1 KORINT 10 - NIEMNYAN Naga NT (BSI)

Moangachaang nâng Soam Jektâng

¹ Ngalemruchha heh, Mosa dijunte nãngte nãngwa hehnâng chenni dangtah a erepa nekhuma thonghun letmele ngama huneka. Thin chentôpa phoambuk khen pumma Josi Chek pa senthemthem pêdankhoam wah.

² Phoam-buk ngale Josi ko thin chentôpa Mosa dijunte rãng ngama baptijem kepwah.

³ Chentôma Ju phhekchhah pa mãnthe chhahwah

⁴ ngale manthe Ju jo jokwah. Thinma thin demko johwãngtah Ju longjan kowah jokwah; ngale ere longjan pa Krista dângwah.

⁵ Erohjô medang komin thinkhuwah ajahthem heh demnâng Joban hung lesen wah, ngale erohwah thinmang heh hahrankho jêngjêng nâng mahritwah.

⁶ Are chentôpa nãngkhuma jetrãng khesok ehi, ngale thinma huntah rãngrãng achhihpa lehunrãng ngaehi,

⁷ ngale thinwah khaka hehma soamtah rãngrãng moangachaang nâng lesoamrãng ngaehi. Joban nyapraangma ngaeka, “Mihnyan hehma kuhhôan lahma jokphhek chhah ekapa mokjok phhekchhah lahma dihiak dela kaamchhih moat kuhhôan rãngrãng litjâtueka.”

⁸ Thinwah khaka hehma motah rãngrãng nãngkhuma dihiak dela tungko kaamchhih lemomin-ngale eroh molahma jâtheko roaknii hahjatrem mihnyan mahriitah.

⁹ Nãngma Teso hung lethak toanmin, wanwanthe mihnyan hehma thaktoantah rãngrãng - ngale eroh tôandi thin a pûma ritkektah.

¹⁰ Thinkhu joangalintah rãngrãng nãngkhu lejoangmin - eroh jôangte heh rangkhethung wah Joban Ngintatte hehma ritphetah.

¹¹ Are chentô thinseknâng dangtah heh ahan hehma jetrãng dângwah, ngale ereheh nãngnâng jetthukrãng raangthienwah. Chenrãngma ngako nãnga athôan sanpoat pa hokthângko nyan eki.

¹² Nema nia rongtêngtêng chep eki ngama methonghun enko, lejâriirãng senthemthem jetletma rongchepen.

¹³ Nehung toan ehèn pemin mihhan heh hung chenroh toan eka ererãngrãng jôba toan ehèn. Rohkomin Joban ma toamsem eka, ngale nema leta dôli toanthuk mahhèn; nehung tôanpoatko, nema tâdôrãng atema chaan ekohhèn, ngale erekowah loatchhoanthin lemkhômin ekhesok hèn.

¹⁴ Erohwah, ngalemruchha heh, moangachaang nâng soamwah ataang re en.

¹⁵ Ngama nenâng hungchit rinchhem mihnyan ngama thonghun lahma thôkoh eka; ngama chenni ngin thôekanga erepa nededema jetlo en.

¹⁶ Nãngma Teso phhekchhah Niemko rângkep e bâti, ngale ere bâti rãngma nãngma Joban nâng dangkoh a rângngae: Chenthu nãngma ere bâti kowah jokko, nãnga Krista heiko johroam eki. Ngale nãngma bankên chhupsiet ekipa: Chenthu nãngma ere bankên kowah phhekko, nãngmin Krista phoang demko johroam eki.

¹⁷ Chenrãngma ngako bankên pa wanthe dangeka rãngrãng, nãngkhumin ajahjô medang ekomin, phoangtherãng lâdangtih, chenrãngma ngako nãngkhu anga ngama bankên wanthe kowah roamphhek eki.

¹⁸ Isrial mihnyan hehnâng thatthonghun tan en; henhenma soam aroak reka kowah phhek eka, erehehma soam aroak thekowah Joban nâng soam aroak ekako johroam eka.

¹⁹ Ngama moangachaang ba moangachaang nâng koheka phhekchhah pa chenni komin asen lenga ekanga?

²⁰ Eroh ngamek! Ngama ngaekang pa dangeka, joban ledang nâng soam roak ekapa joaknâng soam roak eka, erepa Joban nâng soam aroak dangmah ngaekang. Ngale ngama nea joak demnâng johroam thukpa hunmah.

²¹ Nema Teso bâti ngale joak bâti wanniinii wah taroam jokmet; ngale nema Teso demnâng erediko joak demnâng min taroam phhekchhahmet.

²² Roh akole nãngma Teso rinkhahthuk hunekia? Roh akole, nãnga ate noma achaan thonghunrii ekia?

²³ Erohwah thinma ngaeka, “Nima chentôpa tamoe.” Erepa linlin jôba, rohkomin chentôpa asen dangmah. “Nãngma chentôpa tamoe” - rohkomin chentôpa nãng toatchohte dangmah.

²⁴ Nekhu henmemin mâmâ dede rãnglolo asen pa lethonghun min, rohkomin mihhan rãngmemin asenli pa thônghunte dângmin.

²⁵ Nehung nâng lechêm thôngphâ thangma, ngem sengthin thenâng sengeka ngem chentôpa taphhek en.

²⁶ Chenrãng-ma ngako Joban nyapraangma ngaeka, “Hahtokkhoh ngale chentô hahtokkhoh wah pa Teso thiak.”

²⁷ Joban nâng putedâlemte ledangte ma phhekchhah chhahrãng roolahma nang ahok mehun oko, nang mako chenni thienkoh eho erepa nanghun nâng letûngmaang thangma phhekchhah o.

²⁸ Rohkomin nangnâng, “Arepa moangachaang nâng kohwah phhekchhah,” ngama wathema methôkoh hoko, nangnâng thôkohte rãng sênrãngma erediko nanghung sênrãngma, ere phhekchhah pa nangma nekchhah-

²⁹ erepa nangma thônghun junko dangmah, rohkomin mihhan pumma thonghun eka junko nekchhah. Eroh medang ako, khakama tachhien thêm a, “Ngama thonghun ekangpa mihhan junma chenroh jiendângmin a?

³⁰ Ngama nga phhekchhah rãngma Joban nâng dangkoh a menga angko, mihhan ma nganâng ere phhekchhah junma chenrãngma chhihngat thin etonga?”

³¹ Sen a, nema chenni akomin memo enko, ngale chenni akomin mejok phhekchhah enko, ere chentôpa Joban mîndôngrãng mo en.

³² Jews hehnângmin, Jews ledangte hehnângmin, erediko Joban nâng putedâlemte Asâthem hehnângmin hennângjô lechêmthuk thangma songtongen.

³³ Ngama chenroh moekanga eroh mo en; Ngama chentô moatlem moatroakweih anga nga hungsênthuk rãngma rângmo ang, ngale ngama ngadede rãngma sênrãngma rângthong hunmek, anga nga rãngma chensen a ngama rângthonghun ang, eroh medang akoba thin khomin eta pewak a.