1 KORINT 8 - NIEMNYAN Naga NT (BSI)

Moang nâng Phhekchhah kohrãngma Chhien

¹ Ade dangeka nema moangachaang nâng phhekchhah kohrãngma chhienthapa. Thinma ngatah rãngrãng, arepa nginlinlin jôba, “Nãngkhu chentôma ajet.” Rohkomin arerãngrãng jet ajien eka pumma mihnyan pa ngamritthuk reka; rohkomin hun achetmîn pumma nângkhu rongsiet ehi.

² Henma komin ngama jôba jet ekang ngama thonghun eka erepumma chentô jetthin a erepa takhem jetmah.

³ Rohkomin henma Joban nâng huneka, atenâng Joban ma jeteka.

⁴ Erohwah, moangachaang nâng kohwah phhekchhah chhahjunko dangeka: Nãngma ajet linlinko moangachaang pa ahînte dangmah; Nãngma ajet Joban pa wathe lanlan jôba tonga.

⁵ Rangkhethung nâng dangkolah ba are hahtokkhoh ko dangkolah “joban” ngama jahmõangjô metong akomin, ngale ererãngrãng “joban” ba “teso” ngamajô metong akomin,

⁶ Joban pa wathelolo jôba, erepa nãngkhu Wa, atea chentôpa têm atiakte, ngale ate junma nãngkhu hin joeki; ngale Teso min wathelolo jôba tonga, erepa Jisu Krista, ate junma jôba chentôpa têm atiekwah, ngale ate junma jôba nãngkhu hin joeki.

⁷ Rohkomin chentôma are toangtang nginpa khêmjetmah. Khaka mihnyan hehma moangachaang nâng nyahrãng soamtô eka, thenep thejâ tumin thinma chhah eka phhekchhah pa moangachaang nâng kohwah phhekchhah ngama thonghun eka; Arepa thinhung arinma letajet dâng phumma, thinma phhekchhah pumma ngeksiet ehi ngama thonghunwak eka.

⁸ Phumma phhekchhah junma nãnga Joban tânâng tasiet hûmahhi; ngale nãngma lephhek lechhah kikomin nãngwah chenjô mahchhoan mahhi, ngale mephhek mechhah ekomin nãngma chenmin bâmchohmih.

⁹ Erohwah, henjô medang enkomin, jetletma dangen, nekhuma nekhu hungsiko phoangmoat akat junma putedâlem nâng arinte heh papnâng nekchen jâriieka.

¹⁰ Chenjô akomin, nangma “Jetlohma” moangachaang nâng soamthin rangsoam humko phhekchhah lohma putedâlem nâng arinte mihnyan pumma lâkhetho; phumma erejunko hungdong lahma atema moangachaang nâng kohwah phhekchhah pa lechhah minne?

¹¹ Ngale nangpho anaa putedâlem nâng arinte rãngma Krista ritwah, phumma ere wapa nangma “Jet eko!” junma chhihjâ erea.

¹² Ngale erejunko nangma Krista rãngma pap moeko, ngale Kristan mihnyan ahan hehrãngmin pap moeko, erediko putedâlem nâng arinte heh hung arin chêmsiet eko.

¹³ Erohwah, phhekchhah pumma putedâlemte pa pap medangthuk ako, ere putedâlemte pa pap ledang thukrãng, ngama chenthumin ngem phhektumek.