1 KORINT 7 - NIEMNYAN Naga NT (BSI)

Janchhô Paangmih Kepmîn rãngma Chhien

¹ Ade, nema nganâng siti nâng raangletma thôngphâtha nginpa dangeka. Dela ma dihiak lekep medang ako asen.

² Rohkomin dihiak dela tungko ajahthem mihnyan hehma kaamchhih moat junko, chentô dela hehma mâmâ tangnyu keppa asen, ngale chentô dihiaknyu hehnângmin mâmâ tangwa chentonga.

³ Dela pumma ate tangnyu rãngma tangwa danglahma chenroh moatthin a erepa moatmin, ngale dihiak pummemin ate tangwa rãngma tangnyu danglahma chenroh moatthin a erepa moatkohmin, ngale wannii latma wathema wathe rinmê thukmînmin.

⁴ Tangnyu pa atedede phoang khohko tângte dangmah, ngale ate tangwa peba ate tangnyu phoang khohko tângte; ererãngrãng tangwa pemin atedede phoang khoko tângte dangmah, ate tangnyu peba ate tangwa phoang khohko tângte.

⁵ Nechhe dedema rangsoam sanpoat keprãng sanpoatthe leroamjup thangma taangru tongmênge ngama punthômîn letma ledang kenko, wathema wathe nâng nechhe phoangpa nekkhehmîn en; rohkomin erediko jengrewah tangnyu tangwa roamjup roamtông rãngrãngjô ngakroam jup atong en. Eroh medang enkoba nema hun poatko joaknâng leta jâsietrii etadangen.

⁶ Arepa ngama nenâng metkep dangen ngat dangmah, rohkomin aroh medang enko asen edanga ngama thôkoh eka.

⁷ Linlinko ngama hun pa nekhu phangtang nga rãngrãng tuta danglet mele ngama huneka; rohkomin chentô nâng Joban ma mâmâ jatjat hînhô kohlahma tonga, wathe nâng jatthe ngale ahan watheko jatthe kohlahma tonga.

⁸ Ade dangeka ngama tang masongte ngale janthoinyu hehnâng thôkoh eka, nga rãngrãng nemin nelolojô metong enko asen edanga.

⁹ Rohkomin nema hei angem ma hun ekapa leta jeksiet medang enko, kepmîn re en - hei angem ma hun junko wênrit noma tangsông pa jôba asen.

¹⁰ Tangsong choante hehrãngma ngama thôkohthin tonga, phumma arepa ngadede wah thôkoh dangmah, Teso ngewah thôkoh eka: Tangnyu pumma ate tangwa pa chenthumin lethînphemin;

¹¹ atema eroh methînphe ako, atea tangwa ahannâng lethe ngakwãng thangma tôngmin, ba ate tangwa demkojô chenthe ngaksenmîn a; ngale tangwa pumma ate tangnyu pa lechiakphemin.

¹² Ahan hehnângmin ngama thôkoh ekang (Teso ngewah ledang ngadede wah thôkoh eka): Kristan delawa tangnyu pa Joban nâng putedâlemte ledang danglahma ate tangwa demko aroam mejô sông mehun ako, tangwa pumma chenthumin lechiakphemin.

¹³ Ngale Kristan dihiaknyu pa Joban nâng lepute dâlemte delawa nâng wãng lahma ate tangwa pa ate demnângjô aroamma roamsông mehun ako, tangnyu pumma ate tangwa pa lechiakphemin.

¹⁴ Chenrãngma ngako Joban nâng lepute dâlemte delawa pa ate tangnyu demko aroamma dângdi Joban ma kepeka, ngale Joban nâng lepute dâlemte tangnyu pa ate tangwa Kristan demko aroamma dângdi Joban ma kepeka. Aroh lekep medang ako, thin chhuchha pa Joban lejette heh chhuchha rãngrãng dângmin; rohkomin, thin a Joban ma kepeka.

¹⁵ Ngale, Joban nâng lepute dâlemte pumma Kristan pa chiakphe mehun ako, chenchiakphe mîn a. Are nginko, dihiak memin ngale dela memin Kristan pumma ate hungsi junko tamoa. Chenrãngma ngako Joban ma nea mêmoma sôngtôngrãng rooehèn.

¹⁶ Kristan tangyu, nangma nang tangwa kho tapesietmek ngama chenroh jienjet eko? Ngale Kristan tangwa, nangmemin nang tangnyu kho tapesietmek ngama chenroh jienjet eko?

Joban ma Roo ehèn Rãngrãng Songtongen

¹⁷ Nekhu anga nga Joban ma hennâng chenroh songtongthuk ehèn a eroh songtongen, ngale Joban ma chenroh sôngtôngrãng roothen a erohjô songtongen. Are niemarang pa ngama chentô Asâthem hehnâng phoangthôkoh ekang.

¹⁸ Khoankhen niem hôanchoante mihnyan pumma Joban ma rooeka junko mekep ako, ate phoangwah khoankhen niem hôantah mãnpa nekchen mahsiet eka; ngale khoankhen niem mahôan mihnyan pumma Joban ma rooeka pa mekep ako, ate memin khoankhen niempa lehôan tumin.

¹⁹ Chenrãngma ngako, mihnyan pumma khoankhen niem lehôan medang akomin ba mehôan akomin erepa chenjô dangmah; Joban nginkep peba adongthôan.

²⁰ Nekhu anga ngama Joban ma roopoatko chenroh dangletma keptet a, erohjô mamdangen.

