2 KORINT 2 - NIEMNYAN Naga NT (BSI)

¹ Erohwah nekhu hungchhih thukrãng nga netânâng thedep hutu mahrâng ngama thonghun ekang.

² Chenrãngma ngako ngama nehung mechhihthuk ako, henma nga khuhah thuktumin a? Ngama hungchhih thuktek mihnyan heh mejôba ngahung esen thukhang.

³ Erohwah jôba ngama ere sitipa nenâng raang wah - Ngahung sênthukte mihnyan hehma ngahung nekchen chhihthuk ehang ngama hunlekma netânâng leka thangma tongekang. Chenrãngma ngako, ngama ajet chenthu nga khu mehah angko, nemin khuhah eken.

⁴ Ngama are sitipa nyahrãng hungchhih chêmchoh nungma, erediko nyahrãng mitphî jâlekma raang ekang; ngama arepa nehung chhihthuk hunlekma raang dangmek, rohkomin ngama nekhu phangtang nâng chentô huneka erepa jetthuk rãngba raangeka.

Kaamchhih Moatte hehnâng Mapkoh

⁵ Ade dangeka, henma komin mihhung mechhihthuk tetko, erepa atema ngahung chhihthuk dangmah hang, nekhu phangtang hungba chhihthuk ehèn - chhupthe komin nehung chhihthuk ehèn. (Ngama are jabekang pa atenâng achhihlin ngat lehun junko jabekang.)

⁶ Are kaamchhih moatte mihnyanko nekhuma roanche phhekkhên nâkhên mehôantet kojô lâthengtah.

⁷ Rohkomin ade phumma nekhuma atenâng mapkoh en, ngale ate hung dongsiet en, chenrãngma ngako hung pa lulu chhihlahma roantangrãng môangchhihjâa.

⁸ Ngale ngama nenâng rosep eka, nema atenâng linlin hun ekenpa chenjet a ngama atenâng khesok en.

⁹ Ngama nenâng are sitiraang ekapa, ngama nenâng hethôeka heh kep ekenle kepmet a ngama thatjettân rãng raangeka.

¹⁰ Chenthu nema kaamchhih moatte hehnâng map mekoh tetko, ngamemin thinnâng map koh ekang. Phumma chenthu ngama map mekoh tâkko - linlinjô, ngama chentô map kohthin heh phangtang koh ekang - Ngama arepa Krista mathahko nekhu rãngma moekang.

¹¹ Ngama are moekang pa joakma nãngkhu asenli heh nekchen tajien ehi ngama moekang; chenrãngma ngako nãngma ate mongthem pa ajet.

Tros nâng Pol Hungchhih Sanpoat

¹² Chenthu nga Tros nâng Krista Nginkongsen pa thôkohrãng hokko, Nganâng Teso ma enâng moatrãng lemlaang kolahma khewah.

¹³ Rohkomin ngama nãngnaa Titas lechohkhe dâng phumma nyahrãng sekmah lekma dângwah. Erohwah ngama enângwah mihnyan hehnâng chhoan ekangjô ngama thôthien kolekma Mesidonia nâng katwah.

Krista junma Jien

¹⁴ Rohkomin Joban nâng dangkoh a ngaekang! chenrãngma ngako, Krista demnâng roamlihma Krista mînko phâtek nâng tôngte rãngrãng danglihma Krista ma jien ekako Joban ma roantangma senwên ehi. Joban ma Krista nginpa tientumli tûm rãngrãng chentô thenâng phôangjet thukrãng kep ehi.

¹⁵ Chenrãngma ngako nãngkhua Krista ma Joban nâng tum amêngli koheka tûmpa khopete ngale kho lepete mihnyan chentôma tateka rãngrãng jôba, erohwah nãng memin Krista tûmpa khopete ngale kho lepete chentô nâng tatthukmin.

¹⁶ Phumma henhen kho lepete mihnyan a ereheh rãngma ere tum ekapa thin ritli nem eka; rohkomin henhen khopete mihnyan a ereheh rãngma, ere tum ekapa roandông chohli tum eka. Eroh medang ako arerãngrãng moatlempa henma jienmoatmin a?

¹⁷ Nia mihhan heh rãngrãng Joban nginpa ni tongsek rãngma thãnien nâng phoangseng chhahte dangmih; rohkomin nia Joban ma chienchhoan ehi, erohwah nia Krista haarãng danglihma Joban mathahko toangtangma thôeki.