1 PITER 4 - NIEMNYAN Naga NT (BSI)

Hunglitchoan Roandông

¹ Krista ma phoangnâng chêmchoh wah, erohwah nememin Krista ma chenroh chêmchohtah a eroh chêmrãng thonghun letma nehung dongsiet en; chenrãngma ngako henhen phoangnâng chêmriieka erehehma papkaam momah.

² Erohwah ade phumma, are hahtokkhoh wah ne roandôngko mihnyan nyuchha hung arin junko ledang Joban hung junko songtongtu en.

³ Nema amako ajahthem sanpoat Joban lejette mihnyan hehma chenroh moeka eroh moletma lâlienthuktet. Ne roandôngko pong apa rãngrãng dangletma, dihiak nâng phetwân, khemmok, kuhhôan, jokphhek chhah, ngale ahôanwah moangachaang hehnâng soamtô letma dângwah.

⁴ Ngale ade phumma Joban lejette heh demnâng nekhua ama wah rãngrãng lejoh dangtu dâng phumma bârit rewak eka, ngale erohwah thinma nenâng mitchek ehèn.

⁵ Rohkomin ahînthu mihnyan ngale riichoante mihnyan heh rênte Joban nâng thinmemin thindede moatlem chenroh motah a erepa ekhesok a.

⁶ Erohwah Nginkongsen pa riichoante hehnângmin thôkoh wah, chenrãngma ngako thinma ahîn poatko chenroh motah a erejunko rên dikoba, thin Jupa Joban junko ehinwak a.

Joban Hînhô pa Senthemthem kepte

⁷ Chentô pejô athôan sanpoat pa lâhûtha. Erohwah nedede min hungmông rinmông, ngale jetletma dangen, eroh metong enkoba nema rang ejiensoam en.

⁸ Chentô nomemin adongpa, wathema wathe nâng nyahrãng hun achhâmin en, chenrãngma ngako hun achetmîn pumma jahmõang pap heh mumsiet eka.

⁹ Ne hum heh wathema wathe nâng lesi lenii thangma khuhah nâhah laangmînkoh en.

¹⁰ Anga ngama, Joban ma mâmâ jatjat hînhô koh ehèn heh senthemthem jienkepte rãngrãng dangletma, nema Joban ngewah chohtet hînhô heh mihhan hehrãng asen dângrãngma kepmin.

¹¹ Henhenma ngin phoangthô eka ereheh memin Joban nginkongsen pa chenphoang thôa; ngale mihnâng chohsokte hehmemin Joban ma kohthen chaan junma chohsû en, eroh medang enkoba Jisu Krista junma chentô ngema Joban mîn edonga, chenrãngma ngako, ate jôba mîndông chohte ngale roantang roangjêng rãng chaan ahang demnâng tongeka. Amen.

Kristan dângjunko Chêmchoh

¹² Ngama nyahrãng ahun Ngalemruchha heh, nema nyahrãng chhâwawa chêmchohko, arerãngrãng chêmte mathatchoh ekang ngama nekpatrii en.

¹³ Erenoma nema Krista demnâng atema chêmchoh tahko johchêm ekang ngama thonghun letma rinroan en, erohkoba chenthu Krista mîndong lahma hôngkat jâko nemin nyahrãng khuhah nâhah edangen.

¹⁴ Nea Krista dijunte dângdi mihhehma mechhihchoh hènko nema rang ekepen; ngale Joban Ju, mîndongthôan Jupa nekhoh nâng tongka ehèn.

¹⁵ Ngale nema mihritphedi, ba ahuhdi, kaamchhih moatthã, ngale mih chhahkhem nâng phoang nyenmîndi nekchenchêm eken.

¹⁶ Rohkomin nea Kristan dângdi chêm mechoh enko, nekrêsê en, Joban nâng dangkoh a ngaen, chenrãngma ngako, nema Krista mîn kep eken.

¹⁷ Achhih le asen rên sanpoat pa lâhûtha, ngale Joban mihnyan hehnâng khebeng thôanko bengrênmin. Phumma nãngnâng mebengren hiko, Joban ngewah Nginkongsen ko lepute dâlemte mihnyan hehja chenroh dângmin a?

¹⁸ Joban nyapraangma ngaeka, “Mihnyansen hehmemin khope chohrãng alat medang ako; Joban lejette papi mihnyan hehja chenroh jienpe min a?”

¹⁹ Erohwah, Joban hung junko thinma chêmchei mechoh ako, thin têm atiakte Joban nâng senthemthem chendâlem wak a, ngale thinma kaamsen chenmo wak a, chenrãngma ngako, thin têm atiakte Joban ma thinnâng rangkohrãng toamsem tahpa chenthujô themah.