1 PITER 2 - NIEMNYAN Naga NT (BSI)

Ahîn Long ngale Asâthôan Mihnyan Nyuchha

¹ Erohwah, nededema chentô achhih hehwah taangen; mothô khoanglep, mihphetwân, erediko mihnâng dûmmek jabkhab heh nekjabtu en.

² Naajengchha hehma roantangma nyong nyuhpoti linlin pa chhahhun rângdang arãngrãng, nememin neju rãngma Ju nyuhpoti linlin pa chhah en, ngale nema eroh mejok en koba dongletma kho epe en.

³ Joban nyapraangma ngaeka, “Nema Teso pa linlinjô chentôsên a erepa lâjettet.”

⁴ Teso tânâng hûren, atea ahîn long, mihnyan nyuchha hehma achhih ngama petphe eka, rohkomin Teso ma alemli ngama ren eka.

⁵ Ahîn long heh rãngrãng dangletma hunren, ngale nea Joban rangsoamhum hôanthin longrãng chenkep hèn, ngale ere humko soam aroakte Asâthôan dangletma nema Jisu Krista junma Joban nâng atema nyoakkepli joapsoap en.

⁶ Chenrãngma ngako Joban nyapraangma ngaeka, “Ngama alemli longpa ren ekang, Erepa Ngama Zion nâng alemli thôan longrãng thien ekang; ngale henhenma atenâng putedâlem eka ereheh chenthujô mahto nâng ledangmin.”

⁷ Henhenma putedâlem eken a ere hehrãngma ere longpa nyahrãng alemli thôan; rohkomin lepute dâlemte hehrãngma: “Humhôante mihnyan hehma achhih ngama petphe eka longpa chentô noma alemli thôan longrãng litdangeka.”

⁸ Ngale Joban nyapraang thehân nângmin aroh ngaeka, “Are long pumma mihnyan heh dakho ethutthuk a, ngale are longjan pumma ekôanriithuk wak a.” Thinma jabkhab ko lepute dâlemdi dakho thutwak eka; erepa Joban ma ate hung junko thin khohnâng eroh chendanga ngama moeka.

⁹ Rohkomin nekhua arênwah mihnyan nyuchha, ngale Lowang rãngrãng soam aroakte, Asâthôan mihnyan nyuchha, Joban mihnyan linlin, ngale Joban ma patritli moeka heh phoangthô kohrãng ren ehèn, ngale atema rangnyek khenwah atedede patritli wenphiak ko loatsietkat ehèn.

¹⁰ Poattheko nea Joban mihnyan ledangwah, rohkomin ade phumma nea Joban mihnyan lâdangtet; poattheko nema Joban mînchen pa lejetwah, rohkomin ade phumma nema Joban mînchen lâchohtet.

Joban Haa

¹¹ Ngalemruchha heh, Nga a are hahtokkhoh ko mihwun ngale hum ahah ahote rãngrãng danglekma nenâng rosep eka! Hei angem phoangma huneka junko nekdangen, ereheh roantangma nangju demnâng ran rãngrãng danglahma loatmîn eka.

¹² Joban lejette heh mathahko ne jat apat heh sênmõang dangen, erohkoba chenthu thinma nenâng kaamchhih moeken ngama mesekham hènko, nema kaamsen moeken heh thinma chenkhe hèn, ngale erohkoba thinma Joban ngakkatjâ Rangwo ko atenâng erôa.

¹³ Teso rãng sênrângma chentô mihnyan nyuchha thôte jabte heh khenko thin nginkepkep dangen: Anga nga noma adongthôan Chofa khenko ate nginkepkep dangen.

¹⁴ Ngale govono heh, thin a chentô kaamchhih moatte hehnâng phheksiet nâsiet hôanrãng, ngale kaamsen moatte hehnâng rôrãng thien eka.

¹⁵ Chenrãngma ngako nema kaamsen moletma mihnyan chhih hehma aba rãngrãng phoangjab eka heh kihsietrãng hun ehèn.

¹⁶ Ne hungsiko songtongen, rohkomin ne hungsiko songtong letma kaamchhih nekmo en, Joban haa rãngrãng dangletma songtongen.

¹⁷ Anga nga demnâng asen tuta dangen, putedâlemte ahan hehnângmin hun achhâ en, Joban dongthuk en, ngale Chofa rancheichei dangen.

Krista Chêmchei Thakthô

¹⁸ Haa hehma mâmâ dede tângtewa nginkepkep dângmin ngale thinran nyahrãng cheiletma khesok en, erepa nenâng hun achette ngale mînchênte hehnâng lolo ledang, nedemnâng achhih dângte heh demnâng min erohjô dangen.

¹⁹ Nema ledangli nâng chêmchoh ekenpa metadô enko, Joban ma nenâng rang ekohhèn, chenrãngma ngako nema Joban nâng thonghun eken.

²⁰ Chenrãngma ngako nema kaamchhih moatthã mewat hènko nema chenni echoh ena? Roh akomin nema kaamsen moattha chêmchei chohletma metadô enko, Joban ma erethã nenâng rang ekohhèn.

²¹ Eroh moatrãng jôba Joban ma ne rooehèn, chenrãngma ngako Krista atedede min nekhu rãngma chêmchoh wah ngale atema nekhu nâng eroh mo en ngama khesok ehèn, erohkoba nemin ate damãnko nekletma ate rãngrãng etadangen.

²² Atema pap moho, ngale henmemin ate thunkhap wah mothô loatjab lahma chohtat ho.

²³ Chenthu mihnyan hehma atenâng dûmmek poatko, atema thinnâng jabkhab chhih ma ngakdân jabho; Chenthu atema chêmchoh poatko, atema ran ngakchâho, rohkomin atema toangtangma rênte Joban nâng lolo dâlem wah.

²⁴ Krista ma atedede phoangko nãngpap heh bãngphak khohko hènphetah, erohwah nãngma pap moatpa jeklihma toangtang danglihma sôngtôngmin. Ngale ate phoang wah mâmãn junko nekhu khoanchet sen eken.

²⁵ Nea lem môangphete saak heh rãngrãng dângwah, rohkomin ade phumma saaksokte ngale ne Ju heh bemte dijun rãng lângak sietthen.