2 PITER 2 - NIEMNYAN Naga NT (BSI)

Amõang Hethôte

¹ Ama nâng Isrial mihnyan heh chhangnâng mõngmõang heh hôngwah, ngale erohjô nekhuchhang nângmin nginmõang hethôte heh ehonga. Thinma amõang ngale mihnyan chhihsiet thin niemarang heh ephoang hethôa, ngale thinma thin pêpângte Teso min lekeptu ephewak a, ngale thinma eroh molahma thindede lemlienma echhihsietrii wak a.

² Erohjô medang akomin thinma kaamchhih moekadi ajahthem mihnyan hehma ejun a; ngale thinma eroh moatjunko, ahan hehmemin toangtang Lemkhôko achhih enga a.

³ Ne ngewah ngun akem heh jienkeprãng nenâng thin dedema hôanwah nginmõang heh thôkoh ehèn. Rohkomin Joban ma thinnâng chenthu thuma achhih ngama ngalahma thieneka, ngale thin Chhihsiette pa ajupmin lejup tongeka!

⁴ Joban ma rangkhethung wah ate ngintatte danglahma papkaam moatte hehnâng lemînchen thangma pap wendô nâng phekat eka, ngale ere rangnyek theko janruma khhek lahma thien eka, eko thinnâng Joban ma achhih ngama rên Rangwojâ pa bemwak eka.

⁵ Ngale Joban ma rôanpa wah mihnyan hehnângmin mînchenho, ere poat wah Joban lejet thangma sôngtôngte mihnyan heh jodôngma lumthuk lahma ritphewah; rohkomin Joban ma toangtang ngin phoangthôte Noa demko ahan waengit mihnyan heh loloba pêsietwah.

⁶ Joban ma Sodom le Gomora hahdaang heh wenma rokphe lahma chhihsiet wah, ngale Joban ma erepa ate lejet thangma sôngtôngte mihnyan heh eroh dângmin ngama khesok eka.

⁷ Rohkomin Joban ma Lot pêsiet wah. Lot pa mihnyansen dângwah, ngale atea jatchhih patkhah mihnyan chhih heh junko nyahrãng chêm lahma dângwah.

⁸ Ere mihnyansen pa mihnyan chhih heh chhangko songtong lahma rangwo roakweih atema mihnyan chhih heh jab ajâ pa tat ngale moat akat pa khelahma ate hung arin nâng nyahrãng chêmchoh wah.

⁹ Ngale mihnyansen heh chêmchoh eka kowah chenroh pesietmin a ere pemin Joban ma ajet, ngale mihnyan chhih hehma thin Rên Rangwojâ bêmlâ poatko chenroh chêmthukmin a ere pemin ajet,

¹⁰ ajahthôan pa Joban nginlekep thangma thin hei angem phoang pumma phetwân lahma huneka rãngrãng moatte heh echêmthuk a. Are nginmõang hethôte heh hungdong rindong ngale nyahrãng angam, ngale thinma rangkhethung wah hehnângmin achhih ngatrãng cheimah; erenoma thinma rangkhethung wah hehnâng jõjêm re eka.

¹¹ Rangkhethung wah Joban ngintatte heh nginmõang phoang hethôte heh noma bâmbâm hang achaan, rohkomin thinma Teso mathahko nginmõang phoang hethôte hehnâng achhih ngamah.

¹² Are nginmõang phoang hethôte mihnyan heh wunngem lolihma rângritphe e rãngrãng, thin hungnâng chenjô lechhem hun thangma thinma lejet dangeka lelatnâng chhih jabwak eka; thin a wunwah ngem heh lolihma rângritphe e rãngrãng ritphemin,

¹³ ngale thinma ajahthem mihnyan hehnâng chêmthuk tah thãpa thin memin chêm echoh a. Thinma rangwo mongtangko thin hei angem wokphoatli moatlem moeka ko hungsen wakeka; thinma moatlem chhih heh khuhah nâhah moatdiko, nekhu demnâng phhekchhah roamchhah ehènpa nerãngma rêsêli dangeka!

¹⁴ Thinma dihiak dela kaamchhih moatrãng loloba phoanglem eka; thinma papkaam moatpa chenthumin jekmah. Ngale thinma diapphhek chhahla mihnyan heh diapphhek chhah lahma lemke nâng senphe eka. Ngale thin chhahnyoak lolo hethôeka. Erohwah thinma Joban wah chêm echohwak a!

¹⁵ Are nginmõang phoang hethôte hehma lemtin pa phe lahma lemke nâng khoamwak eka; thinma ngun nâng hunlahma kaamchhih moatte Bior chha Balam damanko junkhoam wakeka

¹⁶ ngale atema papkaam moat phumma ate Gado pumma mihnyan jabma hongjab lahma mõng pumma aba ata moatlem rãngrãng motah pa jeksietwah.

¹⁷ Are mihnyan heh rupjâchoan jomit rãngrãng, ngale pôngdong patdongma rângmetphea phoam rãngrãng; Joban ma thinrãngma rangnyek khenwah kenlu thôan thepa thienkoh eka.

¹⁸ Thinma sekhota ngin heh jablahma ngam apoarii wakeka, ngale kaamchhih molahma sôngtôngte mihnyan heh chhangwah pechhoanrãng phungte mihnyan heh thin hei angem phoang pumma kaamchhih moeka hehnâng mãnriithuk eka.

¹⁹ Are nginmõang phoang hethôte mihnyan hehma thin dedejô kaamchhih haa danglahma mihhan hehnâng khope ekoh a ngama toamsem wakeka - chenrãngma ngako nãng chenni moatlem ma jien ehia ere moatlem rãngma nãnga haa lâdangtih.

²⁰ Nãng Teso ngale Pângte Jisu Krista jetlahma henkomin are hahtokkhoh chhih kowah pechhoan lahma, eredikomin achhih hehnâng amãnmãn methe ngekriiako, ererãngrãng mihnyan pa khebengwah nomemin athôanko achhihthôan edanga.

²¹ Ere mihnyan hehrãngma toangtang lemkhôpa jetdiko thinnâng hethôtah toangtang nginpa lekep thangma mengak chhoan ako, thinma ere toangtang lemkhôpa lechêmjet peba asen chendangtah.

²² Ere mihnyan hehma chenni moeka erepa alinlinjô nginthakthô nâng thakthôeka rãngrãng moeka: “Hu pa atema phatphe eka phat tâkojô rângngak hûa” ngale “Wak pa themngekko woatrii lahma chhoan dikomin ere themngek kojô rângthe ngakwoat hûa.”