रोमि 15 - नोयरी नोवलू नियम

दिहराआ बोझ उसलिलोओ

¹ ओमे आमू जे बलवानो जोवे का कोमजोरो ओ कोमजूरि सहन कोईत सेकताहा ने कोडू आपाआ आपुह प्रसन्न कोआ.

² आमापोरोत हर एक जागऱ्याहा तियाआ हाजा कामा कोअता प्रसन्न को का तियाआ उन्नति उवे.

³ काहाके का ख्रिस्ताने आपाआ स्वतःहा प्रसन्न कोल्यु नाहा पण जेहलो लेखिलो होय, “ताआ निंदकांची निंदा मापो आवयी होय”

⁴ जेतेहे गोठी पाल्या पोरोत लेख्यहो गोयी होय, ती आमा कोअता लेखी गोयी होय का आमाहा धीर अने पवित्रशास्त्राआ हाजो आशा मेकही.

⁵ धीर अने शांती आपणारो परमेश्वर तुमामे ओ वरदान आप का ख्रिस्त येशुउ नुसार परस्पर एक मोन ओतगोयु रोअलो.

⁶ काहाके का तुमु एक मोन अने होमला स्वरात आमा प्रभू येशु ख्रिस्ताआ बाहहू परमेश्वर याहा स्तुती कोईली.

एकजुट ओत परमेश्वरो महिमा

⁷ याकोअता जेहलो ख्रिस्ताने परमेश्वरोओ गौरव कोअता तुमामे ग्रहण कोल्यु होय तेहलूज तुमु पण एक दिहीराहा ग्रहण को.

⁸ याकोअता आय कोत्लू का जी प्रतिज्ञा आगला डायाहा आप्यी गोयी ओती तियाहा दृढ कोइला कोअता ख्रिस्त परमेश्वरोओ हाजोपोन प्रमाण आपलो कोअता सुंता कोईओलो मांहो सेवक बन्यो,

⁹ अने अन्यजाति पण विसारोओ दया परमेश्वरोओ स्तुती केहेलो कोये लेखिलो होय, “याकोअता आय जातीई-जातीई माय ताआ धन्यवाद कोअनारू, अने ताआ नावाआ भजन गावीही”

¹⁰ फासी कोयु, “ओ जाती-जातीइ आखे माहु, तियाआ प्रजे आरी आनंद को”

¹¹ अने फासाडी, “ओ जाती-जातीइ आखे माहु, प्रभूऊ स्तुती को, अने ओ राज्य राज्यआ माहु, तियाआ स्तवन को”

¹² अने फासाडी यशायाह कोत्लू, इशायाचा अंकुर फुटे, अने दिहरे जातीया अधिकारी उविला कोअता एक उठी, तियापो अन्यजाति आशा मेकीत.

¹³ परमेश्वर जो आशेमेहे दाता होय तुमामे विश्वास कोइला कोअता आखे प्रकारोओ आनंद अने ठावकुजे पुरोओत कोअही का पवित्र आत्माआ सामर्थ्यावाही तुमाआ आशा वोदतो जाइअलो.

यरूशलेमरोत इल्लुरिकुम

¹⁴ ओ माआ पाही, आय स्वतः तुमाआ विषयाला निच्छित ओलखीत्लू, का तुमु पण स्वतःआ हाजोकोते पोअल्ये ईश्वरीय ज्ञानांनी जाअखो होय, अने एक दिहराहा बोध कोहू सेकतेहे.

¹⁵ तेबी आय केधी-केधी ओर आपलो कोअता तुमामे जे जाअखो धैर्याने लेखिलो होय ओ तियाअ कृपेच्या कारनोवाही उवे जे परमेश्वराने माहु आप्लु होय,

¹⁶ का आय दिहरे जाती याकोअता ख्रिस्त येशु सेवक ओतगोयु परमेश्वरोओ सुवार्तेची सेवा याजका एकहरको कोहू, ज्याआपोरोत अन्यजाति या अर्पण कोअल्यो जालो पवित्र आत्मावांहि पवित्र बोणीत ग्रहण कोल्यु जाइअलो.

