1 KORINT 12 - NIEMNYAN Naga NT (BSI)

Asâthôanju wah Hînhô

¹ Ade dangeka, Asâthôanju wah Hînhô choh junma siti nâng raangletma nganâng thôngphatha pa. Ngalemruchha heh, ere Hînhô junma nenâng toangtang pa jetthuk huneka.

² Nema ajet chenthu nema Joban lejet dangtet poatko, nema roandông ahote moangachaang hehnâng soamtô letma Joban tâwah lemke nâng taangchhoan letma dângwah.

³ Ngama nenâng arepa jetthuk huneka, henpa Joban Juma senlahma tongeka erehehma chenthumin “Jisu nâng têm athoak mah!” ngale chenthu Asâthôanju ma lechohsû kako henmemin “Jisu pa Teso,” ngama leta loatjabmin.

⁴ Ju wah Hînhô pa mâmâ jatjat chohlahma tonga, rohkomin mãnthe Juma jôba koheka.

⁵ Ngale mâmâ jatjat khô alemma soamtô lahma tonga, rohkomin mãnthe Teso pa jôba khoakhem lahma soamtô eka.

⁶ Ngale mâmâ jatjat chaan ahang junko soamtô lihma tonga, rohkomin mãnthe Joban ma tuta jôba chentô nâng kohlahma khoakhem soamtô eka.

⁷ Anga nga mihnyan nâng Jupa chenni ngema komin johtong lahma kheki, erepa chentô mihnyan rãng asenrãng johtong eka.

⁸ Juma wathe mihnyanko Joban nginpa buthi moangthêm kohlahma thôthuk eka, ngale ahan wathe mihnyanko ere mãnthe Ju pummajô Joban nginpa nyapjet nyapjien dangthuk lahma thôthuk eka

⁹ Wanthe ngale ere mãnthe Ju pumma jôba ahan wathe mihnyanko putedâlem sen dangthuk eka, ngale ahan watheko atema khoanchet sênsiet chaan koheka.

¹⁰ Ju pumma ahan watheko patritli moatlem moat chaan koheka; ahan watheko, Joban ngin phoangthô hînhô koheka; ngale han wathe komin, chenre hînhô pa Joban ngewah kaera, ngale chenrepa Joban ngewah dangmah a erepa jetloatchaan koheka. Ngale han watheko patritli jabkhab nyan jienjab chaan koheka, ngale han watheko erepa chenni nâng ngaeka erepa jienlit thôkoh chaan koheka.

¹¹ Rohkomin are chentô moatte pa wanthe ngale mãnthe Juma tuta jôba moeka; atema chenroh huneka, eroh atema anga nganâng mâmâ jatjat hînhô koheka.

Phoang Wanthe Ko Mâmâ Jatjat Moatlem

¹² Krista pa phoang wanthe ko mâmâ jatjat mit adek, phhek anâ tongeka rãngrãng; phoang wanthe ko mâmâ jatjat mit adek, phhek anâjô, medang akomin phoangpa wathe jôba.

¹³ Ererãngrãng, nãngkhu anga ngamin, Jews dangkolih, Jews ledangte heh dangkolih, mihhu mihhaa dangkolah, ngale mihhu mihhaa ledangte dangkolah, mãnthe Ju pumma wanthe phoang mînko baptijem kohehi, ngale nãngkhu anga nganâng Ju wanthejo kowah jokthuk ehi.

¹⁴ Chenrãngma ngako phoangpa jatthewah lolo hôan dangmah, phoang wanthe khenko mâmâ jatjat roaplahma hôaneka.

¹⁵ Dama, “Nga dek dangmek, erohwah ngaphoang demko roapmek,” ngamejô menga komin atea phoang demko leroap tadangmah.

¹⁶ Ngale nâma, “Nga mit dangmek, erohwah, ngaphoang demko roapmek,” ngamejô menga akomin atea phoang demko leroap tadangmah.

¹⁷ Phumma phoang phangtangma mit lolo medang ako, atema chenroh jientatmin a? Ngale nâ lolo medang akomin, atema tûm anêm pa chenroh jientatmin a?

¹⁸ Erohwah, Joban ma phoangko atema chenroh huneka eroh mâmâ jatjat hôaneka.

¹⁹ Chentôpa jatthe lolo dângno mako phoang pejô aho dângmin wah!

²⁰ Ererãngrãng, phoang wantheko mâmâ jatjat mit adek phhek anâ pa hôaneka.

²¹ Erohwah mit pumma dekko, “Ngama nang lemmih!” tanga mah, roh akole khoma dako, “Sen a, Ngama nang lemmih!” ngama eta nga a.

²² Erohwah, nãngphoang kowah chenrepa aboanthôan dangeka erepa aho thangma nãngma chenmin tamomih;

²³ ngale nãngphoang kowah chenrepa nãngma alemli dangmah ngaekia erepa nãngma ajahthôan chhuh achat lihma thien eki; ngale nãngphoang kowah chenrepa lesenkhe dangekia erepa nãngma ajahthôan chiem achei lihma thien eki,

²⁴ Ngale nãngphoang wah chenre pa phãngsenthôan a ere pumma min araangraang chhuh achat lemmah. Rohkomin Joban ma nãngphoang wah mit adek phhek anâ chentôpa aroh jienroam hôaneka chenni pa alemli lechhang danga erepemin alemli thôan rãng hôaneka.

²⁵ Ngale erohwah phoang wanthe khenko mâmâ khukhu dangmah, rohkomin phoang kowah chentôpa wanthe pumma wantherãng sekmahmîn wakeka.

²⁶ Phoang kowah wanthe mechêm ako, ahan hehmin phangtang ate demnâng johchêm eka; ngale phoang kowah wanthe merângthô ako, ahan hehmin phangtang ate demnâng khu johhah eka.

²⁷ Nekhu phangtang Krista phoangtuta, ngale anga nga ere Krista phoangko johroap eken.

²⁸ Joban ma Asâthem hehnângmin mâmâ moatlem mothuk eka: Abengthôanko moattat chhoante, erediko mõngama, erediko hethôte; erediko patritli moatlem moatte, erediko khoanchet mesietchaan chohte, mihnâng chohsokte, moatlem jienmoatte, ngale patritli jabma jienjabte.

²⁹ Thin chentôpa moattat chhoante dangmah, ba mõng amamin dangmah, hethôtemin dangmah. Ngale chentô nâng patritli moatlem moatchaan aho

³⁰ ngale khoanchet mesietchaan, patritli jabma jienjab, ngale ere jabpa jienlitthô chaan pemin chentô nâng aho.

³¹ Erohwah, chenpa alemli thôan hînhôa, ereko nehungkoh en. Rohkomin, ere chentô kowah asenthôan pa ngama ekhesok a.