2 KORINT 11 - NIEMNYAN Naga NT (BSI)

Pol ngale Moattat Chhoante Amõang heh

¹ Chenthu nga roanche aba rãngrãng dângpoat komin nema eliet ha ngama hun ekang. Mamliet ha!

² Joban ma nenâng chenroh phetwân ehèn a, ererãngrãng ngamemin nenâng phetwân eka; Nea paangmih demnâng kaamchhih mathah mote janchhôsâ rãngrãng, ngama ne dela wathelolo demnâng kepmîn thukrãng kahkhetmîn koheka, ere delawapa Krista.

³ Nga chei rekang, chenroh pûma buthi chhih hôanlahma Eve diapchhahtah rãngrãng, nehungmin achhih nâng kesietrii letma Krista nâng atô senthemthem hung kohletma putedâlem tetpa machhihjâ let o ngama.

⁴ Chenrãngma ngako, nima nenâng Jisu nginkong thôkoh eka rãngrãng ledang Jisu nginkong ahan nenâng thôhok kohte heh nginmin nema khuhah nâhah kep eken; ngale nema niwah choh eken Ju ngale nginkongsen noma ajatjat ju ngale nginkongsen pa kep eken!

⁵ Nga a nema “moattat chhoante adong” ngaeken heh nomemin chhupthejô arin thonghunrii mek!

⁶ Nga jab ajâ nâng senthemthem lehewah edangthem ang, rohkomin nga jet ajien jôba; erepa nima nenâng sanpoat roakweih ngale rongrup ngema senthemthem jetthuktah.

⁷ Chenthu ngama nenâng Joban Nginkongsen pa thôko tahko ne ngewah chenjô letha thangma thôkotah; Nekhu dôngthuk rãngma Ngadede numsietrii lekmeba thôkotah. Erepa ngama achhih lemotek a?

⁸ Chenthu Nga nekhu demnâng moatpoatko ahan Asâthem hehma thã kohlahma moatwah. Lemthema methôeko, Ngama thinwah thã thalekma nekhu nâng chohsok moatlemba moatwah.

⁹ Ngale Nga netânâng dângpoatko chenthu ngama ngun akem lempoat komin nekhu sekmah thuk ho; Ngama chenni lem ekanga ereheh phangtang Mesidonia wah putedâlemte katha heh meba kephû kohthang. Khema wah rãngrãngjô, khedi nângmin: Ngama nekhu nâng chenthumin sekmah thukmah!

¹⁰ Krista toangtangpa nganâng tông junko toamsem ekang, ngama arepa Akaia diak phangtang nâng lekihtong thangma ephoang rângthô ang.

¹¹ Ngama are jabekang pa nenâng lehun danglekma lejab ekanga? Joban memin ajet ngama nenâng huneka!

¹² Ngama athâng hehwah chenroh moekanga ererãngrãngjô emo ang, erohkoba, ahan “moattat chhoante” heh rângthôrit pa ejek a, ngale thinmemin nima chenroh moekia ererãngrãngjô moeki ngama rângthôpa ejek a.

¹³ Ere mihnyan heh moattat chhoante linlin dangmah - thin a moattat chhoante amõang, ngale erehehma khoanglep kaam moeka, erediko Krista moattat chhoante linlin heh rãngrãng diapdang wakeka.

¹⁴ Chêmmokrit thin dangmah! Joak ajo hehmin wenphiak wah Joban ngintatte heh rãngrãng talit danga!

¹⁵ Erohwah, joak ajo ngintatte hehmin toangtang kaam moatte haaheh rãngrãngjô melitjâ komin chêmmokrit thin dangmah. Athôanko thinma chenroh motah a ere junkojô echohwak a.

Pol ma Moattat Chhoante Dâng junko Chêmchoh

¹⁶ Ngama ademin thethô koheka: henmemin nganâng aba ngama nekthong hunha. Nema aba ngamejô methonghun hakomin, aba dangkoh a ngama kep ha, erohkoba ngama roanche eta rângthô ang.

