2 KORINT 3 - NIEMNYAN Naga NT (BSI)

Toamsem Nyan Haa

¹ Ademin nidedejô rângthô ritwah rãngrãng dangekia? Roh akole, mihhan heh rãngrãng, nimemin nenâng siti raangkoh lemeken a, ba newahmin nima sitiraang lemekia?

² Anga ngama weihrãngma ne dedejô nima nihung khennâng raangwah siti rãngrãng lâdangtet.

³ Are sitipa Krista dedema raangwah ngale erepa nijunma matchhoan eki. Are sitipa sehima raangwah dangmah, ahîn Joban Juma raangeka, ngale erepa longkhanâng raangmin dangmah, mihnyan nyuchha hungkhen nâng raangeka.

⁴ Nima arepa Krista junma Joban nâng dâlem lihma jabeki.

⁵ Are moatlempa nidedema tamoeki ngama ngatrãng ninâng chenni chaanjô aho. Nima ere moatlem tamoeki pa Joban chaan meba tamoeki;

⁶ Atema jôba dekma raangwah ledang, Juma raangwah toamsem nyan haa tâdângrãng ninâng chaankoh ehi. Dekma raangwah niemarang pumma arit kephûera, rohkomin Juma roandông kohehi.

⁷ Niemarang pa longkhanâng raangwah, ngale chenthu erepa chohkoh poatko Joban wenphiak demnâng chohkoh wah. Ngale Mosa thhenphãng ko Isrial mihnyan hehma leta chinthongsû lândang rohjô mephiak akomin Mosa thhenphãng kowah ere wenphiak pa amahjâ rewah. Phumma ere arit kephûera Niemarang pemin sanpoat theko atôchaan dângwah medang ako,

⁸ Juma moeka moatlem anyan pumma phiak eka pejã tanga chentôjah bâmdong eka!

⁹ Nãng chhihsietrãng kephûera niemarang pa atôdong dângwah medang ako; nãngkhope sietrãng kephûera pejã tanga chentôjah bâmdôngmin a!

¹⁰ Chenrãngma ngako, toamnyan sem ekapa ajahthem bâmdôngphiak phumma, amawah nyahrãng phiak lahma dangtah pa ade phumma mahjâtah.

¹¹ Chenrãngma ngako, mahjâ rekapa poattherãng aphiak dângwah medang ako, chenthumin lemahjâ thangma roantang roangjêng rãng tôngte pejã tanga chentôjah bâmdông phiakmin a!

¹² Chenrãngma ngako, nãngnâng aroh putedâlem pa tông phumma lechei thangma dangeki.

¹³ Ngale nãnga Mosa rãngrãng dangmih, Mosa ma ate thhenphang wah phiak ekapa chhihjâ lahma mahjâ ekapa Isrial mihnyan hehma nekchen khe ehang ngama ate thhenphãng ko tanghep wah.

¹⁴ Linlinjô thinhung pemin tanghep eka; ngale thenep thejâmin thinma Niempã titab pa meweih ako, amawah thinhung tangheptah mãnmãn pummejô athâng hehmin tanghep eka. Chenthu mihnyan pa Krista demnâng meroam akoba ere tânghep thinpa rephe eka.

¹⁵ Thenep thejâmin thinma Mosa Niemarang pa meweih ako, thinhung pa athâng hehmin tanghep eka.

¹⁶ Rohkomin Joban nyapraangma ngaeka rãngrãng ere tânghep thinpa tare phea: “Chenthu atea Teso tânâng ngakhok phumma ba ate thhenphang kowah tanghep ekapa laangwah.”

¹⁷ “Teso” pa Ju; ngale chenko Teso Ju tongeka, ereko Ju junma Joban nâng soamtô eki.

¹⁸ Erohwah nãngkhu chentôma thhenphang pa letanghep thangma Teso rãngrãng dange; ngale Teso wah phiak eka Ju pumma nãngkhumin ate rãngrãng litsiet lahma jêngdong dongphiak chenphiakthuk hi.