erepa nyahrãng alemli thôan toangtang pa hethô rãngmemin alemli, kaamchhih moatte hehnâng ritngatrãng, athe heh pûnsietrãng, ngale toangtangma jiensông rãngma rîn akhah rãngmemin nyahrãng alemli thôan,

¹⁷ erohwah, henma Joban nâng soamtô eka erehehma chentô asenli moatlem heh tâjien moat akatte dângmin.