1 TIMOTHI 1 - NIEMNYAN Naga NT (BSI)

¹ Nãng Pângte Joban ngale nãngma dâlem eki Jisu Krista ma chien junko, Jisu Krista moattat chhoante Pol ngewah-

² Timothi, nanga putedâlem junko Ngachha linlin rãngrãng keplihma raangeki: Nãng Wa Joban ngale nãng Teso Jisu Krista ma nangnâng ate mînchenchaan, hun achet, ngale mêmo chenkohho.

Amõang Hethô junma Ritngat

³ Chenthu Nga Misidonia katlem nâng dângpoatko roseptih rãngrãng, Ngama nanga Ifisus nâng mamtong mêngo ngama rosep eki. Enâng mihnyan khuthema ledangli ngin phoanghethô eka, ngale nangma ereheh jeksiet o.

⁴ Thinnâng tewa nginchha ngale te awi heh nginkong heh thômîn pa jek chenrewak a ngama thôkoh, ereheh metham thômîn eko chhiakmîn loloba ere e; erehehma Joban moatlem nâng chohsû mahhi, Joban moatlem pa putedâlem junma loloba tâmoatmin.

⁵ Are chien ekangpa hungsâma hun achetmîn, hungpun rinpun, ngale linlin putedâlem pa thinnâng chenhonga ngama chien ekang.

⁶ Khuka pa are hehwah ngakchhoan lahma thin lemkhô pa aba rãngrãng sekhota ngin heh phoangjab lahma lemkhô mahphe wakeka.

⁷ Thin a Joban niemarang hethôte rãng dânghun wakeka, rohkomin, thindede jabkhab pa thinma jetmah, ngale thinma chenni jetlahma jab eka erepemin jetmah.

⁸ Nangma ajet, Niemarang pa khôalem junko mekep eko asen.

⁹ Rohkomin arepa thônghunmin, Niemarang pa mihnyansen hehrãng hôan dangmah, Niemarang junko ledangte mihnyan, ngoan aliak, Joban lejette, ngale papi mihnyan, Joban Niemarang junko ledangte, Joban Ju ahote, mâmâ nyong awa ritphete, ngale mihphoang ritphete,

¹⁰ ngale dihiak dela kaamchhih moatte, dela rôande kaamchhih moatte, mihphoang huhloatte, mothô khoanglep thôte, ngale Joban Niemarang sen lelatnâng moatte heh rãngmeba hôaneka.

¹¹ Are hethôehi nginpa Joban ma Nganâng thôthukthang nginkongsen kowah choheki, are adongthôan Nginkongsen pa rangkohte Joban ma kohehi.

Joban ma Mînchen junko Dangkoh a ngat

¹² Ngama nãng Teso Jisu krista nâng dangkoh a ngaekang, chenrãngma ngako atema nganâng are moatlem heh moatrãng chaankoh ehang. Atema Nganâng asen ngama renlahma atenâng soam atôte dângthukdi dangkoh ngaekang,

¹³ khema nângjô Ngama aterãng mechhih jabtek komin, ba atenâng chêmsiet lekma mejõjêm tek komin. Rohkomin Joban ma nganâng nyahrãng mînchen ehang, chenrãngma ngako, Ngama leputedâlem poatko Ngama chenni moekanga erepa lejet thangma moatwah.

¹⁴ Ngale nãng Teso ma ate ngewah ajahthem mînchenchaan pa Nga khohnâng kohkat ehang, ngale Jisu Krista ngewah nãngkhu putedâlem ngale hun achet pemin kohkat ehang.

¹⁵ Arepa toangtang ngale senthemthem putedâlem lihma kepthin ngin: Jisu Krista hahtokkhoh ko papi mihnyan heh pepângrãng kaera. Phumma ere khukowah Nga a papi thôan,

¹⁶ Rohkomin Joban ma Nganâng nyahrãng mînchen ehang, erepa Nga a papi thôanjô medang angkomin Krista ma ate hung pa nyahrãng môngsiet lahma Nganâng mînchen pa khesok ehang, erepa khedi wah atenâng putedâlem lahma roantang roanjêng roandông chohte mihnyan hehma jetrãngma khesok eka.

¹⁷ Roantang roanjêng Lowang, chenthumin leriite ngale mitma lekheli wathelolo Joban - atemîn lolo jôba roantang roanjêng rãngma dongsiet lihma toak asân e! Amen.

¹⁸ Ngachha Timothi, Ngama are nginpa nangnâng thôkoh eki, ngale nang rãngma are nginpa khema thuma profisi thunnâng hôngjab katwah. Putedâlem rãngma senthemthem ran tâcheprãng are jabkhab heh ranloatmin chhahkhem heh rãngrãng kep o,

¹⁹ ngale nang putedâlem senthemthem dango ngale hung arin sâpoangpoang dango. Khuka hehma thinhung arin sâpoangpoang ledang thangma molahma thin putedâlem heh chhihsiet eka.

²⁰ Thinkhuchhang kowah heh dangeka, Himinaus ngale Alexender, phumma Ngama thin a joak ajo deknâng kohlekma chêmsietwak ekang; erejunko thinma Joban thãsê pa ejek a.