1 KORINT 13 - NIEMNYAN Naga NT (BSI)

Hun achetmîn

¹ Ngama chentô mihnyan nyuchha jabkhab heh mejienjab angkomin, ngale rangkhethung wah Joban ngintatte jabkhabjô mejienjab angkomin, nganâng hun achet pa aho medang hangko, nga jabkhab pa tamtin rahwat wah rãngrãng, ba chaangsi rahdohwah rãngrãng dângmin.

² Ngama Joban nginpa mihhung lanlitroh mejienthô angkomin; ngale roangrup metajet angkomin, erediko Joban junma chentô mejet angkomin; ngale hahkong pa lanta moatsietroh putedâlem metong hangkomin - nganâng hun achet pa aho medang hangko, nga a chenni rãngjô senmek.

³ Ngama nga ngewah chhahkhem heh phangtang mihnâng metakoh angkomin, ngale ngaphoangmin wennâng meta rokthhekthuk angkomin - nganâng hun achet aho medang hangko, erepemin ngarãngma sekhota.

⁴ Hun achet pa hungmông rinmông ngale mînchênwin; mihnâng phetwânmah, ngale atedede rângthôrii mah, erediko ngamrii mah;

⁵ Hun achet pa mihpoakliak dangmah, chhahnyoak min dangmah, erediko rinkhahla min dangmah; erediko hun achet pumma chhih akhahli heh hungnâng lekthienmah;

⁶ Hun achet pa chhih heh demnâng khuhah mah, toangtang demnâng ba khuhah eka.

⁷ Hun achet pumma chenthujô lekphemah; ngale ate ngewah putedâlem, dâlem, ngale hungmông rinmông dangeka pa chenthumin jekmah.

⁸ Hun achet pa roantang roanjêng rãngma dângmin. Joban nginpa mihhung lânlitjâroh ethôthem a, rohkomin erepa amahjâ erea; ajatjat jabma patritli jienjab lahma tonga, rohkomin erehehmin thôan erea; ngale jet ajien tadangthem a, rohkomin erepemin thôan erea.

⁹ Chenrãngma ngako nãngma jet ekile Joban ngin jienthô ekiheh lengkaba jeteki;

¹⁰ rohkomin chenthu phengtangma mejet tihko, mãnchha jettih heh mahjâ erea.

¹¹ Chenthu nga letachha thuko, ngajabkhab, hung arin, ngale ngama thonghun ekang heh phangtang letachha rãngrãng dângwah; ade phumma nga phannang lâdangtek, ngale letachha rãngrãng dangjeng tumek.

¹² Athângheh nãngma chenni khekia erepa dâpha sokminnâng minmôangraang kheritwah rãngrãng; khediko nãngma thhenphãng linlin echohkhe e. Athângheh ngama chenni jetkanga erepa mãnchhaba jet ekang; khediko ngama phangtang elaangjet ang - chenroh Joban ma nga senthemthem thôanlep ehanga ererãngrãng ethôanjet ang.

¹³ Rohkomin are wanrem kowah: Putedâlem, akhâ, ngale hun achet; phumma are wanrem kowah adongthôanpa hun achetmîn pa.