रोमि 9 - नोयरी नोवलू नियम

परमेश्वरोओ निवडिले मांहे

¹ आय ख्रिस्तमेहे खोरो कोहो, आय ठोगतु नाहा गोगोहो अने माआ विवेक बी पवित्र आत्मा मेहे गोवाय आपत्लू

² का माहु वोडू शोक होय, अने माआ मोन सदा दुखत रोनारे,

³ काहाके का आय इही पर्यंत इच्छितो का आपाआ पायहोहो जे डीलोओ भाव सी माआ कुटुंब मेरयू होय खुद; ख्रिस्त त्यापोरोत शापित ओत जातु.

⁴ ते इस्राएली होय, दंत्तक पणाचे अधिकार अने गौरव अने वाचा अने नियमशास्त्र अने उपासना अने प्रतिज्ञा तीयाज होय.

⁵ पूर्वजही तियाज होय अने ख्रिस्तपण डीलोओ बोहे ज्याचमेहे होय आखाज परम परमेश्वर कायम धन्य ओवे, आमेन.

इस्राएलो नाकारलोओ अने परमेश्वरोओ उद्देश

⁶ पोन ओ नाहा का परमेश्वरोओ वचन टाकीत जाइअलो, याकोअता काजे इस्राएल तियाआ वंश होय ते आखे इस्राएल वंश नाहा,

⁷ अने नाहा अब्राहमो वंश उविलाआ कारनोवाही आखे तियाआ पोऱ्ये ठरव्येहे परंतु इसहाक यापोरोत ताआ वंश कोवाय.

⁸ अर्थात डीलाआ पोऱ्ये परमेश्वरोओ मुलगा नाहा परंतु प्रतिज्ञेची पोऱ्ये आशामे मोजीलो जाहो.

⁹ काहाके का प्रतिज्ञेचे वचन ओच होय का आय आव वेलाआ अनुसार आवे अने साराला पुत्र उवे.

¹⁰ अने फक्त ओच नाहा ताहा रीबिका पण एकहो अर्थात आमाआ बाह्हू इसहाक यापोरोत गर्भवती ओती,

¹¹ अने ओमे पर्यंत नाहा पोऱ्यो जनम्यो ओते अने नाहा तियाआ हाजो वाईट कोल्यु ओते, याकोअता का परमेश्वरोओ योजना जो तियाहा निवडीत लेअला अनुसार होय कर्म कोनारू कारनोवाही नाहा परंतु हदणाराआ कारनोवाही होय, बोणीत रोही

¹² तिये कोयु, बाह्हा होस सेवा कोअही.

¹³ जेहलो लेखिलो होय आय याकोबावर प्रेम कोल्यु परंतु एसावाला अप्रिय मान्ये.

इस्राएलो नाकारलोओ अने परमेश्वरोओ न्याय

¹⁴ याकोअता आमाहा कि कोहू? कि परमेश्वराही अन्याय होय? कदापि नाहा.

¹⁵ काहाके का तो मोशेला कोत्लू, आय ज्या कोडापो दया कोहू इच्छितो तियापो दया कोअत्लू अने ज्या कोडापो कृपा कोहू इच्छितो तियापो कृपा कोअही,

¹⁶ आखरी ओ नाहा का इच्छा कोनारो का नाहा पलनारू का परंतु दया कोअनारे परमेश्वरोओ गोठी होय.

¹⁷ काहाके का पवित्र शास्त्रामेहे फारोला कोयु गोये, आय ताहु याकोअता उभे कोल्यु होय का तुमामे आपाआ सामर्थ्य देखाडीत अने माआ नावाआ प्रचार आखा धोरतीपो ओवो.

¹⁸ याकोअता ओ तियापो इच्छितो,, तियापो दया कोअत्लू अने ज्याहा इच्छितो तियाहा कडक कोईत आपोहो,

¹⁹ आखरी तू माहु कोअही, तो फासी काहा दोष लागाडीत, कोडू तियाआ इच्छावाही सामना कोअही?

²⁰ हेमाहू, तू कोडू होय जो परमेश्वरोओ सामना कोअत्लू? नाहाकोत तीयार कोली वस्तू कोहू गोयो का घोड्विनारू, माहु एहलो काहा बोनाडहि होय?

²¹ के कुमारोहो तुमामे काद्वोमेहे अधिकार नाहा का एकाच गोट्या एक बासणा आदराहाटी अने दिहराआ अनादरासाठी बोनाडहि?

²² ताहा तीयाम कोडली आश्चर्याची गोठी होय का परमेश्वराने आपाआ राग देखाडीलाकोता अने आपाआ सामर्थ्य प्रगट कोइलाआ इच्छावाहि क्रोधावाही हानापऱ्याआ जे विनाशासाठी तीयार कोल्यु गोये ओते, वोडू धीरावाही खोरो;

²³ अने दया पाडापअ, जिये तियाआ गौरव कोअता पहिलुच तीयार कोल्यु, आपाआ गौरवाच्या हाजाकाजे इच्छा प्रगट कोअयी?

²⁴ अर्थात आमापो जिये तिये न फक्त यहुदीयांमे नहाते दिहरे जातीमेहे पण हादिलो गोये.

²⁵ जेहलो तियाअ होशे च्या पुस्तकाम पण कोत्लू, जी माआ प्रजा नाहाओती तियाहा आय. आपाआ प्रजा कोअलो ताआ जी प्रिय नाहाओती तीही प्रिय कोय.

²⁶ अने एहलो उवे का ज्या जगुमे तियाहा ओ कोयु ओते का तुमु माआ प्रजा नाहा होय, तियाआ जागापो ते जीवतु परमेश्वरोओ पोऱ्ये कोयु जाइअलो.

²⁷ अने यशायाह इस्राएल विषयी आयडीत कोत्लू, जर इस्राएल च्या संतानाची संख्याआ समुद्राआ वालू एती होय तेबी पोन तीयामरोत थोडोज वासिजाए.

²⁸ को का प्रभू आपाआ वचन धोरतीपो पुरो कोईत धोर्मी तेणे तियाहा तत्काळ सिद्ध कोअही.

²⁹ जेहलो यशायाह लेतजा पहीले पण कोयु ओते, किबी सेनाधीशाचा प्रभू आमा कोअता किबी. वंश नाहा सोडये ओते, ताहा सदोमाच्या सारखो ओत जाता अने गमोरा हारको बनलो रोतो.

इस्राएलो वर्तमानो परिस्थिति

³⁰ सासोल्यू आमाहा कि कोहू? ओच का अन्यजाति जे धार्मिकताआ होद कोईत निमिले, धार्मिकता जोडयो कोअयी अर्थात तियाअ धार्मिकतेला जो विश्वासामेहे होय,

³¹ पोन इस्राएलो जे धर्माच्या नियमशास्त्राचा होद कोईत ओते ते नियम शास्त्रापर्यंत पुग्या नाहा.

³² काहा? याकोअता का ते विश्वासा नाहा परंतु माहू ते कर्मवाही होद कोईत ओते, तिये तियाअ ठोकराचे दोणोपो ठोकर निसे,

³³ जसे लेखिलो होय, पाला आय सियोनामध्ये एक ठोकायू लागनार डोणो अने ठोकर खानारू चट्टान मेकोहो अने जो कोडु तियाआ उपो विश्वास कोअही, तो लाजआली उवे नाहा.