रोमि 14 - नोयरी नोवलू नियम

स्वतंत्रताआ नियम

¹ जो विश्वासामेहे कमजोर होय, त्या हा आपाआ संगती मेहे लेत लेवा पोन तियाआ निर्णीय लेहु कोअता नाहा.

² एकाहा विश्वास होय का आखे किबी खाअलो उचित होय परंतु जो विश्वासामेहे दुर्बल होय तो भाजीपालू खात्लू.

³ जो खानारू तिये न खाणाराहा तुच्छ मानह कायना, अने जो खायलो नाहा तिये खाणाराआ तुच्छ मानह कायना काहाके देवूही आखे किबी बोनाडहि होय.

⁴ तू कोडू होय जो दिहरा सेवकोहो दोष देखाडलिजे? तियाआ स्थिर रोहिलो किंवा पोडीत जालो तियाआ स्वामीई संबध मेकोहो, परंतु ते स्थिर ओत जानारू काहाके प्रभू तियाहा स्थिर रोहू शकतो.

⁵ कोडु होमला दिह्याहा दिहरा दिहारोत जाखा महत्व आपोहो अने कोडु आखे दिहीहो एक एकहरको मोनोहो हर एक जनाने आपाआ मोनामे खात्री कोईत ल्या.

⁶ जो कोडु दिह्याहा पालनारू, तो प्रभूहु मानतेहे, जो खात्लू तो प्रभु कोअता खात्लू, काहाके तो देवोओ धन्यवाद कोअत्लू.

⁷ काहाके आपामेहे कोडु स्वतः कोअता जगत नाहा अने कोडु स्वतः कोअता मोईत नाहा.

⁸ जर आमू जिवंत होय ताहा प्रभु कोअता जीवित होय अने जर मोईत होय ताहा प्रभु कोअता मोईत होय आखरी आमाहा जगू कामोओ, आमू प्रभूउज होय.

⁹ काहाके ख्रिस्त यकोअता मरण पाव्यू अने जिवंत ओवयू का तो मोल्याआ अने जिवंताआ बेनोहो प्रभू होय.

¹⁰ तू आपाआ पाहीपो काहा दोष लागाडीत? किंवा फासी तू आपाआ पायहोहो काहा तुच्छ मोनोहो? आमाहा आखे देवोओ न्याया सनासमोर उभे रोही होय.

¹¹ काहाके लेखिलो होय, प्रभू कोत्लू आय जिवंत होय ताहा माआगाडी हर एक जोओ गुडघे टेके, अने हर एक जीभ देवोहो अंगीकार कोअही.

¹² यकोअता आमू मायरोत हर एक जोओ देवोहो आप आपाआ हिशोब आपी.

¹³ आखरी, तीयाकोता आपु या आगाडी एका दिहरापो दोष लागाडहु नाहा पोन तुमु ठेरवीत ल्या का कोडु आपाआ पायहोकाजे ठोकायू किंवा ठोकर खाअला काहाके बोनहू कायना.

प्रेमो नियम

¹⁴ माहु मालूमे होय अने प्रभू येशुमेहे माहु खात्री होय का कोडली वस्तू स्वतः हाजो नाहा परंतु जो तियाहा अशुद्ध उल्लासीत तीयाकोता अशुद्ध होय.

¹⁵ जर ताआ पाही ताआ रोटू कोइलाआ कारनोवाही नाराज ओतू, ताहा तू प्रेमोवाही सालतू नाहा याकोअता ख्रिस्त मोल्यु तियाहा तू आपाआ खालोज कारनोवाही नष्ट कोहू नाहा.

¹⁶ आखरी, तुमा कोअता जे हाजो होय तियाआ निंदा कोहू नाहा.

¹⁷ काहाके देवोओ राज्य खायलो किंवा पिईलो यामे नाहा ताहा नितीमत्व, शांती अने आत्माद्वारे मिलनारू आनंद होय, जो पवित्र आत्मावांहि मिललू.

¹⁸ जो कोडु आव रीतीवाही ख्रिस्ताची सेवा कोअत्लू तो देवोहो पालत्लू अने माहामे ग्रहणयोग्य होय.

¹⁹ यकोअता आमाहा तियाअ गोठीमेहे रमून रोअलो त्याआरी भेटी गोडो अने एक दिहराआ हुधारीलो उवे.

²⁰ रोटा कोअता देवाच्या कामाकोता बिगाडीलो नाहा, आखे किबी शुद्ध ताहा होय पोन तिया मांहाकोअता वाईट होय जो माहुहू तियाहा ठोकर आवे एहला प्रमाणे खाय.

²¹ हाजो ताहा ओ होय का नाहा माहा खाही अने न द्राक्षरस पीही, अने किबी एहलो कोहू नाहा ज्याआपोरोत ताआ पायहोहो ठोकर लागे.

²² ताआ जो विश्वास होय तियाहा देवोरी आपाहाज मोनामे मेका, धन्य होय जो तियाअ गोठीमेहे ज्याहा तो ठीक उल्लासीत, आपाआ स्वतःहा दोषी ठरावीत नाहा,

²³ पोन जो संशय तोईत खाय तो दोषी ओलखिणारा काहाके विश्वासा खायलो नाहा अने जे किबी विश्वासा नाहा ते पाप होय.