2 KORINT 12 - NIEMNYAN Naga NT (BSI)

Pol ma Thânkhe ngale Atenâng Loatkhesok

¹ Ngarãngma chenjô asenli lehong eka komin, ngama metkep erânthô ang. Rohkomin, ngama thânkhetek le Joban ma nganâng loatkhesok thang heh jôba erângthô ang.

² Ngama Kristan mihnyan wathe echhi pabelii mako rangkhethung choangthôan ko toansietwên lahma jet ang (Arepa atema athânkhe retah ale linlinjô dangtah a erepa ngama jetmek - Joban ma loloba ejet a).

^3-4 Ngama ademin thethô koheka, ngama jet ang ere mihnyan pa mihnyansen heh ritdiko thinju heh tongeka thesenko hûsietwên tah (ademin thethô koheka, ngama arepa athânkhe retek ale linlinjô dangtah a erepa ngama jetmek - Joban ma loloba jet a), ngale eretheko atema mihnyan nyuchha ma leta thakthôli ngin heh chohtahwah, ngale mihnyan nyuchha thunkhab wah leta hongjabli jabkhab heh tatwah.

⁵ Erohwah ngama are mihnyan junma rângthô ang - roh akomin ngama ngadede junma rângthômek, nga a chentô aboan anaa ngale pachhih a ere peba erângthô ang.

⁶ Ngama arângthô mehun angkomin, Nga aba dangmek, chenrãngma ngako ngama toangtang thôekang. Rohkomin ngama rângthômek, chenrãngma ngako nema nga moatlempa khe eha, ngale tat eken noma nganâng adong bâmthong hunpa hunmek.

⁷ Rohkomin ngama chentô athakthôli chohhkhetek a ereheh junko nga lengamrii thangma dângrãngma, ngaphoang nâng nyahrãng chet akhup achhih hokwah, erepa joak ngintatte hehma nganâng watwah, ngale erejunko lerângthôrii dângwah.

⁸ Ere chet akhup hehrãngma ngama Teso nâng ngaphoang kowah rephe kohhang ditrem soamtek.

⁹ Rohkomin atema nganâng aroh dânthâng wah: “Ngawah mînchenchaan pejô nangrãngma elea, chenrãngma ngako, chenthu nãnga aboan anaa ngale pachhihjô medang okomin Ngawah chaanpa adong.” Erohwah, nga chet akhup junkomin nyahrãng khuhah nâhah dangekang, erohkoba, nga khohko Krista chaanpa tonglahma pepâng ehang ngama ejetrii ang.

¹⁰ Erohwah, chenthu nga boanrit, dûmmek jôjêm, chêmchei, mihma chêmsiet, patrit sekmah, komin Krista mînko khuhah nâhah dangekang. Chenrãngma ngako, chenthu nga abôan mere angko jôba, nga achaan re ekang.

Pol Korint wah Mihnyan hehrãng sekmah

¹¹ Nga aba rãngrãng dang ekang - roh akomin erepa ne junma dangekang. Nekhuma jôba ngarãngma nginsen jabletma khesokmin, chenrãngma ngako, nga chenjô ledang kangkomin, nema “moattat chhoante adong” ngaeken heh noma arin dangmek.

¹² Ajahthem patritli ngale bâritli moatlem heh ngama netânâng motek hehma nga moattat chhoante ngama khesok eka, ereheh ngama nyahrãng hungmông rinmông danglekma moatwah.

¹³ Ngama nenâng ahan Asâthem heh noma achhih lehoan lejoantah a, ngama nenâng ngun akem letha thangma loloba methientah a? Erepa chhihmoatthã nganâng map mamkohha!

¹⁴ Ade rekma nga a nedemnâng chohmîn hokrãngma lôremrãng phung ekang - ngale ngama newah chenjô thamah. Ngama ne ngun ko hunmek, nekhuba huneka. Chenroh chha hehma nyong awa nâng lechohkohhû thangma chha hehnâng nyong awa hehma chohkoh hûeka rãngrãng jôba ngama nenâng huneka.

¹⁵ Ngama nganâng chentô tonghang heh, erediko ngadede min nekhu nâng chohsokrãng khuhah nâhah kohhun ekang. Erohwah ngama nekhu nâng ajah hundi, nekhuma nganâng mãnchha huneha?

¹⁶ Nemamin senthemthem ajet, ngama ne sekmahthuk ho. Rohkomin wawathema ngama buthi mongthem chhih ngale mothô thôlekma nekhu diapchhah ehèn ngama engathem a.

¹⁷ Chenroh jienthô eken a? Ngama netânâng nginmatte chienhû lekma nekhu diapchhah lahma lethatah a?

¹⁸ Ngama Titas nâng netânâng katrãngma roseptek, ngale ahan Kristan pho anaa hehmin ate demnâng johchienkat thang. Phumma Titas ma newah diapchhah lahma thaehi ngama lenga eken a? Titas cheniima mãntheko thonghun lihma mãntheko moat ledangne?

¹⁹ Nema eta thonghunthem en sanpoat roakweih nia ne mathahko nidede lolo senthôrii eki ngama. Eroh dangmah! Nia Krista ma chenroh jabthuk hun ehia ererãngrãng jôba Joban mathahko jabeki, ngale lemruchha heh, nima chentô moeki pa nekhu nâng chohsokrãng moeki.

²⁰ Nga chei rekang, chenthu nga netânâng hokko ngama chenroh thonghun eka ererãngrãng lekhehû marelah o, erediko nekhu memin nganâng chenroh thonghun eha ererãngrãng lekhe mareho ngama. Ngale, mên ahietmîn, phatwânmîn, rinkhahchaan, chhahnyoak, mihnâng dûmmek, mihchhihthô, ngam apoa, ngale pong apa dangletma machoh khehûlah o ngama cheiba rekang.

²¹ Nga netânâng thengak hokko Joban ma ne mathahko numnene madangthuk hango ngama chei rekang, ngale ama kowah chentôma pap molahma thin kaamchhih hehwah hung lengaklit thangma tôngte hehrãngma esep ang - thinma athâng hehmin kaamchhih ngale dihiak dela tungko kaamchhih heh molahma tongeka.