1 THISALONIKA 5 - NIEMNYAN Naga NT (BSI)

Teso Ngakkat rãngma Khoakhem letma tongla en

¹ Lemruchha heh, areheh chenre sanpoatko ngale chenre rangkuh sanha nâng dângmin a erepa nekhu nâng chêmraangthin dangmah.

² Chenrãngma ngako nedede memin senthemthem jet en, Teso ngakkat pa rangpen nâng ahuhte hokwah rãngrãng dângmin.

³ Chenthu mihnyan hehma, “Chentô pejô mêmo ngale kho lâpetih,” ngama thonghun lahma dângko, lemlienma thinnâng chêmchei ehûa! Erepa lemlienma dihiaknyu naachhat rãng wok hôngchetwah rãngrãng ehong hûa, ngale mihnyan hehmin lepemin.

⁴ Rohkomin lemruchha heh, nekhua rangnyek khennâng dangmet, ngale erejâ Rangwo pumma ahuhte hokwah rãngrãng hûlahma nekchen patrii thuk ehèn.

⁵ Nekhu anga nga sanphiak nâng sôngtôngte mihnyan, ngale rangwo nâng tôngte mihnyan. Nãnga rangpen ba rangnyek nâng sôngtôngte mihnyan dangmih.

⁶ Erohwah, nãnga mihnyan ahan heh rãngrãng lejuplek min; nãngkhua lejuplek thangma met hin dângmin.

⁷ Ajuplekte mihnyan heh rangpen nângba juplek eka; ngale rangpen nângba khemma mokjok eka.

⁸ Rohkomin nãnga rangwonãng tôngte mihnyan, ngale nãnga met hin dângmin. Nãngma putedâlem le hun achetmîn pa lakkha rãngrãng keplihma tôngmin, ngale khope pa nãng khoko jankhophok rãngrãng phokmin.

⁹ Joban ma nãnga ate rinkhah thunko chêmritrãng rên dangmahhi, rohkomin nãng Teso Jisu Krista junma khope chohrãng ren ehi,

¹⁰ Chenthu ate ngakkat jâko nãnga riichoan metongla ekomin ba ahînthu metongla ekomin, nãng ate demnâng jienroam songrãngma atea nãngrãng riikoh ehi.

¹¹ Ngale erohwah athâng hehwah nema moeken rãngrãng, wathema wathe hung dongsietmîn en ngale chohsûmin en.

Athôan Rîn Akhah ngale Salam

¹² Lemruchha heh, nima nenâng rosep eka, nekhu Kristan roandôngpa asen dângrângma ne lemsênte ngale nenâng rîn akhah lahma nedemnâng moatte mihnyan hehnâng thonghun letma hun achhâ en.

¹³ Thinma are moatlemsen heh nekhu chhangnâng moatjunko thinnâng nyahrãng hun achet nungma khoakhem waken. Ngale nekhu dede tungnângmin mêmoma tongen.

¹⁴ Lemruchha heh, nima nekhu nâng rosep eka, ajõ hehnâng ritngat re en, chephoat heh hung dongsiet en, aboan anaa hehnâng chohsû en, ngale chentô demnâng hungmông sietletma tongen.

¹⁵ Henmin achhih demko achhih ngema nektoatmîn en, rohkomin chentô sanpoat roakweih wathema watherãng ngale chentô mihnyan rãngma asenli tuta moatrãng thonghun en.

¹⁶ Roantang khuhah nâhah dangen,

¹⁷ Sanpoat roakweih rangsoam en,

¹⁸ Chentô rangkuh sanha roakweih Joban nâng dangkoh a nga en. Ngale ne roandôngpa Jisu Krista demnâng roamletma areheh Joban ma ne roandôngko moat huneka.

¹⁹ Asâthôanju ma moatlem moatpa nekjek tangen;

²⁰ Profisi hôan ekapa lekep nekdangen.

²¹ Rohkomin athaksok re en: Phumma asen senpa kepen

²² ngale achhihli chentôpa aphe re en.

²³ Nãngnâng mêmo kohte Joban pumma nekhumin chentô nâng sâpoangpoang chendang thukhèn, ngale nãng Teso Jisu Krista ngakkat jâko nekhu - Ju amoang, hung arin, ngale phoang aroang heh phangtang - chennijô ngek atek ngale theabe aho chendang thukhèn.

²⁴ Ne roote pumma areheh emo kohhèn, chenrãngma ngako atea putedâlemli.

²⁵ Lemruchha heh, nirãngmin rangsoam kohhi.

²⁶ Chentô putedâlemte heh mêmoma deksit pekmîn letma salem kohmîn en.

²⁷ Ngama Teso chaanjunko are sitipa chentô putedâlemte mihnyan hehnâng weihkoh en ngama rosep eka.

²⁸ Teso Jisu Krista mînchenchaan nekhu demnâng chentonghèn.