प्रकाशितवाक्य 8 - नोयरी नोवलू नियम

सातवी मुहर-तुरह्या अने हुनाआ धूपदान

¹ जाहा तोओ सातवू शिक्का उगडालू ताहा, होर्गाम आर्दू तास पर्यंत शांतता उवी

² तेहलाम आय तियाअ सात स्वर्गदूत पहीले जे परमेश्वरोओ आगाडी उभे रोत्ले, अने तियाहा सात कान आप्या गोयी.

³ फासाडी एक फासी स्वर्गदूत होना धुपाटना माग्ल्यू आवयू अने वेदीई जागे उबु रोला; अने तियाहा जाअखो धूप आप्यू गोल्यो का आखे पवित्र लोकांची प्रार्थनेच्या आरी, बेनाआ वेदी, उपो, जो सिहासनाच्या आगाडी होय सोडवा.

⁴ तिया धूपाचा सेटू पवित्र लोकांची प्रार्थना आरी स्वर्गदूताआ आताई परमेश्वरा आगाडीही कोए गोल्यो.

⁵ तोये स्वर्गदूता वाही धुपाटणे लेत तीयाम वेदी कोअयी आग बोलीत अने धरतीपो टाकीत आप्यी; गर्जना अने शब्द अने विग अने भूकंप ओवुहू लागाडीत

⁶ जाहा ते सात स्वर्गदूत ज्याआ जागे सात कान ओते तियाहा तुरही फुकिलो तीयार उवे.

पेल्लीई तुरही

⁷ पहीले स्वर्गदूतोवाही तुरही फुकल्यु, अने रक्तानी मिल्योहो गारे अने आगी उत्पन्न उवे, अने पृथ्वी पोओ एक तृतीअंश बोलीते गोल्यो, अने साडोओ एक तृतीअंश बोलीते गोल्यो, अने आखे निलो खोड पण बोली गोये.

दूसरी तुरही

⁸ दिहरा स्वर्गदूतांवाही तुरही फुकल्या, ताहा नाहा आग सारखू पेटात्लू एक वोडू टेंबु समुद्रामे टाकायू; अने समुद्राचा एक तृतीवंश रक्त ओत गोयो,

⁹ अने एक तृतीवंश प्राणी माईत गोये, अने एक तृतीवंश जहाज नष्ट ओत गोये.

तीसरी तुरही

¹⁰ तिसऱ्या स्वर्गदूतांवाही तुरही फुकल्या; अने एक वोडू तारू जो मशाल सारखू पेटात होर्गामरोत टूटी गोयो, अने खाडीइ एक तृतीवंश उपो अने पाअयोंआ सातींवर आवित पोड्यू.

¹¹ तिया ताऱ्याचे नाव नाग्दैना होय, अने एक तृतीवंश पाई नाग्दैना कोडवो ओत गोल्यो, अने ईस्तेज मांहे पाई कोडवो ओवलो सी माईत गोये.

चोव्थी तुरही

¹² चौथो स्वर्गदूतनी तुरही फुकल्या, अने दिहोओ एक तृतीवंश, अने चांदोओ एक तृतीवंश अने ताराआ एक तृतीवंश उपो आपत्ती आवयी, ईहि पर्यंत का तियाआ एक तृतीवंश जागू आंदारो ओवयू अने दिहाआ एक तृतीवंश माय उजालो नाहा रोला, अने तेहलूज रात मेहे बी.

¹³ जाहा आय फासी पहीले, ताहा जुगाहा माय एक गरुडाला उठ्यु अने उचो शब्दामे ओ कोत्लू होमल्यु, “तियाअ तीन स्वर्गदूताची तुरही शब्दाआ कारनो कोईत, ज्याआ फुकीनो ओमे रोल्या होय, धरतीई रोणारापो हाय, हाय, हाय.”