¹⁷ Rohkomin athâng heh ngama chenni jab ekanga erepa Teso ma nganâng jabthuk hun ehang heh dangmah; ngadede aroh rângthôrii ekangpa linlinjô aba rãngrãng rângthôrii ekang.

¹⁸ Rohkomin ajahthem mihnyan hehma mihnyan nyuchha hei angem moatlempa rângthôeka, erohwah ngamin rângthôrii ekang.

¹⁹ Nea nyahrãng buthi mongthemwin, erohwah hungsen rinmema aba heh demnâng nehung mongsiet letma dang eken!

²⁰ Nea haa rãngrãng keplahma moatthukte mihnyan heh, nenâng joannamte heh, be nâng manrit thukte heh, nenâng dûmmek jôjêmte heh, ngale ne thhenko watte mihnyan heh, nema hungsi rinme dangletma taliet eken.

²¹ Ngama rêsêli ngin jabekang, ererãngrãng moatlem heh nima chinmomih! Rohkomin henma akomin lechei thangma merângthô ako Ngama abajab arãngrãng jabekang - Ngamemin lechei thangma tarângthô ang.

²² Thin a Hibru jat ne? Ngamin Hibru jat jôba. Thin a Isrial jat ne? Ngamin Isrial jat jôba. Thin a Abraham chhuchha ne? Ngamin Abraham chhuchha jôba.

²³ Thin a Krista haa ne? Ngama aba ma jab arãngrãng jab ekang - Nga thin noma haasen! Ngama nyahrãng chaanmotek, Nga phâtek nângmin melângdep thattongtek, Nganâng awatmin jahmõang watthang, ngale riinemnem wahmin ajahthem lâpetek.

²⁴ Jews hehma nganâng roakrem dit ekhukhuma lobangâ watthang;

²⁵ Roman hehma lôremwat rethang; ngale longma rekthepet rethang. Ngale jogari chhihjâ lahma lôrempe retek, erediko roaknii koanta belii jo nângmin lâthat tongtek.

²⁶ Nga phoangkhoam roakweih melâng phoangchêmtek, jodông thunwahmin petek, ngale ahuh aliek dekwahmin petek, Jews hehmemin lâthat chêmsiet thang, erediko Jews ledangte hehmemin lâthat chêmthukthang; Hahdaang khennângmin lâthat chêmriitek, wunkhen nângmin lâthat chêmriitek, josidong nângmin lâthat chêmriitek, ngale lemruchha mõang hehmemin lâthat chêmsiet thang.

²⁷ Ngama moatlem katlem hehmin nyahrãng laâhat chêmrii motek; ngale ajupjô lechohjup memin melâng lâthat dangtek; Rêmritma, ngale jolanrit memin lâthat chêmtek, hum aho thangmemin lâchêmtek, erediko khet akhu aho memin lâthat chêmriitek.

²⁸ Ngale ahan heh lechêmthô thangma, rangwo roakweih Nga chentô Asâthem heh rãngmaba sekmah ekang.

²⁹ Chenthu hen akomin meboanrii ako, Ngamin boanrit jôba rekang; ngale henma akomin pap medangthuk ako, nga nyahrãng hungke ekang.

³⁰ Ngama arângthô mere angko, nga chentô pachhih dangekanga erepa erângthô ang.

³¹ Joban ngale nãng Teso Jisu Wa - ate mînpa roantang roanjêng rãngma rângthôe! - Joban ma ajet ngama mothôthô dangmek.

³² Chenthu Nga Damaskas nâng dângpoatko, Lowang Aritas khenwah Govono pumma nga loatkhhek rãng hahdaangko lupwângthin pankâsek hehnâng abemte sipâhi thienwah.

³³ Rohkomin nga phânâng seklahma pan polo pumma waangphekat lahma atewah pêchhoanwah.