2 JON 1 - NIEMNYAN Naga NT (BSI)

¹ Asâthem khhepho phannang hehwah- Nima nyahrãng ahun dihiaknyu ngale ate chhuchha heh, Ngama linlin nyahrãng hun ekang hehnâng raangeka. Ngale Nga loloma hun achet dangmah, rohkomin toangtang jette chentôma hun ehèn,

² chenrãngma ngako toangtang pa nãngnâng tongehi ngale erepa roantang roangjêng rãng tongehi.

³ Wa Joban ngale ate Chha Jisu Krista ma, nãngnâng mînchenchaan, ahun, ngale mêmo chenkohhi; ereheh nãngkhu toangtangma hun achetmîn junko nãngrãng chendanga.

Toangtang ngale Ahun

⁴ Wama nãngkhu nâng thôkohthi rãngrãng nekhu chhuchha heh toangtangma sôngtông pa khelekma Nga nyahrãng khuhah ekang.

⁵ Ngale nyahrãng ahun dihiaknyu, Ngama nângnâng chhien eki: nãngkhu anga nga wathema wathe nâng hun achhâmin e. Arepa Ngama nangnâng hôkum nyan hôngraangkoh dangmih; arepa nãngkhuma khemama chohtih hôkum pejôba raangeki.

⁶ Ngama are hun achetmîn ngin jabekang pa nãngkhu Joban hôkum junko senthemthem sôngtôngrãng jabekang. Are hôkum pa nema khema thumejô lâchohtattet, erepa nekhu hun achhâmin letma sôngtôngrãng ngaeka.

⁷ Mih diapphhek chhahte hahtokkhoh ko jahmõang phoangmen chhoantah, ereheh a Jisu Krista pa mihnyan nyuchha phoang rãngrãng danglahma katwah ngama lejette mihnyan heh. Arerãngrãng mihnyan heh mih diapchhahte ngale thin a Krista rãngma Ran.

⁸ Erohwah jetletma dangen, erohkoba nema chenrãngma motet a ereheh lemahphe edangen, ngale eroh medang enkoba nema Joban wah thã echoh en.

⁹ Henhen komin Jisu Krista nginlekep thangma, alîenlîen nâng dangeka, ereheh nâng Joban aho. Rohkomin henhenma Jisu Krista ngin kepeka ereheh nâng Wa ngale Chha waniinii tonga.

¹⁰ Erohwah, hen akomin netânâng are ngin heh lekep thangma mehûreko, ere mihnyan heh ne humnâng nekhûthuk en; ngale, “arânjô nekrânjab en.”

¹¹ Chenrãngma ngako henhenma thinnâng rânjab eka erehehmin thin demnâng kaamchhih nâng lâjoh rutah.

Athôan Jabkhab

¹² Ngama nenâng jahmõang thôkohthin ngin tonga, rohkomin erepa Ngama nenâng kakoat le sehi ma raangmah; erenoma, Ngadede netânâng kalekma jabmîn katrãng thonghun ekang, erohkoba nãngkhu nyahrãng khuhah nâhah edange.

¹³ Nekhuma nyahrãng ahun nekhu nya chhuchha hehmemin nenâng salem matkat ehèn.