²¹ Nea Joban ma roopoatko haa dângwahne? Haa dângwahjô medang enkomin, chenijô dangmah; rohkomin haa dângwah jekthin lemkhô metong ako, jek en.

²² Chenrãngma ngako Teso ma mihhaa dângwah rooeka erepa Teso rãngma haa dangmah; ererãngrãng haa ledangte hehmin Krista ma rooeka heh Krista haa.

²³ Joban ma nea thãma riakwah; erohwah mihnyan haarãng nekdangen.

²⁴ Ngalemruchha heh, nekhu anga ngajô Joban ma nekhu roothen poatko chenroh dangtet a ererãngrãngjô Joban demnâng roamletma tongen.

Dela nâng lewãngte ngale Janthoinyu hehrãngma Chhien

²⁵ Ade dangeka nekhuma dela nâng lewãngte hehrãngma raangletma thôngpha thepa dangeka: Ngama Teso mînko chenjô ngatthin aho, rohkomin, Teso mînchen junko nganâng putedâlemli danglekma ngadede ngewah thôkoh eka.

²⁶ Athângwah chêmchohko methak eko, dela pa athângwah rãngrãng metong ako asen ngama thonghun ekang.

²⁷ Nanga dihiak keptohne? Eroh medang oko nang tangnyu demwah thînphemîn rãng nekthonghun. Nanga dihiak makepne? Eroh medang oko nangrãngma tangnyu nekchêmlem.

²⁸ Rohkomin nangma dihiak mekep oko, erepa papmoat dangmoh; ngale janchhônya pa dela nâng mewãng ako, ate memin papmoat dangmah. Rohkomin Ngama nenâng thôkohpa tangsõng choante mihnyan hehma rangwo roakweih chêmchoh eka heh nekchenchoh eken ngameba ngaekang.

²⁹ Ngalemruchha heh, ngama ngaekang pa are junmeba ngaekang: Sanpoat pa ajah ahotu, ngale ade phumma tangsông sôngte mihnyan hehmin, tang masongte mihnyan heh rãngrãng edanga;

³⁰ ngale asepte hehmin, hung lechhihma sepwah rãngrãng edanga; ngale angitte hehmin, khu lehahma ngitwah rãngrãng edanga; ngale chhahkhem riak achâte hehmin, thinma riitah chhahkhem pa thinthiak rãng riakwah rãngrãng ledangma edanga;

³¹ ngale chhahkhem wanlem riiacha lahma kepte hehmin, lekepwah rãngrãng edanga. Chenrãngma ngako, athâng hehwah hahtokkhoh pa, ajah leta lektong tumin.

³² Ngama nekhu sekmah patrit hehwah taang chenre en ngama huneka. Tangsông lesongte mihnyan pumma Teso moatlem nânglolo hung ekoh a, chenrãngma ngako atema Teso rin methuk huneka.

³³ Rohkomin dihiak kepchoante mihnyan pumma hahtokkhoh moatlem nâng ajah sekmah eka, chenrãngma ngako, atema ate tangnyu rin methuk huneka;

³⁴ ngale atea lemkhô khôniima esiet a. Tangsông lesongte dihiak ba janchhônya hehma Teso moatlem nânglolo hung kolahma emoa, chenrãngma ngako atema ate phoang ngale Ju wanniinii Joban rãnglolo moat huneka; rohkomin, tangsông sôngte dihiaknyu pumma are hahtokkhoh wah moatlem hehrãng sekmah patriieka, chenrãngma ngako, atema ate tangwa rin methuk huneka.

³⁵ Ngama are jabekang pa nenâng chohsok hunlekma jabekang. Ngama nekhoh nâng aroh jôba dângmin ngama metkeploat dangmek. Erenoma, ngama chenpa asen a ngale apun a erepa jôba moathun ekang, ngale nekhu sanpoat pa lihân moatlem chenni nângjô lephema nekhu dede Teso nâng kohletma Teso moatlem chenmo en ngama huneka.

³⁶ Janchhô paangmih kepmînrãng kahkhetmîn lahma kepmîn lehuntu medang ako: Phumma paangmihpho pumma janchhônya mitsokko senthemthem dangmek lele mejetrii ako, ngale ate hei angem ko nyahrãng wenrii lahma kepmîn jôba asen ngama methonghun ako, thinma huneka rãngrãng, kepmîn chenrea. Eroh medang ako ereko pap aho.

³⁷ Rohkomin delawa ko atenâng metkep aroh jôba dângmin ngama lehôan nâng, ate dedema tangsông songmek ngama methonghun ako, ngale ate dedema hunlahma medang ako, erediko ate hung arinma chenni moathun eka erepa themawa choan medang ako - atema janchhônya pa lekepma tôngpa asen moeka.

³⁸ Erohwah tangsông sôngte delawa pa asen lâmotah, rohkomin tangsông lesongte pa ere nomemin asen moeka.

³⁹ Tangsông sôngte dihiaknyu pa chenthu tôko ate tangwa pa ahîn dangeka eretôko atea ate hungsiko jiendangmah; rohkomin ate tangwa pa rit mere akoba, atema hennâng huneka ere delawa ko eta ngakwãnga, rohkomin ere delawa pa Kristan medang akoba tâwâng min.

⁴⁰ Rohkomin, atea tangwa nâng lengakwãng metong ako, atea ajahthôan khuhah edanga. Arepa ngama thonghun lekma thôkoh eka, ngale nga ngewah lolo ledangma Joban Ju ngademko danglahma thôkoh eka.