2 THISALONIKA 2 - NIEMNYAN Naga NT (BSI)

Wanthe Achhihthôan pa

¹ Lemruchha heh, Ngama nenâng rosep eka, Nãng Teso Jisu Krista ngakkat ngin ngale nãngkhu ate tânâng roamkhôanhok ngin hehrãngma,

² nekhu nâng ere Rangwo pa râkatha ngamejô mathôhû kohhèn komin nehung nerin nâng sitsiak nekmokrii en ngale hung nekke en. Eroh nima profisi hôanpoatko, ba Joban nginkongsen thôkoh poatko lâthôtih dangthem a, ngale siti nângmin lâraangtih dangthem a.

³ Hennângjô chenni ngemejô nekmok wânrii en. Chenrãngma ngako, ere Rangwo pa Joban ngin Lekepte pa mahong hongkako lehû mêngmin, ngale pap wendô dongnâng khâmritte Mihnyan Chhih pa mahong hongko lehû mêngmin.

⁴ Atema chentô joban ngale soamtô rewak eka heh lelatnâng danglahma atedede thin khohko dongrii lahma etonga. Atea Joban Rangsoamhum khennângmin tonghu lahma Joban ngama engariia.

⁵ Nema thonghun metne? Are heh Nga nekhu demnâng tôngpoat komin thôkotah.

⁶ Rohkomin arepa athângheh chenni mekomin ledangthuk thangma tengbeng thukeka, ngale erepa chenni ma tengsietka erepa nemajet en. Phumma sanpoat pa methang tahko Mihnyan Chhihthôan wathepa ehonga.

⁷ Nyahrãng Apatritli Mihnyan Chhihthôan pumma athâng hehmin hahtokkhoh ko moatlem molahma tongeka, rohkomin ere Mihnyan Chhih chaanpa wathema tenglo lahma thieneka, ngale erepa ate lem kowah lemtângte pa mare rephe tenglo lahma ethien a.

⁸ Erediko Mihnyan Chhihthôan pa ehonga, rohkomin, chenthu Teso Jisu Krista meka theko ate thunkâ wah rekpumma eritphea, ngale atewah wenphiakdong pumma echhihsiet a.

⁹ Mihnyan Chhihthôan Wathepa joak ajo chaan keplahma hûlahma chentô patritli moatlem mõang heh ngale bâritli moatlem heh emoa,

¹⁰ ngale atema chentô buthi mongthem chhih heh keplahma Ju mahritte mihnyan heh ediapchhah a. Thinma thin Ju khope thin hun achet le toangtang heh lekep di emah chhihjâa.

¹¹ Ngale Joban ma kaamchhih moat chaanpa thin khohnâng echienkat a, erohwah thinma amõang hehnâng putedâlem eka.

¹² Henhenma toangtangko leputedâlem thangma pap moatlem nâng khuhah eka ereheh pap wennâng ritkhâm ritkatmin.

Nea Ju Khope rãngma Ren ehèn

¹³ Lemruchha heh, nima sanpoat roakweih nekhu rãngma Joban nâng dangkoh a ngaeki, nekhu nâng Teso ma hun ehèn. Chenrãngma ngako Joban ma nekhu khekhothôan ren ehèn ate Ju chaanma khope chohrãng, ngale nekhuma toangtangko putedâlem junma atenâng putedâlemte mihnyan asâthôan rãng hôan ehèn.

¹⁴ Joban ma nekhu rooehèn pa nima nenâng Nginkongsen thôkoh eka junma rooehèn; atema nekhu rooehèn pa nãng Teso Jisu Krista demnâng mîn johdongrãng rooehèn.

¹⁵ Lemruchha heh, erohwah, nima nenâng toangtang ngin hethôtah hehnâng rongtêngtêng putedâlem letma tongen. Ere toangtang nginpa nima Joban ngin thôkohpoat komin hethôtah ngale siti nâng raanglihma min hethôtah.

¹⁶ Nãng Teso Jisu Krista ate dedema, ngale nãngnâng hun achete, ngale mînchenchaan kohte, erediko nãnghung dongsiet lahma chenthumin leta chhihjâ thin putedâlem kohte nãng Wa Joban ma,

¹⁷ roantangma hung arin le putedâlem dongsiet lahma asenli tuta moat akat ngale jab ajâ chaan chenkohhèn.