2 PITER 1 - NIEMNYAN Naga NT (BSI)

¹ Jisu Krista moattat chhoante ngale ate haa Simon Piter ngewah- Nãng Joban toangtang junma ngale nãng Pângte Jisu Krista junma ni rãngrãng putedâlem sen chohte hehnâng raangeka:

² Nema Joban ngale nãng Teso Jisu jet junma Joban mînchenchaan ngale mêmo pa mênchong chentonghèn.

Joban ma Roo ngale Arên

³ Nãngma nãng roote pa jetjunko, Joban ma nãngnâng roandôngko Joban jetlihma toangtangma jien sôngtông rãng chenni lemkia ereheh phangtang kohehi, atema nãng rooehi pa atedede mîndong ngale asenli hehnâng roamlihma tôngrãng rooehi.

⁴ Eroh jôba atema toamsem tah junko nãngnâng nyahrãng adong ngale asen hînhô pa kohehi, erohwah are hînhô heh junma hahtokkhoh hung arinma achhihli thonghun lihma chhihjâ wahmin etape en, ngale Joban rãngrãng etadangen.

⁵ Erohwah, ne putedâlem leko nea asen dângrãngma latrii en; ngale ne asen dangkenpa Joban ma chenni huneka erepa jetletma asen dangen;

⁶ ngale nema Joban ma hun ekepa jet eken leko nehung nerin môngmông tongen; ngale nehung nerin môngmông tôngleko atadô min rii en; ngale atadô riikenpa Joban jetletma tadô en;

⁷ nema Joban jetleko Kristan rãngrãng mînchenmîn en; ngale Kristan rãngrãng mînchenmîn leko hun achetmîn re en.

⁸ Are chentô jat apat heh nema lemeken, ngale ereheh nenâng ajah metong hènko, ereheh junma nema Teso Jisu Krista jet ekenpa asen edanga.

⁹ Rohkomin nenâng ereheh aho medang hènko nea mitdoak rãngrãng, nema ataang wah khemet, ngale nema amako moatwah pap heh sâsiet kohthen pa lekphe eken.

¹⁰ Ngalemruchha heh, erohwah, Joban ma nekhu rooehèn le ren ehènpa roantang roangjêng rãng chendanga ngama nyahrãng latrii en; nema eroh melatrii enko, chenthumin ne putedâlem heh tamah phemet.

¹¹ Eroh koba nenâng nãng Teso ngale Pângte jisu Krista roantang roanjêng Hahsông thenâng tâwâng rãng chaan ekohhèn.

¹² Ngale nema toangtang pa senthemthem jetletma rongtêngtêng mekep enkomin, Ngama nenâng erepa roantangma ethôkoh a.

¹³ Ngama thonghun ekang Nga ahînma tôngpoat poatko Ngama nenâng are ngin heh roantangma thôkoh pa alemli.

¹⁴ Ngama ajet are Nga hei angem roandôngpa sitsiak erii ang, ngale erepa nãng Teso Jisu Krista ma Nganâng sâpoangpoang thôkoh thang.

¹⁵ Erohwah, Ngaritdi komin ne sanpoat roakweih are ngin heh chenthonghun en ngama nenâng thôthien koh a.

Krista Mîndông pa Mitma Lepkhete

¹⁶ Nima nenâng nãng Teso Jisu Krista chaan demnâng ngakkat nginkong thôko tahheh mihnyan nyuchha ma hôanwah ngin thôkoh dangmah. Nidede mitma Jisu Krista mîndông pa khelihma thôkoh eka.

¹⁷ Chenthu Wa Joban ma ate mîndong thuktah poatko nimin eretheko dângwah. Chentô noma mîndongthôan chohte pumma atenâng aroh ngatwah, “Arepa Echha linlin Ngama atenâng nyahrãng hun ekang, ngale Nga ate demnâng nyahrãng rinme ekang!”

¹⁸ Chenthu ni ate demnâng Asâthôan Hahkong khoko dângpoatko nidedema are jabkhab pa rangkhethung wah jabkat lahma tatwah.

¹⁹ Erohwah mõng hehma thôtah nginkong hehnâng nima linlin ngama nyahrãng putedâlem eki. Nema min ere nginko hungkoh letma mejetat enko asen edanga, chenrãngma ngako erepa wentit pumma Rangwoma maleplep rangnyek ko phiaktoak rãngrãng, ngale nehung nâng rangkhah wah merit ma phiakkat wah rãngrãng edangen.

²⁰ Nema nyahrãng alemli thôan ngin jetthin pa arepa, Joban nyapraang kowah profisi hôaneka mihnyan heh hungsi junko thô dangmah.

²¹ Chenrãngma ngako, henmemin profisi pa mihnyan nyuchha hungsima hongjabmah, rohkomin mihnyan pumma Asâthôanju chaan junma Joban ngewah kaera jabkhab pa hongjab eka.