2 PITER 3 - NIEMNYAN Naga NT (BSI)

Teso Ngakkat rãngma Toamsêm Ngin

¹ Ngalemruchha heh, Ngama are sitipa nenâng depnii rãng thedep raangeka. Siti wanniinii latnâng Ngama are ngin heh thethôkoh ekapa nehung nerin ma asenli heh chenchoh thonghun en ngama thôkohrãng raangeka.

² Chenthu thuma Asâthôan mõng hehma jabtah ngin heh nema chenthonghun en ngama huneka, ngale nãng Teso ngale Pângte ma nãngnâng chienthi ngin ate moattat chhoante ma nenâng thôkohthen heh thonghun en ngama huneka.

³ Khebeng thôanko nema arepa jet en, athôan rangkuh sanhako mihnyan hehma thindede hung arinma chenni huneka ereheh lolo emowak a. Ngale thinma nenângmin dûmmek jôjêm erehèn

⁴ ngale thinma nenâng engahèn, “Atema nenâng Nga ngakkat rêmin ngama toamsem then a? Eroh medang ako atea chenkoa? Nãngte nãngwa hehmin riitah, rohkomin chentôpa rang ahah hôanthuko chenroh dangtah a athâng hehmin phangtang ererãngrãng tuta jôba!”

⁵ Chenthu thunâng Joban jabkhab junma rangkhethung le hahtokkhoh hôantah ngin heh thinma jetlahma lekep dangeka. Ngale Joban ma hahtokkhoh pa jo junma jowah hôanwah,

⁶ ngale khemawah hahtokkhoh pemin jodôngma lumlahma jomejô chhihsiet wah.

⁷ Phumma athâng hehwah rangkhethung le hahtokkhoh pemin ere mãnthe jabkhab pumma jôba wennâng rokpherãng thieneka. Ngale rangkhethung le hahtokkhoh nii chenthu Joban lejette mihnyan heh Joban ma chhihngatjâ rangwo ko chhihsietrãng thieneka.

⁸ Ngalemruchha heh, rohkomin nema are nginpa neklekphe en! Joban rãngma jâthe rangwo le hahjatthe rangwo nii mãnthe; Joban rãngma are wannii pa mãnthe.

⁹ Wanwanthe ma thonghun eka rãngrãng, atema moatrãng toamsem tah pa Teso ma lemoma lekthien dangmah. Erenoma, ate hungpa nedemnâng môngsiet lahma tongeka, chenrãngma ngako atema henjô chhihsiet hunmah, anga nga papwah hunglit lahma chenngak hûra ngama huneka.

¹⁰ Rohkomin Teso ngakkatjâ Rangwo pa ahuhte hokwah rãngrãng ehûra. Erejâ Rangwo ko rangkho pemin nyahrãng linlahma emahjâa, ngale rangkho wah chentô heh wenma etthôan jemkham a, ngale hahtokkhoh demko hah khohwah chentô hehmin echhihjâa

¹¹ Phumma are chentô heh aroh mechhihsiet ako, nea chenrãngrãng mihnyan dângmin a? Ne roandôngpa Asâthôan dângmin, ngale Joban nâng koh en,

¹² nema Joban ngakkatjâ Rangwo bêmpoatko ere Rangwo pa sitsiak chenhûra ngama thonghun letma bem en - erejâ Rangwo ko rangkho pa wenma jemkham lahma echhihjâa, ngale rangkho wah chentô heh wenkhâm junko ajûmjâ erea.

¹³ Rohkomin nãngma Joban ma toamsem tahpa bemlaeki: toangtang mihnyan heh sôngthin the rangkhethung nyan ngale hahtokkhoh nyan pa bemlaeki.

¹⁴ Ngale Ngalemruchha heh, nema ere Rangwo pa bemlâ poatko, Joban demnâng sâpoangpoang ngale chenni nângjô lechhih thangma tongen, ngale ate demnâng mêmo dangletma tongen.

¹⁵ Arepa nehung nâng thien en, nãng Teso ma ate hung môngsiet lahma tongeka pa nãngkhu kho chenmam pe e ngama môngtong eka. Are nginpa nãngma nyahrãng ahun nãng lemruchha Pol nâng Joban ma buthi mongthemsen heh kohjunko atema nenâng siti nâng raangthen.

¹⁶ Are heh junma ate siti chentô nâng Pol ma aroh raangwah. Pol siti nâng jetloatlat wanwanthe tonga, ereheh nokba ngale putedâlem nâng rongtêngtêng ledangte hehma ledangli ngenâng phoangke hethôeka, ngale thinma Joban nyapraang ahan hehmin eroh ledangli ngenângjô phoangke hethô lahma etonga. Eroh molahma thindede chhihsiet riiwak eka.

¹⁷ Ngalemruchha heh, rohkomin, nema are nginpa lâjettet. Erohwah jetletma tongen, erohkoba niemarang junko ledangte mihnyan chhih hehnâng lechhihsietrii etadangen, ngale ne khope chohthin the kowah lejârii edangen.

¹⁸ Ngale nãng Teso ngale Pângte Jisu Krista mînchenchaan pa senthemthem jetletma ne putedâlem pa jêngdong dongwãng chendangen. Ate mînpa jôba athâng hehmin, ngale roantang roangjêng rãng chendonga! Amen.