रोमि 5 - नोयरी नोवलू नियम

परमेश्वर सी मेलमिलाप

¹ ओमे जाहा विश्वास मेकित धर्मी ओवया, ताहा आपाआ प्रभु येशु ख्रिस्त द्वारे परमेश्वरोओ आरी मेल मेका,

² ज्याआ द्वारा विश्वासाआ कारनोवाही तियाअ कृपे पर्यंत ज्याम आमाहा बनलो होये, आमाआं पुग्यु पण, अने परमेश्वरोओ गौरवाच्या आशेपो खत कोअला,

³ फक्त ओच नाहा, नहाते आमाहा क्लेशात पण खत कोहू, ओ जाईत का क्लेशानी धीर,

⁴ अने धिराआ खर निकलीयो अने खोरो निकलीलो सी आशा उत्पन्न ओती,

⁵ अने आशेनी लजीत उवनारा नाहा काहाके पवित्र आत्माआ जी आमाहा आप्या गोल्यो होय तियाआ व्दारे परमेश्वरोओ प्रेम आमा मोनुमे मेकल्या गेल होय.

⁶ का जाहा निर्बल ओतू, ताहा ख्रिस्त ठीक टायमोमें भक्तीहिनो कोअता मोल्यु.

⁷ कोडु धोर्मी माहाकाजे कोडू मोईत गोईल्यू, ओ ताहा दुर्लभ होय परंतु उवहू सेकोहो कोडला हाजा मांहाकोअता कोडु मोअहु कोअता पण धाडस कोअही,

⁸ पोन परमेश्वर आमापो आपाआ प्रेमाची प्रमाण आव रीतीवाही प्रगट कोअता का, जांहा आमाहा पापीज ओते तेहलाम ख्रिस्त आमा कोअता मोल्यु,

⁹ आखरी जांहा का आमाहा ओमे तियाआ रक्ताआ कारनोवाही धर्मी ठरेल, ताहा तियाआ द्वारा परमेश्वरोओ क्रोधावाही वासीलो नाहा वाचा?

¹⁰ काहाके एके दुश्मन उविलाआ दशामे तियाआ पुत्राच्या मृत्युच्याआ व्दारे आमाआं भेट परमेश्वरा आरी उवी, ताहा भेट होतगोयो ओवल्यु फासाडी तियाआ जीवनाआ कारनोवाही आमाहा उद्धार काहा पावनारू नाहा वासा?

¹¹ फक्त ओच नाहा, परंतु आमाहा आमा प्रभु येशु ख्रिस्ताच्या व्दारे ज्याआ व्दारे आमाआं भेट उवी परमेश्वरा आरी आनंदाम ओये.

आदम मेहे मृत्यु, मसीह मेहे जीवन

¹² याकोअता जेहलो एक मांहाहा व्दारे पाप जगात आव्ये अने पापाआ द्वारा मरण आवयू अने एहला रीतीवाही मरण आखे माआहा मेहे फैलावीत गोल्यो काहाके आखाज पाप कोल्यु.

¹³ नियमशास्त्र आप्या जालुजापोर्त पाप जगुमे ताहा होतुजे परंतु जीही नियमशास्त्र नाहा तीइही पाप मोजीलो जानारू नाहा.

¹⁴ तेबी आदमो पेलरोत होतगोयो मोशे पर्यंत मरण तीया माहापो रोत पण राज्य कोल्यु, जिये तियाअ आदम, जो तो तियाआ आवनारा चिन्ह होय का अपराधाआ एकहरको पाप कोल्यु नाहा.

¹⁵ पोन जीही अपराधाची दशा होय, तेहेली कृपा दानाहा वरदानावाही नाहा, काहाके का जांहा होमला मांहाहा अपराधाने जाअखो मांहे मोअये, ताहा परमेश्वरोओ कृपादान अने तियाआ जे दान एक मांहाआ, अर्थात येशु ख्रिस्त कृपादानानी उवे जाअखो माहापो रोत आवश्यक पुष्कळच उवे.

¹⁶ जेहलो होमला मांहाआ पाप त्याकाजे फोल उवे, तेहलूज दानाहा ठेराव ओवयू, परंतु जाअखो एहलो अपराधाच्या दंडो कारनोवाही तेहलूज वरदान उत्पन्न ओवयू का मांहे धोर्मी ठेरती.

¹⁷ काहाके का जाहा होमला मांहाहा अपराधाच्या त्याकाजे मरण तियाआ एकाच जमाहा द्वारा राज्य कोल्यु ताहा जेलोष कृपादान अने धर्मरूपी वरदान जाअखो मिलन्ये ओते ते एक मांहाआ, अर्थात येशु ख्रिस्ता द्वारा आवश्यच अनंत जीवनामे राज्य कोआ.

¹⁸ याकोअता एहलो एक अपराध आखे मांहोहो जेहे दंडाओ आज्ञेचे, काहाके उवे तेहलूज एक धर्म तियाआ काम पण आखे मांहो जेहे जीवनाआ निमित्त धोर्मी ठेरविल्या जाआलो काहाके उवे.

¹⁹ काहाके का एहेलू एक माहांआ आज्ञा न पालेताहां जाअखो मांहे पापी ठरव्येहे तेहलूज एक मांहु आज्ञा पालेताहां जाअखो मांहे धोर्मी ठरव्येहे.

²⁰ नियमशास्त्र मायतेच आवीत गोये का अपराध जाअखो ओवो परंतु जीही पाप उवे तीइही कृपादान त्यापोरोते पण जाखा उवे,

²¹ जेहलो पापुमे मरण फैलावित राज्य कोल्यु, तेहलूज आमा प्रभु येशु ख्रिस्ताआ व्दारे कृपादानपण अनंत जीवना कोअता धोर्मी ठरवित राज्य कोल्यु.