¹⁷ याकोअता तिया गोठीइ विषया माय जे परमेश्वरा आरी संबध मेकोहो, आय ख्रिस्त येशु माय माहु अभिमान वाटतो.

¹⁸ काहाके तिया गोथिहिई सोडीत माहु फासी कोडला गोठीइ विषया माय कोअंलाअ धैर्य नाहा जे ख्रिस्ताने अन्यजाति याहा अधिनतेसाठी वचन अने कर्म,

¹⁹ चिन्ह अने अदभूत ई पवित्र आत्माआ सामर्थ्यावाही माआजे त्यापोरत कोल्यु इहिंजा का आय यरुशलेमे मधून चारू आरी इल्लुरिकुम पर्यंत ख्रिस्ताच्या सुवर्तेची पुरो-पुरो घोषणा कोअयी.

²⁰ पोन माआ मोनाआ इच्छा ए होय का जीही-जीही ख्रिस्ताचे नाव नाहा गोये तिही पर्यंत सुवार्ता होम्लाड़जे एहलो न ओवो का दिहरा बांधीत मेकल्या पायापो को बानदेहे.

²¹ पोन जेहलो लेखिलो होय तेहलूज ओवो, ज्या माहु पर्यंत तियाआ सुवार्ता पुगाड्यु नाहा ते पालिलो अने ज्याहा होमल्ये नाहा ते समाज.

रोम मेहे जाअलो योजना

²² याकोअता आय तुमाही आवता फासी-फासी अडथळा आवयू.

²³ पोन ओमे आव देशामेने माआ कार्याकोता फासी जागू रोली नाहा अने जाअखो वोराम माहु तुमाआ जागे आविलाआ उत्कंठा होय.

²⁴ याकोअता जांहा आय स्पेनला जाइताहा तुमाही आविलो जाइअलो काहाके का माहु आशा होय का माहु तीही आवता तुमाआ आरी भेट उवे अने जांहा तुमाआ होबती उवे माआ मोन पोईत आवे तेहलाम तुमु माहु किबी सेटे पर्यंत पोताडीन आपा.

²⁵ पोन ओमे ताहा आय पवित्र मांहाहा सेवा कोअता यरुशलेम ला जात होय.

²⁶ काहाके का आय मकिदुनिया अने अखयाच्या माहुंहु ओ हाजो वाटेम का यरुशलेमामे पवित्र माहुंमे गरिबांकाजे किबी मदत कोअत्लू.

²⁷ तियाहा हाजो ताहा वाटेम, परंतु ते त्याआं कर्जदार होय, काहाके का अन्य जाती केधी आध्यात्मिक गोठीमेहे सहभागी ओयताहा तियाहा पण उचित होय का शारीरिक गोठीमेहे तियाआ सेवा को.

²⁸ याकोअता आय ओ काम पुरो कोईत अने तियाहा ए आर्थिक मदत आपित तुमाही आविलो स्पेनला जाइअलो.

²⁹ अने आय ओलखीत्लू का जांहा आय तुमाही आवे तेहलाम ख्रिस्ताचे पुरो आशीर्वाद आरी आवे.

³⁰ ऐ पाही, आमा प्रभू येशु ख्रिस्ताच्या जागे पवित्र आत्माआ प्रेमाआ स्मरण आपित आय तुमामे विनंती कोअत्लू कामा कोअता परमेश्वराही प्रार्थना कोईलामे माआआरी आग्रहावाही रो

³¹ का आय यहुद्यांचे अविश्वासणाऱ्या आरी वासित रोही अने माआ जी सेवा जी यरुशलेमे साठी होय पवित्र माहुंहु पोइलो,

³² अने आय परमेश्वरोओ इच्छावाहि तुमापोओ आनंद आविलो आराम पावेल.

³³ शांतीचा परमेश्वर तुमाआ आखा सामने राहो आमेन.