1 TIMOTHI 4 - NIEMNYAN Naga NT (BSI)

Amõang Hethôte

¹ Asâthôanju ma sâpoangpoang hongjab eka, athôan sanpoatko khuka hehma Joban nâng putedâlem pa jek erea; thinma mothô khoanglepju ngin ekep a, ngale joak ajo ma chenni hethôeka nginpa ekepwak a.

² Arerãngrãng ngin heh mihdiap phhekchhahte mihnyan hehma hethôeka, ngale thinhung pa jankham ma ritsoatwah rãngrãng riitah.

³ Arerãngrãng mihnyan hehma dihiak kep pemin achhih ngale wanwanthe phhekchhah pemin lephhek lechhah thin tonga ngama nginmõang heh phoangthôeka. Rohkomin ere phhekchhah heh Joban nâng putedâlem lahma toangtang jette mihnyan hehma Joban nâng dangkoh a ngatdiko phhekchhah rãng Joban ma hôaneka.

⁴ Joban ma chentô hôantah a ereheh phangtang asen tuta; chenjô phethin aho, rohkomin chentôpa Joban nâng dangkoh a ngat rangsoam nungma kepmin,

⁵ chenrãngma ngako, Joban jabkhab ngale Joban nâng dangkoh a ngat rangsoam junko chentôpa sâsiet eka.

Jisu Krista Rãngma Haasen

⁶ Nangma are ngin heh putedâlemte mihnyan hehnâng merîn mekhah oko, nanga Jisu Krista rãngma haasen edango, ngale erohkoba nangmin putedâlem jabkhab pa keplohma Ju nâng asen edango, ngale nangnâng hethô eho toangtang jabkhab pa nangma kepeko ngama ekhesok o.

⁷ Rohkomin Joban nginkong ledang tewa nginchha heh nekthômîn, ereheh thômîn pa sekho. Erenoma nangdede chenroh Joban jette roandông jiendôngmin a ngama latriio.

⁸ Phoang nâng trening keppa phoang rãngma asen, phumma Junâng trening mekep eko erepa chentô rãngma asen, chenrãngma ngako, Junâng trening keppa athângwah roandông komin ngale khediwah roandông komin nãngma rangkepmin.

⁹ Arepa toangtang jabkhab, erohwah nangma senthemthem putedâlem lohma kep o.

¹⁰ Nima latrii lihma chaanrii moeki, chenrãngma ngako, nãngma ahin Joban nâng tok anaa eki, ate jôba chentô Pângte, ngale ajahthem pejô henhenma atenâng putedâlem eka ereheh Pângte.

¹¹ Thinnâng are ngin heh rîn akhah lohma hethôo.

¹² Henmejô nangnâng leputedâlem nekchen dangeho, chenrãngma ngako nanga paangmihthu, rohkomin putedâlemte mihnyan hehnâng nangma, jab ajâ, jat apat, hun achet, putedâlem, ngale sâpoangpoang danglohma khesok o.

¹³ Nga makaka, nang sanpoat le chaan amân heh nok atang hehnâng Joban nyapraang heh weihko lohma tongo, ngale Joban ngin heh thôkoh, ngale hethô lohma tongo.

¹⁴ Nangma Ju chaanchoh eko pemin kep o, ere Ju chaanpa nangma chohmako Mõng hehma thôwah ngale khhepho phannang hehma nang khohko thin dekma sahlo lahma rangsoam koh poatko kohwah.

¹⁵ Ere moatlem heh nangma hungkoh lohma mo o, erohkoba anga ngama nangma moatlemsen moeko pa ekhea.

¹⁶ Nang-dede jetlohma tongo, ngale nangma hethôeko hehmin jetlohma hethôo. Are moatlem heh lejek thangma mo o, chenrãngma ngako, nangma aroh memo oko, nangdede khomin epeo, ngale nang ngin tatte hehmin kho epea.