1 TIMOTHI 5 - NIEMNYAN Naga NT (BSI)

Putedâlemte hehma Jetthin Niemarang

¹ Phannang hehnâng nekritnga, rohkomin nangwa rãngrãng thonghun lohma rosep o. Nang noma leta hehnângmin nangnaa rãngrãng thonghun lohma thien o,

² Dihiak phannang hehnâng nyong rãngrãng, ngale leta hehnâng hungsâ ma nangnaa rãngrãng thonghun o.

³ Linlinjô atelolo dângte janthoinyu hehnângmin mînchen o.

⁴ Rohkomin janthoinyu pa chhu achhawin medang ako, khebengko thin chhuchha hehma thinnâng senthemthem chenbeng khoakhem a, chenrãngma ngako eroh thinma thinnyong pa mekhoakhem akoba thinma thinnyong awa nâng thin khoakhêm thã ngakkohwah rãngrãng edanga, ngale erohkoba Joban rinme eka.

⁵ Atenâng sok arête henjô aho atelolo dângte janthoinyu, pumma Joban nâng lolo tok anaa lahma rangwo rangnyek Joban ma atenâng chohsokrãng rosep lahma tongeka.

⁶ Rohkomin hen janthoinyu ma ate roandôngko khuhah nâhah ngit aloam nânglolo huneka, ere janthoinyu pa ahînthu mejô lâriitah.

⁷ Thinnâng are ngin heh rîn akhah o, erohkoba henmemin thinnâng achhih lenga edanga.

⁸ Rohkomin thinma thintang amang heh lekhoakhem medang ako, ajahthem pejô thinhumte tangkâ heh lesû lere medang ako, thinma Joban nâng putedâlem mah, ngale thin a Joban nâng lepute dâlemte heh nomemin achhih.

⁹ Janthoinyu henjô rangpâ roak erok noma ajah ledang kako, atea ahan janthoinyu heh demnâng khoroak nekjohweih. Ere lekojô, atea ditthe loloba dela nâng wângte dângmin

¹⁰ ngale atea moatlemsen moatte dihiaknyu ngama mînwînte dângmin: ate chhuchha heh senthemthem dôngkhêmte, ngale ate humnâng mihwun heh tãngroo lahma jekthuk hunte, Kristan hehrãngma numnene danglahma chohsokte, chêmcheite mihnyan hehnâng chohsokte, ngale atea roantangma moatlemsen moatte dângmin.

¹¹ Rohkomin roandongthu janthoinyu heh khoroak nekjohweih; chenrãngma ngako, chenthu thinhung thinrinma dela nâng ngakwâng mehun tahko, thin a Krista tâwah ngakchhoan erewak a,

¹² ngale thinma khemako Krista nâng toamsem tah heh lemo thangma jeklahma achhihrãng elitjâwak a.

¹³ Ngale thinma thin sanpoat pa humthe kowah humthe nâng phoang dãnkhoam lahma elien thukwak a; ere nomemin achhih thôanpa dangeka, mihmîn heh chhihthô, ngale mihmoatlem hehnâng phoang nyenmîn, ngale thinma lethôli ngin heh phoangthô erewak a.

¹⁴ Erohwah Ngama roandongthu janthoinyu heh dela nâng ngakwãng lahma chhuchha heh chha, ngale thinhumte tangkâ heh khoakhem relahma metong ako asen ngama thonghun ekang, thin eroh medang akoba thinran hehma thinnâng chhihthô thin chenjô aho edanga.

¹⁵ Chenrãngma ngako wanwanthe roandongthu janthoinyu hehma joak ajo dijunrãng ngakchhoan eka.

¹⁶ Rohkomin Kristan dihiaknyu humkâ nâng janthoinyu metong ako, thinma Asâthem hehma chenchohsûa ngama Asâthem hehnâng lephe thangma thindedema chenchohsûa, erohkoba Asâthem hehma atelolo dângte janthoinyu heh khoakhem lahma eta sûarea.

¹⁷ Khhepho phannang danglahma henma Asâthem hehrãng moatlemsen moeka ereheh nâng nyahrãng soangraangmin, ajahthem pejô henhenma nyahrãng latrii lahma Joban nginkong heh phoangthô lahma hethôeka ereheh nâng soangraangmin.

¹⁸ Chenrãngma ngako, Joban nyapraangma ngaeka, “Chenthu nangma mânpong nâng chhah menekthuk oko ate thunpa nekkhhek” ngale “Kaammoatte hehnâng thin dekbi thãpa kohmin jôba.”

¹⁹ Wanii ba erenoma ajahma hâkhi lehôan kako, khhepho phannang lelatnâng kaamchhih moeka ngama menga ako erengin pa nekkep.

²⁰ Papkaam moatte hehnâng nok atang mako ritngao, erohkoba ahan hehmin echeia.

²¹ Joban ngale Jisu Krista erediko rangkhethung wah Joban ngintatte Asâthôan heh mathahko Ngama nangnâng thôkoh eki, are rîn akhah eki nginpa nangma keplohma nangma chenjô memo okomin hennângjô thhensok lehôan thangma mo o.

²² Hennângjô lemlienma thinkhoko dekma sahlo lohma Teso moatlem moatte nekdangthuk. Mihhan heh papnâng nekjoh ngekrii; nangdede sâpoangpoang tongo.

²³ Nanga roantangma achetjû dâng phumma Jololo nekjok, nangwok sênrãngma angurti wahmin roanchhe jok o.

²⁴ Khaka mihnyan heh pappa mitma akhe, ngale thinnâng achhih ngama ngatmama lemlienma loatjâ eka; rohkomin khaka mihnyan heh pappa khedinâng hong lahma ekhe e.

²⁵ Ererãngrãngjô kaamsen pemin senthemthem khe eki, ngale chenchen pa senthemthem lechohkhe dangeka erehehmin tahuh tongmah.