1 KORINT 1 - NIEMNYAN Naga NT (BSI)

¹ Joban hungsi danglahma Jisu Krista moattat chhoante rãng roowah Pol, ngale nãngpho Sosthen ma raangeka-

² Korint hahwah Joban nâng putedâlemte Asâthem heh, ngale Chentô Joban nâng Asâma putedâlem rãng rooeka heh, erediko Jisu Krista demnâng roamlahma Joban rãng dangeka heh, ngale therupwah mihnyan nâng Teso Jisu Krista nâng soam atôte hehnâng raangeka. Jisu Krista pa thinrãng memin ngale nãngrãng memin Teso:

³ Nãng Wa Joban ngale Teso Jisu Krista ma nenâng mînchenchaan ngale mêmo chenkohhèn.

Krista Junma Rangkep

⁴ Ngama roantangma Nga Joban nâng nekhu rãngma dangkoh a ngaekang, chenrãngma ngako Jisu Krista junma atema nekhu nâng mînchenchaan pa koh ehèn.

⁵ Chenrãngma ngako Krista demnâng roamletma chentô nâng techhu lâdangtet, jab ajâ nângmin, ngale jet ajien nângmin techhu lâdangtet.

⁶ Krista nginkongpa nehung khennâng nyahrãng rongtêngtêng lâtongthen

⁷ Nema nãng Teso Jisu Krista loathông katpa bempoatko, wanthemin rang lekep thangma lienphemet.

⁸ Atema athôanjâ tôkotuk rongtêngtêng edangthuk hèn, ere junkowah, nãng Teso Jisu Krista loathôngkat Rangwo jâko chenni nângjô lethe edangen.

⁹ Joban nâng putedâlem min, ere Joban pumma ate Chha nãng Teso Jisu Krista demnâng aroamma dângrâng rooehèn.

Asâthem heh Tungnâng Mâmâ Dângjâ

¹⁰ Ngalemruchha heh, nãng Teso Jisu Krista chaanjunko ngama nekhu chentô nâng rosep eka, nema chenni jabeken a ereko hungjut letma mamkepen, eroh medang enkoba nekhu tungnâng mâmâ ledang edangen. Senthemthem jut ajaang letma tongen, hungthe rinthe, ngale moatlem katlem nângmin wanthe dangletma tongen.

¹¹ Ngalemruchha heh, chenrãngma ngako, Kloe humte tangkâ hehma nekhu tungnâng mênmîn reletma tonga, ngama nganâng chentôpa senthemthem lathôkoh thang.

¹² Ngama thôkohtan a: Nekhu anga ngama mâmâ ngingin thôeken. Wathema, “Ngama Pol dijun ekang”; ahan wathema, “Ngama Apolo dijun ekang”; ngale ahan wathema, “Ngama Piter dijun ekang”; ngale ahan wathe memin, “Ngama Krista dijun ekang” ngaeken.

¹³ Krista pa phaksiet re eken! Nekhurãngma bãngphak khoko rittepa Pol dângwahne? roh akole nea Pol dijunte dângrãng baptijem kepwahne?

¹⁴ Ngama Joban nâng dangkoh a ngaekang, chenrãngma ngako, ngama nekhu wathe nângjô baptijem kohho, Krispas ngale Gaius nâng loloba kohtek.

¹⁵ Erohwah, nekhu henmemin ngadijunte dângrãng baptijem kohwah ngama tajabmet.

¹⁶ (Edanga, Ngama Stifena ngale ate humte tangkâ hehnângmin baptijem kohtek; rohkomin ngama ahan nâng baptijem kohtek ale kohhoa erepa chohthong hunmek.)

¹⁷ Krista ma baptijem kohrãng chienkatwah dangmah hang. Atema nenâng Nginkongsen pa thôkoh rãngba chienkatwah, ngale ere Nginkongsen pa mihnyan nyuchha jet ajien jabkhab heh junma thôkohrãng dangmah. Mihnyan nyuchha jet ajien jabkhab heh jablekma methôkoh ako Krista bãngphak khoko riitah chaanpa ngama anyenwah rãngrãng dângmin.

Krista pa Joban Chaan ngale Joban Buthi Mongthem

¹⁸ Chenrãngma ngako henhen mahritte a ereheh rãngma Krista bãngphak khoko riitah nginkongpa aba ata ngin rãngrãng; rohkomin nãngkhu henhen khopete a ereheh rãngma arepa Joban chaan.

¹⁹ Joban nyapraangma ngaeka, “Ngama jet ajien buthi mongthem heh chhihsiet ere ang ngale nyapweih nyapraang dong dângte hehma jet ajien eka heh emah sietkoh ang.”

²⁰ Eroh medang ako, jet ajien heh chenkoa? ngale nyapweih nyapraang adong dângte heh chenkoa? ngale hahtokkhoh wah nginjet ngin jienthôan heh chenkoa? Joban ma are hahtokkhoh wah jet ajien eki heh aba ngama khesok eka!

²¹ Chenrãngma ngako, mihnyan heh thin buthi mongthem junma ate leta jetlorãng Joban ma hôaneka. Erenoma, are nima phoangthô eki nginko thinma “aba” ngaeka ko henhenma putedâlem eka ere mihnyan heh kho chenpe a ngama Joban ma ate buthi mongthem junko hôaneka.

²² Jews hehma putedâlem rãngma patritli moatlem khehun eka, ngale Griik hehma buthi mongthem lemeka.

²³ Nirãngma dangeka, rittek wah Krista nginpa phoangthô eki, phumma erengin pa Jews hehrãngma achhih dangeka, ngale Jews ledangte hehma aba ata ngin rãngrãng tateka;

²⁴ rohkomin henhen Joban ma rooeka, Jews dangkolah ngale Jews ledangte heh dangkolah, arepa Krista nginkong, ngale atea Joban chaan ngale Joban buthi mongthem.

²⁵ Chenrãngma ngako, chenpa Joban nâng aba rãngrãng khekia, erepa mihnyan buthi mongthem nomemin asen, ngale chenpa Joban nâng boan anaa rãngrãng khekia, erepa mihnyan noma achaan.

²⁶ Ngalemruchha heh, chenthu Joban ma ne roopoatko chenroh dângwah a erepa thonghuntan en. Mihnyan belem junko medang enko nekhuwah mãnchha ba jet ajien dângwah, chaanwin, ngale hahdaangko dongjat dângwah.

²⁷ Joban ma hahtokkhoh wah mihnyan hehma chenpa aba ngama huneka ereheh, hahtokkhoh wah jet ajien hehnâng rêsê thukrãng jetlahma ren eka, ngale hahtokkhoh wah mihnyan hehma boan anaa ngama huneka heh ahang lochaan heh rêsê thukrãng ren eka.

²⁸ Ngale hahtokkhoh mihnyan hehma lemlithôan ngama thonghun eka heh chhihsiet rãng atema chenpa hahtokkhoh mihnyan hehma thãjõ lembe jôannam eka, ngale hennâng sekhota ngama thonghun eka, ere mihnyan heh atema ren eka.

²⁹ Erohwah, henmin Joban mathahko tarângthôrii mah.

³⁰ Rohkomin Joban ma Jisu Krista demnâng lâroamsiet huthen, ngale Joban ma Krista pa nãng buthi mongthem rãng hôaneka. Krista junma jôba nãnga Joban demnâng toangtang dangeki; ngale nãnga Joban nâng putedâlemte mihnyan Asâ lâdangtih ngale lâpepângthi.

³¹ Erohwah, Joban nyapraangma ngaeka, “Henma komin rângthôrit mehun ako, Teso ma chenni moeka erepa chenrângthôa.”