तीतुस 3 - नोयरी नोवलू नियम

मसीह चाल-चलन

¹ मांहोहो सोमजाड़ के हकीमोंहो अने अधिकारी अधीन रोआ अने त्या आज्ञा माने अने हर एक हाजा कामोओ कोअता तियार रोवा,

² कोडाहबी बदनाम नाहा कोहू, झगड़ालू मा ओविही; पोन सौम्य स्वभावाचा होय, अने आखे मांहाहा आरी वोडा नम्रतेने रोअलो.

³ काहाके आमू पोन पहीले निर्बुद्धी, अने अवज्ञा कोअनारे, अने विभिन्न प्रकारो वासनांचे अने विलासराव दासत्व मेहे ओते, अने दृष्ट पना अने हेवा या आविश्य मोकलित ओते, तिरस्कार पात्र ओते, अने एक दिहराआ दोष कोईत ओते.

⁴ पोन जाहा आमाआ तारणारा देवाआ कृपा अने मांहो उपो तियाआ प्रीती प्रगट उवी,

⁵ तिये आमाहा तारण कोयु; अने ऐ धर्माआ कामाआ कारनो कोईत नाहा, जे आमू खुद कोयु, पोन आपाआ दया अनुसार नवो जल्माआ तारिले अने पवित्र आत्माआ आमाहा नवो बोनाविलो व्दारे उवे.

⁶ ज्याहा तिये आमाआ तारण कोअता येशु ख्रिस्ताआ व्दारे आमा उपो विपुल होलीदे.

⁷ तियाआ शी आमू तियाआ कृपेणे धोर्मी होमजीत, अनंत जीवनोओ आशा नुसार वारीस बोनहू.

⁸ ए गोठी खोरी होय, अने आय होमजीत्लू का तू आव गोठीइ विषयी खात्रीवाही गोगनारू का याकोअता का जिये देवापो विश्वास मेकलू होय, ते हाजो-चांगले कामा माय कोइला कोअता लक्ष दयाहि गोठी हाजी अने मांहाहा लागि गोईली होय.

कलह सी वासा

⁹ पोन मूर्खताआ विवाद, अने वंशावळ्या, अने विरोध अने झगडा सी जे व्यवस्थाच्या विषया माय होय, होंबलीत रो; काहाके ते नीरुपयोगी अने व्यर्थ होय,

¹⁰ कोठलाज तडफिनाराहा एक बेन टायमोआ समजाविलो मुमजवून तियाआ अलग रोअलो,

¹¹ ए सोमजाडिते का एहेलू मांहु, भोटकीन गोल्यो होय, अने आपाआ दोषी कोईत पाप कोईत रोतलू.

आखरी सन्देश

¹² जाहा आयताआ जागे अरतिमास अने तुखिकुस याहा मोकलित ताहा माआ जागे निकपलीस आवीला प्रयत्न कोअला, काहाके आय तोज हिवाळा कोईत नीश्रय कोयु होय.

¹³ जेनास शास्त्री अने अपुल्लोस याहा यत्न कोईत आगाडी पोतडहु दया, अने पाला का तियाहा कोडला वस्तूअ कोम नाहा ओवुहु जुवे.

¹⁴ आमाहा मांहे पोन गोरजेहे पुरो कोइला कोअता हाजा कामोमे कोइला कोअता हिके म्हणजे निष्फळ नाहा रोअलो.

शुभकामना

¹⁵ माआ आखे आरी तुमामे सलाम जो विश्वासाआ कारनो कोईत आमा आरी प्रेम मेकतात, तियाहा सलाम तुमाआ आखाजपो कृपा होय.