रोमि 12 - नोयरी नोवलू नियम

परमेश्वरोहो जीवतु बलिदान

¹ याकोअता ऐ पाही, आय तुमाहा परमेश्वराआ दया ओर कोआडित विनती कोअहो का आपाआ शरीरो ओ जीवते अने पवित्र अने परमेश्वरोहो पोटे ऐहलो बलिदान कोईत चोडावा, ऐ तुमाआ आत्मिक सेवा होय.

² या संसारो सारखे बोनहू नाहा, परंतु आपाआ मोनोमेहे नोवो कोयलो जी जीव रुपांतर ओवुहू आपा, ज्याआपोरोत तुमु परमेश्वरोओ उत्तम, अने ग्रहणीय अने सिद्ध इच्छा महामुंदू होमजीत लेत रो.

आत्मिक वरदान सी परमेश्वरोओ सेवा

³ काहाके का आय तियाअ कृपादानाच्या कारनोवाही जे माहु जोडयेहे होय तुमा मेहेरोत हर एक जनाला कोत्लू, का आपाआ योग्यते पेक्षा जाखा स्वतःहा मानह नाहा परंतु जेहलो परमेश्वराने प्रत्येकाहा विश्वासाआ परिनामा नुसार वाटीत आप्लु होय तेहलूज सुबुद्धी आरी आपाहा सोमजा.

⁴ कोईत का जेहलो आमा डीला अनेक अवयव होय अने आखे अवयवाचे एकाच काम नाहा,

⁵ तेहलूज आमाहा खूप जोओ ओमेत ख्रिस्तामध्ये एक डील अने हर एक जोओ एकमेकाआ अवयव होय.

⁶ जाहा का तिया कृपादानाच्या नुसार जे आमाहा आप्लु गोये होय आमाहा भिन्न-भिन्न वरदान जोडयेहे होय, ताहा ज्याहा भविष्यवाणी कोईत वरदान जोडयेहे होय, तिये ते विश्वासाआ परिनामा नुसार भविष्यवाणी कोईली,

⁷ ज्याहा सेवा कोईत वरदान जोडयेहे होय तिये सेवा लागित रोअलो ज्याहा शिकाडिलो वरदान जोडयेहे होय तिये शिक्षण आपलो लागित रोअलो,

⁸ ज्याहा सुवार्ता कोअंलाअ वरदान जोडयेहे होय, तिये सुवार्ता सांगण्यात लागणारच रोअलो अने दान देणाऱ्याने ते औदर्याने आपलो अने जो दया कोअत्लू तिये ते खुश कोईली.

मसीह व्यवहार

⁹ प्रेमोमेहे ढोंग कायनेते, बुराई सी घृणा कोआ, भलाई कोअता रोवा.

¹⁰ बंधु प्रेमाच्या बाबतीम खोरो स्नेहभाव देखाडातुमी हर एक जोओ एकादिहराहा आदरा कोईत आपा पेक्षा वोडू माना.

¹¹ आस्थे विषयी मंद असू नाहा, आत्माम उत्सुक एहले प्रभु होय सेवा कोईत रो

¹² आशा विषयाम आनंदाम रो संकटाम धीर तोआ प्रार्थनामे निरंतर लागित रो.

¹³ पवित्र मांहाहा गरजा पुरो को पावनाहा खावाडीलो मदत कोअलाआ लागित रो.

¹⁴ तुमामे त्रास आपनारा आशीर्वाद आपा, आशीर्वादच आपा शाप आपुहू नाहा.

¹⁵ आनंद कोअनाऱ्या आरी आनंद कोआपणे शोक कोनारारी शोक को.

¹⁶ आपसामेहे एकचित एहेलू वोडवोडा गोठीपो मन लागाडीलो मुक्या नाहा ताहा गरीब माहुआरी होबती मेका स्वतःहा शहाणे होमज्यू नाहा.

¹⁷ कायने हाजो बद्दल वाईट एहली कोडाआ फेड कोहू नाहा आखे मांहाहा नोजरेवाही जे सात्विक ते कोईला कोअता लक्ष्य मेका.

¹⁸ शक्य ताहा आखे मांहाआरी तुमाही रोत उवे तेतोज शांतीई रो.

¹⁹ प्रिय जनहो, ताआ बदलू मा लेही, ताहा देवाच्या क्रोधाला वात आपा काहाके शास्त्रात लेखिलो होय का बदलू घेणे मांही होय आय बदलू लेही ऐहे प्रभू कोत्लू.

²⁰ आव उलटो जर ताआ दुश्मन फुक लागीही होय ताहा तियाहा रोटू आप अने तोर्ह्यु होय ताहा पाई आप काहाके एहलो कोलाकोता तू तियाआ मुंडकापो आरो रास कोअही.

²¹ बुराई सी मा हाराहा, पोन भलाई सी बुराई यीही जिकित लेवा.