1 THISALONIKA 2 - NIEMNYAN Naga NT (BSI)

Thisalonika nâng Pol ma Joban Moatlem Moat

¹ Lemruchha heh, nedede memin ajet ni netânâng chohmîn hûeri pa mahto nâng dangmah.

² Nema ajet nia netânâng Thisalonika nâng hokmako Filipien nâng hôanjôan lahma rêsê râthangthi. Ngale ni lelatnâng mihnyan heh ajahjô mehong akomin, Joban ma nihung dongsiet lahma ate ngewah Nginkongsen pa nenâng thôkoh eka.

³ Nihung nâng mõang atoang ba hungngek rinngek danglihma nenâng roatsep dangmah, ngale nima henjô diapchhahmih.

⁴ Erenoma, roantangma ninâng Joban ma chenroh jabthuk hun ehia eroh rângjab e, chenrãngma ngako, nima Nginkongsen pa taphoangthôa ngama atema punkhe lahma ninâng thôthuk ehi. Nima mihnyan rinmethuk hunmih, nihung nirin thatsokte, Joban rinmethuk loloba huneki.

⁵ Nema senthemthem ajet, nia netânâng hokko nginmõang heh thôlihma hûho, ngale ninâng chenchoh sûhi ngama diapthôrii lihmamin hûho - Arepa Joban memin ajet!

⁶ Nima henwahjô rô hunmih, newahmin hunmih, ngale henwahjô hunmih,

⁷ Jisu Krista moattat chhoante dângjunko, nima newah chenta thatah. Rohkomin, chenthu nia netânâng dângpoatko nedemnâng numnene danglihma tôngwah, nyong ma ate chha heh rângkhoakhem arãngrãng numnene danglihma tôngwah.

⁸ Nima nekhu nâng nyahrãng huneka! erohwah nima nekhu nâng Joban Nginkongsen pelolo thôhokkoh ledang niroandông pemin nerãng kohhunwah.

⁹ Lemruchha heh, nima chenroh chêmrii lihma motih a ereheh linlinjô nema thonghun thêm en, nima nenâng Joban Nginkongsen pa thôhok kohko nenâng chenni ngemajô nekchen chêmsiet eka ngama thonghun lihma rangwo rangnyek moatwah.

¹⁰ Arepa toangtang ngama nememin ajet, ngale Joban memin ajet, Joban nâng putedâlemte nekhu tânâng dângko nia sâpoangpoang, toangtang, ngale chenni nângjô lechhih thangma tongwah.

¹¹ Nema ajet, nyong awa hehma thin chhuchha hehnâng chenroh dangeka rãngrãng jôba nimin nekhu demnâng dangeki.

¹² Nima nehung dongsiet eka, ngale senthuk eka, ngale neroandôngko Joban rinmeli dangletma songtongen ngama rosep eka, chenrãngma ngako, Joban ma ate Hahsông theko ate mîndôngko johroamrãng nekhu nâng rooehèn.

¹³ Ngale lihân junmemin nima Joban nâng roantangma dangkoh a ngaeki. Erepa chenthu nima nenâng Joban nginpa kephok kohko, nema erepa tatletma mihnyan nyuchha ngin ngama ledang alinlin Joban nginkong ngama kep eken. Chenrãngma ngako Joban nâng putedâlemte hehnâng Joban Juma moeka.

¹⁴ Lemruchha heh, Judia wah Jisu Krista nâng putedâlemte ngale Joban nâng putedâlemte Asâthem hehnâng dangtah rãngrãngjô nenângmin dang ehèn. Thinma thin Jews mihnyan hehwah chêmchohtah rãngrãng, nemin nedede mihnyan hehwah chêmchoh eken,

¹⁵ Thinma Teso Jisu Krista ngale mõng hehmin ritphe wah, ngale nãngmin chêmthuk ehi. Thin demnâng Joban hungsenmah! ngale thin a chentô mihnyan heh lelatnâng achhih dangeka!

¹⁶ Thinma ninâng Jews ledangte hehnâng thin khope chohthin nginkongsen phoangthôkoh pa jektang ehi. Eroh thinma thinpap khohko pap dêchong moeka. Ngale ade phumma Joban rinkhah pa thin khohnâng kaera!

Pol Thin demnâng Ngakchoh Mînhok Hunwah

¹⁷ Lemruchha heh, chenthu nikhu nedemwah poattherãng taangmîn tihko - erepa hung arinwah taangmîn dangmih, phoangwah loloba taangmînwah - nima nekhu nâng nyahrãng thônghunjû, ngale nedemnâng nyahrãng ngakchohmîn huneka!

¹⁸ Nia netânâng ngakhok hunwah. Ngadedejô netânâng depdep ngakhokrãng phungwah, rohkomin joakma lemlaang komahhang.

¹⁹ Chenrohjô medang akomin, chenthu nãng Teso Jisu Krista katjâko nima khuhah nâhah dâlem lihma rângthô thinpa nekhu jôba dângmin - erepa mihhan henjô ledangmin.

²⁰ Linlinjô, nekhu junkoba ni thhensansan dangeki, ngale khuhah nâhah dangeki!