1 TIMOTHI 3 - NIEMNYAN Naga NT (BSI)

Asâthem heh Khhepho Phannang

¹ Arepa toangtang jabkhab: Henma komin atea Asâthem heh khhepho phannang dâng mehun ako atema moatlem senthôan moatrãng huneka.

² Asâthem heh khhepho pa chenni nângjô chhih aho dângmin; ate tangnyu min wathelolo dângmin, hungnoap rinnoap, atedede hung tâmông loatte, ngale khô alemko moatte dângmin; ngale ate humnâng mihwun heh tãngroo lahma jekthuk hunte dângmin; ngale atema mihnâng jien hethôte dângmin;

³ atea khemmok chempa ngale pong apa ledangmin, rohkomin numnene ngale mêmo mihnyan dângmin; ngale atea ngun nâng nyahrãng hunte ledangmin;

⁴ ngale atea humte tangkâ heh senthemthem jienkhêmte dângmin, ngale ate chhu achha hehmin ate nginkepkep jienrînte dângmin.

⁵ Chenrãngma ngako atema humte tangkâ heh senthemthem lejienkhêm medang ako, atema Joban nâng putedâlemte Asâthem heh jãtanga meroh jienkhoakhêm min a?

⁶ Ngale atea arohroh Joban Niemarang pa kepnyante min ledangmin, eroh medang ako atemin ngam apoarii lahma juchhih chhihjâtah rãngrãng echhihjâa.

⁷ Atenâng Asâthem heh chhangwah ledangte mihnyan hehmemin nginkepkep chendanga, erohkoba atema rêsê lechohmin ngale juchhih benâng leta mãnrii edanga.

Asâthem heh Moatlem Moatte

⁸ Asâthem heh moatlem moatte heh jatsen patsen ngale nyahrãng hungkoh lahma moatte dângmin; thin a nyahrãng khemjokte ngale ngun nâng nyahrãng chhahnyoak ledangmin;

⁹ thinma hungsâ danglahma Joban ma thinnâng loatjet thuktah toangtangma putedâlem nginpa senthemthem kepte dângmin.

¹⁰ Khebengko thinnâng thaksok rêmin, phumma thaksokko asen medang akoba, thinma chenmoa.

¹¹ Thin tangnyu heh min jatsen dângmin ngale mihmin lechhihthôte dângmin; ngale thin a chentô nâng hungnoap rinnoap ngale toangtangma moatte dângmin.

¹² Asâthem heh moatlem moatte tangnyu wathelolo jôba dângmin, ngale ate chhuchha erediko humte tangkâ heh senthemthem jienkhêmte dângmin.

¹³ Henhenma thin moatlem heh senthemthem moeka erehehma thinmîn sensiet eka, ngale chenni ranjô lechei thangma thinma Jisu Krista nâng putedâlem eka ngin heh thôwak eka.

Adongthôan Ngin

¹⁴ Ngama are sitipa nangnâng raangeki, Nga nang tânâng sitsiak echohmin kae ngama thonghun ekang.

¹⁵ Phumma Nga melektong angkomin, are siti pumma nãng Joban humkâ nâng chenroh molihma tôngmin a ereheh ejetthukho, ereheh dangeka ahîn Joban nâng putedâlemte Asâthem heh, ere Asâthem heh dangeka toangtang pa rôngsiet rãngma thõng rãngrãng.

¹⁶ Nãng rangsoam niem junko nãng roandôngko Joban nâng putedâlem lihma songtong ekipa adongthôan: Atea mihnyan nyuchha rãngrãng danglahma hôngwah, ngale Joban Juma atea toangtang ngama khesokwah, ngale erepa rangkhethung wah Joban ngintatte hehmemin khewah. Ate nginpa chentô diak akan nâng phoangthô kohwah, ngale hahtokkhoh phangtangma ate nginko pute wah, ngale atea rangkhethung nâng tôansiet wênwah.