1 KORINT 5 - NIEMNYAN Naga NT (BSI)

Asâthem Chhangnâng Dihiak Dela Kaamchhih Moat

¹ Athângheh, nekhu chhangnâng dihiak dela kaamchhih molahma tonga ngama chohtat ekang, arepa nyahrãng cheili, ngale arerãngrãng pa Joban lejette hehma tumin chhihmomah. Ngama chohtat junko mihwa pa ate nyongpien demnâng roamjup eka ngamatat ekang!

² Eroh medang enko chenroh jienngamrii eken a? Erenoma hungchhih ngale rêsê thinba metongen a, ngale arerãngrãng moatte mihwa pa nekhu demwah junloat rêmin.

^3-4 Ngale nga phoangko nekhu tâwah ataangnângjô medang angkomin, Junâng nga netânâng nedemnâng jôba; ngale nga nekhu demnâng phoangphoangma johtôngwah rãngrãng danglekma, ngama Teso Jisu mînko ere nyahrãng cheili kaamchhih moatte mihwa ko achhih ngaekang. Nekhu aroamma chohmîn poatko, Teso Jisu chaan nãngkhu demnâng tôngjunko ngajumin nekhu demnâng roamchohmîn ehèn,

⁵ Ate phoangpa chhihsiet rãng are mihwa pa nema joaknâng koh en, erohkoba Teso katjâ rangwo ko ate jupa etapea.

⁶ Nekhu ngamrit nekre en! Nema are nginthakthô pa jet en, “Wichhi phathe pumma pheban phangtang rângbietjâ thuk a.”

⁷ Wichhi apã patphewah rãngrãng newah pap pemin rephe re en, erohkoba phangtang asâ edangen. Erediko nemin wichhi aho pheban nyan rãngrãng edangen, linlinjô nea chenrãngrãnga erepa ngama lâjettah. Chenrãngma ngako, nãng Adankhoam lokuh pa lâthangtah, athângheh Adankhoam lokuh ko joatthin saakchha rãngrãng, Krista pa lâritphetah.

⁸ Nãngkhuma Adankhoam lokuh pa wichhi pãma sakwah bankên demnâng ledang wichhi aho bankên nyan demnâng kuh e, wichhi pãpa nãngpap ngale chentô achhih heh, rohkomin asâ ngale toangtang danglihma wichhi lesak bankên rãngrãng dange.

⁹ Ngama nenâng raangtah sitiko kaamchhih molahma môangte mihnyan heh demnâng nekroam en ngama thôkotah.

¹⁰ Rohkomin, ngama Joban nâng lesoam letôte mihnyan hehma chhihmo ekale, chhahnyoak, ahuh, ngale moangachaang nâng soam atôte hehwah taangen ngat dangmek. Thin tâwah taangrãng menga eko are hahtokkhoh wah metaangchhoan ekoba tâdângmin.

¹¹ Ngama nenâng thôkoh ekapa henma atemin Joban nâng putedâlemte ngalahma dihiak dela kaamchhih moeka heh, chhahnyoak, ngale moangachaang nâng soamtô eka, ngale mih sethôte, khemmok chempa dângte, ngale ahuhte heh demnâng nekjohroam en ngamaba thôkoh eka. Ererãngrãng mihnyan heh demnâng phhekchhah roamchhah rãng tumin nekjoh tongen.

^12-13 Chenrãngma ngako, ngama Joban lejette mihnyan hehnâng achhih ngatthin chenni etonga. Joban meba thinnâng achhih enga a. Rohkomin nekhuma nekhu dede demwah hehnâng achhih lenga minne? Joban nyapraangma ngaeka, “Nekhu demwah mihnyan chhihpa arephe re en.”