2 KORINT 9 - NIEMNYAN Naga NT (BSI)

Nãng lemru - Kristan hehnâng Chohsok

¹ Judia wah Joban nâng putedâlemte tangchhih hehnâng chohsokrãng ngama nenâng chêmraangthin dangmah.

² Ngama ajet nenâng achohsok hungpa etonghèn, ngale ngama nea Mesidonia wah mihnyan hehnâng nyahrãng rângthôtah. Ngale, “Akaia wah putedâlemte hehma menpa mejû chohsokhun lahma dângwah,” ngama thôkotek. Phumma nehung arinwah chohsok hun ekenpa khelahma thinmin melâng mihnyan hehma chohsokrãng chepwah.

³ Athângheh Ngama are putedâlemte mihnyan heh netânâng chienkat erâng, erohwah nima nekhu mihnâng chohsok junko rângthôtah pa sekhota ngin rãngrãng nekchen dangeka. Rohkomin ngama ngatek rãngrãng, nema chohsê heh khôansiet letma tongla en.

⁴ Chenrãngma ngako, Mesidonia wah mihnyan heh nga demnâng johhû lahma nema chohsê heh lekhôanse tongla letma mekhehû hènko, nia chentô rêsêli dângmin a, nerêsê pejã chêmthôli dangmah - chenrãngma ngako ngama nenâng nyahrãng dâlem lahma rângthôwah!

⁵ Erohwah nga netânâng hokmako are putedâlemte heh chienwên lâpa alem ngama thonghun ekang, erohkoba nema chohsokrãng toamsemtet heh khoakhem letma etongla en. Eroh koba chenthu nga hokko khôanse chhoan etongla en, ngale erohkoba nema metkep kohmin jôba ngama koh ledang, hung arinma kohhun letma koh eken ngama ekhesok en.

⁶ Thonghuntan en, henma chhah pa anechha wên eka, erepumma anechhahjô echohhèn a; ngale henma jahmõang wên eka erepumma ajahjô echohhèn a.

⁷ Erohwah nekhu anga ngama hung arin nâng chenroh kohrãng hun eken a erohkoh en, hungkeke dangletma ngale metkep kohmin jôba ngama nekkoh en; chenrãngma ngako, Joban ma hung arin sênma hunlahma kohte nâng huneka.

⁸ Ngale nema chentô lemeken a ere nomemin ajah Joban ma takohhèn, erohwah nema chenni lemeken a ereheh roantangma echoh en, ngale asenli nâng keprãngma ere nomemin ajah eta choh en.

⁹ Joban nyapraangma ngaeka, “Atema tangchhih hehnâng chhahme danglahma koheka; ngale ate mînchen pa roantang roangjêng rãng tongeka.”

¹⁰ Ngale pitmoatte nâng chhahli chohkohte, erediko phhek achhahte nâng bankên chohkohte Joban ma nema chentô chhahli lemeken a ereheh echoh kohhèn, ngale nea chhahme dângdi Joban ma chhah heh dongphoak thuklahma chhahkosen dangthuk lahma ajah echohhèn en.

¹¹ Nea roantangma chhahme dângrãngma Joban ma techhu edangthuk hèn, erohkoba ni ngewah nekhu chohsê pa choh lahma melâng mihnyan ma Joban nâng dangkoh a enga a.

¹² Chenrãngma ngako, nema are achohsok moatlem moeken pumma Joban nâng putedâlemte tangchhih hehnâng lolo toatchoh ledang, Joban nângmin ajahthem dangkoh a ngawak eka.

¹³ Ngale nema are achohsok moatlem moeken junko, erediko nema Krista nginkongsen pa senthemthem kepletma thôeken junko, ngale nea chhahme dangletma thin demnâng ngale anga nga demnâng phenphen sensen kep eken juko ajahthem mihnyan hehma Joban nâng dangkoh a engawak a.

¹⁴ Ngale Joban mînchenchaan pa nenâng nyahrãng adong kohdi, thinhung linlin wah nenâng hunlahma Joban nâng rangesoam kohhèn.

¹⁵ Erohwah Joban ma nãngnâng thahoma hînhô kohdi dangkoh a ngae.