रोमि 4 - नोयरी नोवलू नियम

अब्राहम विश्वासोसी धर्मी ओवयु

¹ याकोअता आमू की कोनारा आमाआ डीलो बाह्हू अब्राहोमोहो की प्राप्त ओवयो?

² काहाके का केधी आब्राहम कानोवाही धोर्मी ठेरव्यू गोल्यो ओतलू ताहा तियाहा खत कोइला कोअता जागू ओती, परंतु परमेश्वरोओ आगाडी नाहा.

³ पवित्रशास्त्र नाहाकोत कोतली? ओच का “अब्राहम परमेश्वरोओ विश्वास कोअयु अने ओच त्यांकोअता धार्मिकता मोजला गोये”

⁴ कामकोनारां मोजरी आपलो दान नाहा पोन हक्क होमाज्या जात्लू.

अब्राहम खतना पेल विश्वास सी धर्मी ओवयु

⁵ पोन जो काम कोईत नाहा भक्तीहीनच्या धर्मी ठरवीनारापो विश्वास कोअत्लू तिया विश्वास तियाआ धार्मिकता माय मोजीलो जात्लू.

⁶ ज्याहा परमेश्वर बिना कामाला धोर्मी ठरर्विलो तियाहा दाविद पण धन्य कोत्लू,

⁷ धन्य होय ते ज्याआ अपराध क्षमा उवे होय अने ज्याआ पापापो टापा गोयेहे.

⁸ धन्य होय ते मांहु ज्याहा परमेश्वर पापी ठरावीत नाहा.

⁹ ताहा ओ धन्य वचन नाहाकोत सुंता वाल्यांसाठी होय? सुंता रोत्लू होय तियाआ याकोअता पण? आमू ओ कोयु होय अब्राहमोओ तिया विश्वास धोर्मी मोजीलो गोल्यो.

¹⁰ ताहा ते केहलो मोजला गोये? सुंताच्या हालोंम ला बिना सुंताच्या हालोंम सुंतेच्या हालोंम नाहा परंतु बिना सुंताआ हालोंम,

¹¹ त्याआं सुंतेचे चिन्ह जोडयेहे का तिया विश्वासाआ धार्मिकता पोओ शिक्का ओतगोयु जाइज तियाआ बिना सुंतेच्या हालोंम विश्वास कोअता काहाके का ते पण धोर्मी ठेरती,

¹² अने तिया सुंता कोअनारा बाह्हू होय जे नाहा फक्त सुंता कोयु होय पोन आमू बाह्हू अब्राहम तियाअ विश्वासाआ अनुसरून पण सालतेहे जो तियाहा बिना सुंतेच्या दशमध्ये कोअयु ओतु.

¹³ काहाके ऐ प्रतिज्ञा आप्लु का तो ज्या जगतो वारीस उवे नाहा आब्राहम ला तिया वंश ला पोन नियमशास्त्रा द्वारे आप्यी गिली ओती परंतु विश्वासाआ धार्मिकतेआरी जोड़ी.

¹⁴ काहाके नियमशास्त्राआ वारीस होय ताहा विश्वास व्यर्थ अने प्रतिज्ञा निष्फळ ठरेल.

¹⁵ नियमशास्त्र ताहा क्रोधाला कारणीभूत ठरतलो, अने इही नियमशास्त्र नाहा तिही तिया उघाड्ल्यु पोन नाहा.

¹⁶ याज कारनोवाही प्रतिज्ञा विश्वास कोओ आधारित होय का कृपेच्या रीतीपो होय का तियाआ आखे वाडवडील दृढ़ ओवे, नाहा ताहा ते फक्त तियाआ कोताज अब्राहम एकहरको विश्वासणारे होय, तोज ताहा आपाआ आखाआ बाह्हू होय,

¹⁷ जेहलो लेखिलो होय आय ताहु जाअखो जातीपो बाह्हू ठेरव्यू होय, तिया परमेश्वरोओ आगाडी ज्यापो तिये विश्वास कोअयु अने ज्याहा मोल्यामरोत जिवंत कोल्यु अने ज्या गोठी होय नाहा तियाआ नाव एहलो लेहो का मानीत ल्या तोज होय,

¹⁸ तिये निराशा माय पोन आशा मेकीत विश्वास कोअयु याकोअता का तियाआ वोचाना प्रमाने कोल्यु ताआ वंश एहलो उवे, तो जाअखो जातीया बाह्हू होय.

¹⁹ तो ताहा शंभर सालोओ ओतु आपाआ मोल्या डील अने सारा मोइली दशा होमजीत पण विश्वास निर्बल कोअयु नाहा

²⁰ अने नाहा अविश्वासी ओतगोयु परमेश्वरआ प्रतिज्ञा पोओ शंका कोअयी नाहा पोन विश्वासामेहे दृढ ओतगोयु परमेश्वरोओ गौरव कोल्यु,

²¹ अने निच्छित होमाज्या का तियाअ गोठीई तिये प्रतिज्ञा आप्लु होय ते तियाहा पुरो कोइला कोअता पण समर्थी होय.

²² आव कारनोवाही ओ त्यांकोअता धार्मिकता मोजला गोये.

²³ अने ओ वचन, विश्वास त्यांकोअता धार्मिकता मोजीलो गोल्यो, नाहा फक्त तियाआ कोताज लेखिलो गोये,

²⁴ नहाते आमा कोअता पण याकोअता विश्वास, धार्मिकता मोजला जाय, अर्थात आमा कोअता जो तियापो विश्वास कोअत्लू जिये आमा प्रभू येशुहू मोल्यामरोत जिवंत कोल्यु.

²⁵ ते आमू अपराधासाठी तोआत गोल्यो, अने आमाहा धोर्मी ठरविलाकोता जिवंत पोन कोअयु गोल्यो.