1 JON 1 - NIEMNYAN Naga NT (BSI)

Roandông Jabkhab

¹ Nima nenâng rangbeng hahbeng thuwah roandông Jabkhab junma thôkoh rãng raangeka. Nãngma ere Jabkhab junma chohtattih, ngale nãngma erepa nãngdede mitma chohkhetih; nãngma erepa khetih, ngale nãngdek memin ereko sahlotih.

² Chenthu erepa mitma jienkheli rãng litjâ phumma, nãngma kheki; erohwah nima erejunma thôkoh eka, ngale nãng Wa demwah roantang roanjêng roandông nãngnâng jetthukthi junma thôkoh eka.

³ Nima chenni khetih a, ngale tattih a ereheh nenâng thôkoh eka, erohkoba nemin nidemnâng Wa Joban ngale ate Chha Jisu Krista demko aroamma ejoh danghi.

⁴ Nima are raangeki pa nãngkhu nyahrãng khuhah nâhah chendange ngama raangeka.

Joban pa Wenphiak

⁵ Nima are nginpa ate Chha ngewah chohtat lihma nenâng thôkoh eka: Joban pa wenphiak, ngale atenâng rangnyek amãnchhajô aho.

⁶ Phumma nãngma ate demnâng aroamma tongeki ngama ngalihma, nãnga rangnyek khennâng metong eko, nãngma jabkhab ngale moatlem nângmin mothô dangeki.

⁷ Phumma ate chenroh wenphiak nâng tongeka-ererãngrãng nãngmin wenphiak nâng eroh metong eko wathema wathe demnâng aroamma tongeki, ngale ate Chha Jisu hei pumma nãngpap chentô hehwah lâsâsietthi.

⁸ Nãngma nãngnâng pap aho menga eko, nãngma nãng dedeba diapchhah riieki, ngale nãngnâng toangtang pa aho.

⁹ Rohkomin nãngma nãngpap heh Joban wah map methaeko, atema toamsem tah junko atema toangtang emoa: atema nãngpap heh map ekohhi, ngale nãngma chentô kaamchhih motihheh phangtang esâsiet hi.

¹⁰ Phumma nãngma papkaam momih mengaeko, nãngma Joban ba mothô rãng hôan eki, ngale ate Jabkhab pa nãngnâng aho.