रोमि 13 - नोयरी नोवलू नियम

शासनों आधीन

¹ हर एक माहू शासकीय आधिकारी के आधीन रोय काहाके एखु अधिकार एह्लू ने जो परमेश्वरा वोगेरोत ने होय अने जो आधिकार होय तो परमेश्वराआ ठेरावलु होय.

² याकोअता जो कोडु अधिकारा विरोध कोअत्लू तो परमेश्वरोओ विधिही सामना कोअत्लू अने आड आवणारा दंड ओढवीत लेणारे.

³ काहाके हाजा कामा कोअता अधिकारीही बीइलो एहलो नाहा परंतु वाईट कामा कोअता बीइलो होय तेहलाम अधिकाऱ्याआ भिईलो कायनाहा एहलो मोनामे ओयताहा हाजो ते को अने त्यापोरोत प्रशंसा उवे,

⁴ काहाके का तो ताआ हाजा कामा कोअता परमेश्वरोओ सेवक होय परंतु केधी तू वाईट कोअनारू, ताहा भिईलो बाळग, काहाके तो तलवार व्यर्थ धारण कोईत नाहा अने परमेश्वरोओ सेवक होय का तियाआ क्रोधाअ नुसार वाईट काम कोआनाराहा शिक्षाम आपही.

⁵ याकोअता फक्त आधीन रोहिलो नाहा ताहा तियाआ क्रोधाअ बीइलो बाळगणे नहाते सदाविवेक बुद्धी पण एज साक्ष आपोहो.

⁶ याकोअता को पण आपा का काहाके अधिकार कोअनारे परमेश्वरोओ सेवक होय अने कायम याज कामोम लागित रोत रोतेहे.

⁷ याकोअता आखाआ हक्क आपित टाका ज्याहा कर जोवे तियाहा को आपा, ज्याहा जकात आपलो तियाहा ते दया ज्याहा बिनारो होय तियाहा बीआ ज्याचा आदर कोअला जोवे तियाहा आदर को.

पड़ोसीसी प्रेम

⁸ एकादिहराहा प्रीती कोअला याशिवाय कोडाआ कर्जदार रोहू नाहा काहाके जो दिहरापो प्रेम कोअत्लू तिये नियमशास्त्र पुरो कोए देदो पाल्यू होय.

⁹ काहाके व्यभिचार कोहू नाहा, खून कोहू नाहा, लोभ तोहुं नाहा याआ आज्ञाआ अने कोठलीबी ऐहेली तेबी सारांश जीही आपापो तेहेली आपाआ आरी कोरयापो प्रीती को इयाच वचनोम होय.

¹⁰ प्रेम आरीत्या किबी वाईट कोईत नाहा याकोअता प्रेम कोअला नियमशास्त्र पुरो कोअला होय.

मसीह पेईत लेअलो

¹¹ वेळेला ओलखीत ऐहलेच को याकोअता का आखे तुमु उवतुलू उठिलो एहली वेल आवयी होय काहाके का ज्या वेळेला आमाहा विश्वास कोअयु ओतु तियाअ वेलाआ विचाराआ आमाआ उद्धार जागे होय.

¹² रात सरत जात दीही निहुलेवोले होय, याकोअता आमू काराच्या कामाकोता त्यागून उजवाडामे हत्यार बांधीत लेदलेए.

¹³ जेहलो दिह्याहा होबा आपोहो, तेहलूज आपु हुदी चाल सालीलो चैनबाजीत, मद्यपानात, विषयविलासात अने कामोश्क्ती, सुलालो अने मत्सरामेहे कायनेते.

¹⁴ ताहा तुमु प्रभू येशु ख्रिस्ताहा पेइत्लु को अने डीलोसनाना तृप्त कोइला कोअता तरतूद कोहू नाहा.