1 JON 5 - NIEMNYAN Naga NT (BSI)

Nãngma Hahtokkhoh pa Jien eki

¹ Henhenma Jisu pa Misaia ngama putedâlem eka ereheh a Joban Chha; ngale henhenma Joban Wa nâng huneka erehehma ate Chha nângmin huneka.

² Are junko nãngma Joban chhuchha hehnâng huneki ngama jeteka: erepa nãngma Joban nâng hun achet ngale ate nginkep junko jeteka.

³ Chenrãngma ngako, nãngma Joban hunpa, ate hôkum kep ekipa. Ngale atema chien ehi pa nãngrãngma nyahrãng alat dangmah,

⁴ chenrãngma ngako chentô Joban chha hehma rangkhen pa tâjienmin. Ngale nãng putedâlem junma nãngma hahtokkhoh pa tajieneki.

⁵ Henma are hahtokkhoh pa tâjienmin a? Henhenma Jisu pa Joban Chha ngama putedâlem eka erehehma loloba tâjienmin.

Jisu krista Hâkhi

⁶ Jo ngale hei demnâng katte pa Jisu Krista. Atea jololo demnâng katwah dangmah, jo ngale ate rit kowah hongtah hei wanniinii demnâng katwah. Ngale Juma erepa toangtang ngin ngama ngaeka, chenrãngma ngako Jupa toangtang.

⁷ Arepa nãngnâng wanrem ma hâkhi kohehi.

⁸ Erepa Ju, Jo, ngale hei; ngale are wanrem pumma mãnthe thôkoh ehi.

⁹ Nãngma mihnyan hehma thôkoh nginko putedâlem eki; rohkomin, Joban ma thôkoh ehipa ere nomemin achaan, ngale Joban ma erepa ate Chha junma thôkoh ehi.

¹⁰ Erohwah henhenma Joban Chha nâng putedâlem eka, ereheh hungnâng are nginpa thien eka; rohkomin henhenma Joban nâng putedâlem mah a, erehehma Joban pa mothôrãng hôan eka, chenrãngma ngako Joban ma thinnâng ate Chha junma chenni thôkotah a ereko thinma putedâlem mah.

¹¹ Atema thôkohthi nginpa arepa: Joban ma nãngnâng roantang roanjêng roandông kohehi, ngale are roantang roanjêng roandôngpa ate Chha ngewah choheki.

¹² Henhen nâng Chha tongeka ereheh nâng are roandông pa tonga; ngale henhen nâng Joban Chha ahoa ereheh nâng roandôngpa aho.

Roantang roanjêng Roandông

¹³ Ngama nenâng are raang ekapa nema ninâng roantang roanjêng roandôngpa tonghi ngama jetrãng raangeka - nema Joban Chhako putedâlem en.

¹⁴ Nãnga Joban mathahko hungdongdong dangeki, chenrãngma ngako nãngma chenni akomin ate hung junko ate ngewah methaeko atema metkep echohtat hi.

¹⁵ Ngale nãngma chenthu komin ate ngewah methaeko, atema nãng nginpa etat hi ngama mejet eko; nãngma ate ngewah chenni thaekia erepa atema nãngnâng kohehi ngamemin jeteki.

¹⁶ Chenjô komin nepho anaa ma pap molahma lâkhetet, phumma atema pap moeka pa ate ritli ledang medang ako, nema Joban nâng rangsoam koh en, eko Joban ma ere mihnyanko roandông ekoh a. Arepa thinma moeka pappa rittô ledang moatte hehrãng ngaeka. Rohkomin ritli papmin tonga, phumma Ngama ere lânriiroh papkaam moatte hehrãng Joban nâng rangsoam koh en ngat dangmah.

¹⁷ Chentô kaamchhih moat pa pap, rohkomin rittô ledang papmin tonga.

¹⁸ Nãngma ajet Joban chha hehma henmemin papkaam thammomah, chenrãngma ngako thin a Joban Chha ma pesiet lahma thieneka, ngale Juchhih ma thinnâng chenjô taremah.

¹⁹ Nãngma ajet rangkhen pa phangtang Juchhih ma pênlahma ate khennângjô methien akomin nãnga Joban chha.

²⁰ Nãngma ajet Joban Chhapa katha ngale nãngnâng toangtang pa jetthuk ehi, erohwah nãngma linlin toangtang Joban pa jeteki. Ngale nãnga linlin Joban demnâng aroamma tongeki - ngale ate Chha Jisu Krista demnâng aroamma tongeki. Arepa linlin toangtang Joban, ngale are pejôba roantang roanjêng roandông.

²¹ Ngachhu Ngachha heh, joban mõang atoang hehwah jetletma tongen!