प्रकाशितवाक्य 9 - नोयरी नोवलू नियम

पाचवी तुरही

¹ जाहा पाचव्या स्वर्गदूता वाही तुरही फुकल्या ताहा आय होर्गामरोत एक तारू धरतीप पोडत्लू पाल्यू, अने तियाहा बेपत्ता कुण्ड किल्ली आप्यी गोयी ओती.

² तिये अथाह कुपाला उगड्यो, अने कुण्ड मायरोत वोडो भट्टी सार्खू सेटू उठ्यू, अने कुण्ड तुमाडामे सूर्य अने वायू आंदारो ओत गोयो.

³ तिया तुमाडामे धोरती उपो टीड्ये निकल्ये, अने तियाहा पृथ्वीई विसीई हारखी शक्ती आप्यी गोयी.

⁴ तिये कोयु का नाहा पृथ्वीई खोडाहा, नाहा कोडला साडोहो नुकसान पोते, फक्त तियाअ मांहो नुकसान पुगादडलो जिया माथ्यापो परमेश्वरोओ शिक्का नाहा होय.

⁵ तियाहा मांहोहो माईत टाकण्याच्या नाहा पण पाच मोयनु पर्यंत पीडा आपलो अधिकार आप्यू गोल्यो; अने तियाआ पीडा एहली ओती जीही विसीई ची नांगी देदलो मांहाहा नुकसान ओती.

⁶ तिया दिहो मेहे मांहे मरण हुदे अने नि जोडे अने मोअलो लालसा कोए, अने मरण तियापरोत सेटे नाहे.

⁷ तिया टीड्याहा आवीत लढायी याकोअता तीयार कोल्यु गोदडा टोळ सारखो ओते, अने तियाआ मुंडकापो होणाआ मुगुट ओते; अने त्याआं सोब महांआ सारखो ओते.

⁸ तियाआ सिंज्ये बोओयो सिग्याहस ओते अने दात सिहा दाता सारखो ओते.

⁹ ते लोखंडा सारखो उरस्थाने पेईत ओते; अने तियाआ पंखाआ आवाज एहेलू ओतु जेहलो रथ अने जाअखो गोदडाहा जे लढायी मेहे दोव्ड़ित्ले.

¹⁰ तियाआ शेपूट विसीई हारखी ओते अने तियाआ नांगी ओती, अने तियाहा पाच मोयनु पर्यंत मांहाहा दु:ख द्यायची जी शक्ती जोड़ी ओती, ते तियाआ सेपटाम ओती.

¹¹ अथाह कुण्ड दूत तियापो राजा ओतु; तियाआ नाव इब्री माय अब्ब्दोन, अने हेल्लेनी भाषाआ अपुल्ल्योन होय.

¹² पेल्ली विपत्ती उवनारा गोयी ओती, पाला, ओमे याआ फासाडी बेन विपत्ती फासी आविलो होय.

साहवी तुरही

¹³ ओमे सहावू स्वर्गदूतांवाही तुरही फुकल्या बेनाआ वेदी जी परमेश्वरा आगाडी होय तियाआ शिंगान मायरोत आय एहेलू शब्द होम्लालू,

¹⁴ सोमजा केधी सहावू स्वर्गदूतांवाही, ज्याआ जागे तुरही ओतु, कोयु, “तियाअ चार स्वर्गदूतोहो जी वोडी नदी फरात जागे बांधले ओते सोडीत आपा.”

¹⁵ ते चारू दूत सोडीत आप्या गोये जे तियाआ समयी, अने दीही, अने मोयना, अने वरहो कोअता माहांआ एक तृतीअंश माईत टाकीला तीयारी कोअयी गोयी ओती.

¹⁶ तियाआ फौजांची फिरीलो मोजीलोओ वीस करोड ओती; आय तियाआ मोजीलोओ कोअयु.

¹⁷ माहु या दर्शना माय गोदडा अने त्याआं एहलो स्वार देखाईलो गोये ज्याआ झील माय आग, अने नीळ, अने गंधक सारखो ओते, अने तियाअ गोदडा मुंडको सिहा मुडीई सारखो ओते; अने तियाआ सोबिमरोत आग, तुमाडू, अने गंधक निहित ओते.

¹⁸ आव तिन महामारी अर्थात आग अने तुमाडू अने गंधकांनी जे तियाआ सोबिमरोत निहित ओते माहांआ एक तृतीअंश माईत टाकी देदे गोयी.

¹⁹ काहाके का तिया गोदडाआ सामर्थ्य त्याआं सोब अने तियाआ शेपटी माय ओते याकोअता का तियाआ हापा हारखी ओती, अने तियाअ शेपटी वालू मुंडको ओते अने त्यावाहीज ते पीडा आपते ओते.

²⁰ बाकी माहुहीई महामारीनी नाहा मोअये ओते, तिया आथाआ कामोवाही मोन नाहा फिरीविलो, का दुष्टात्मा, हूनो अने चांदी अने पितलोओ अने डोणो अने लाकळो मूर्तीइ उपासना नाहा कोअनारू जे नाहा पालीत, नाहा होमलित नाहा चालीलो शकत;

²¹ अने जे नर हत्या, अने चेटके, अने व्यभिचार, अने चोरी, तिये कोअयी ओती, तिये मोन नाहा फिरीविलो ओते.